ထိုင်းနိုင်ငံ၏ ၁၅ ကြိမ်မြောက် စက္ကူလေယာဉ်ပစ်ပြိုင်ပွဲတွင် သျှမ်းပြည်သားရွှေ့ပြောင်းအလုပ်သား စိုင်းမောင်ထောင်းဒီး ချမ်ပီယံဆု ထပ်မံဆွတ်ခူးရရှိခဲ့ပြီး ဂျပန်နိုင်ငံတွင် သွားရောက်ယှဉ်ပြိုင် ရန်စီစဉ်နေလျှက်ရှိကြောင်းသိရသည်။

ဩဂုတ်လ ၂၇ ရက်နေ့က ထိုင်းနိုင်ငံ နွန်းထာ့ပူရီခရိုင်တွင် ကျင်းပသော ၁၅ ကြိမ်မြောက်ထိုင်းနိုင်ငံ စက္ကူလေယာဉ်ပစ်ပြိုင်ပွဲတွင် စိုင်းမောင်ထောင်းဒီး ထပ်မံအနိုင်ရရှိကာ ချမ်ပီယံဆု ဆွတ်ခူးရရှိခဲ့ခြင်းဖြစ်ပါသည်။

“ကျနော်အနိုင်ရမယ်လို့တောင်မထင် ဘူး။ ရတော့လည်းဝမ်းသာတာပေါ့။ ကျနော့ကိုအမြဲအားပေးတဲ့ ထိုင်းနိုင်ငံ အကြီးအကဲတွေအားလုံးကိုကျေးဇူးတင်ပါတယ်ခင်ဗျ။ လာမယ့် ၂၀၂၀ မှာ ဂျပန်မှာကျင်းပမယ့် အိုလံပစ်ဂိမ်း မှာကျနော့်ကို ထိုင်းနိုင်ငံကိုယ်စားပြု  စက္ကူလေယာဉ်ပစ်ပြိုင်ဖို့စေလွှတ်မယ်လို့ကြားသိထားရပါတယ်။ အဲဒီအတွက်ပြင်ဆင် နေပါတယ်။” – ဟု စိုင်းမောင် ထောင်းဒီက သျှမ်းသံတော်ဆင့်အားပြောသည်။

စိုင်းမောင် ထောင်းဒီး သည် သျှမ်းပြည်တောင်ပိုင်း လွယ်လင်မြို့နယ် ခိုလမ်မြို့နယ်ခွဲမှ စိုင်းညွန့် နန်းမွမ်း တို့၏ သားသမီး ၂ ဦးအနက် သားကြီးဖြစ်ပါသည်။ ၁၉၉၇ ခုနှစ်တွင်မွေးဖွားခဲ့ပြီး မိဘ ၂ ပါးနှင့်အတူ ထိုင်းနိုင်ငံသို့ရောက်ရှိကာ ထိုင်းအစိုးရကျောင်းတွင် ပညာသင်ယူခဲ့သည်။

လွန်ခဲ့သည့် ၉ နှစ် ၂၀၀၉ ခုနှစ်က အသက် ၁၂ အရွယ် စိုင်းမောင်ထောင်းဒီးသည် ထိုင်းနိုင်ငံကိုယ်စားပြုကျောင်းသားအဖြစ် ဂျပန်နိုင်ငံ စက္ကူလေယာဉ်ပစ်ပြိုင်ပွဲတွင် ဝင်ရောက်ယှဉ်ပြိုင်ရာချံပီယံဆု ဆွတ်ခူးရရှိခဲ့သည်။  ထိုစဉ်ထိုင်းအစိုးရက ၎င်းအား ထိုင်းနိုင်ငံသားဖြစ်ခွင့်ပေးမည်ဟု ပြောဆိုကတိပေးထားခဲ့သည်။ သို့သော် ယနေ့တိုင် အကောင်အထည်ဖော်ပေးသေးခြင်းမရှိ သေးပေ။