သျှမ်းစော်ဘွားများ၏ သားသမီးမြေးမြစ်များစုပေါင်းကာ သျှမ်းပြည်ကြီးအေးချမ်းပါစေကြောင်း ဆုတောင်းကြသည်ဟုသိရသည်။

သြဂုတ်လ ၁၉ ရက်နေ့က သျှမ်းပြည်တောင်ပိုင်း တောင်ကြီးခရိုင် ဆီဆိုင်မြို့နယ် ဘန်းယဉ်မြို့တွင် ညောင်ရွှေ၊ နောင်မွန်၊ ဘန်းယဉ်၊ စံကား စော်ဘွားများ၏ သားသမီးမြေးမြစ်များနှင့်ကျန်ရှိ ဆွေတော်မျိုးတော်များစုပေါင်းကာ သျှမ်းဧကရာဇ် သျှမ်းဘုရင်မင်းမြတ်၊ စော်ဘွား ၃၃ ပါးတို့၏ ၀ိဉာဉ်များအား တိုင်တည်ကာ သျှမ်းလူမျိုးများနှင့်သျှမ်းပြည်သားအားလုံး ပြည်ထောင်စုတိုင်းရင်းသားလူမျိုးများအားလုံးအေးချမ်းကြစေကြောင်း ဆုတောင်းမှုပြုခြင်းဖြစ်သည်။

ညောင်ရွှေစော်ဘွားကြီးစဝ်ရွှေသိုက်၏ သမီးတော်တပါးဖြစ်သည့် စဝ်ဟေမာသိုက်က- “ဟုတ်တယ် ။ သျှမ်းစော်ဘွားများရဲ့ ကျန်ရှိဆွေတော်မျိုးတော်တွေစုပေါင်းပြီး သျှမ်းပြည်နယ်အတွင်းသာမက ပြည်ထောင်စုတဝှမ်းလုံးအေးချမ်းသာယာပါစေကြောင်း ဆုတောင်းမှုပြုတာပါ။ ဘန်းယဉ် စော်ဘွားကြီးရဲ့ ဟော် (အိမ်တော်)မှာ လုပ်ခဲ့ ပါတယ်။ ဆုတောင်းပွဲမှာ လူ ၃၀ ကျော်ရှိပါတယ် “ – ဟု သျှမ်းသံတော်ဆင့်အား ပြောပြသည်။

ဘန်းယဉ်စော်ဘွားကြီး စဝ်စိန်ညွန့် (သက်တော် ၉၉ နှစ်) မှာမူ ယခုနှစ် ၂၀၁၈ မေလ ၁၁ ရက်နေ့က ပင် ကံတော်ကုန် သွားခဲ့ပြီဖြစ်ပါသည်။

သျှမ်းပြည်တွင်းလူထု အေးချမ်းကြစေကြောင်း၊ တိုက်ပွဲရပ်တန့်ပြီး ပြည်ထောင်စုတဝှမ်းလုံးငြိမ်းချမ်းသာယာ ပါစေရန် ရည်ရွယ်ချက်ဖြင့် သျှမ်းပြည်နယ်လုံးဆိုင်ရာ သံဃာ့နာယကအဖွဲ့ ဆုံးဖြတ်ချက်အရ သြဂုတ်လ ၂၀ ရက်နေ့က သျှမ်းပြည်တဝှမ်းလုံး မြို့နယ်တိုင်း တချိန်တည်း တပြိုင်တည်း အန္တရာယ်ကင်း ဥပ္ပါတသန္တိသုတ် ရွတ်ဖတ်ကာ မေတ္တာပေးဝေခဲ့ကြသည်။