ထိုင်းနိုင်ငံ ချင်းမိုင်မြို့တွင် ရောက်ရှိနေသည့် မြန်မာနိုင်ငံသား အမျိုးသားတစ်ဦးသည် ရည်းစားဟောင်းကို ဓားထောက်ပြီး ဘတ်လေးထောင် လုယက်မှုဖြစ်ပွားခဲ့ကြောင်း Chiang Mai News သတင်းဌာနက ဖော်ပြသည်။

အဆိုပါအမျိုးသားကို ယမန်နေ့ (သြဂုတ် ၁၄ ရက်) ညနေ ၆ နာရီခန့်တွင် ချင်းမိုင်ခရိုင် San Pa Tong မြို့ San Klang ရပ်ကွက်ရှိ တည်းခိုခန်းတွင် ဖမ်းဆီးရမိခြင်း ဖြစ်သည်။

ပြစ်မှုကျူးလွန်သူ Mr. Sai Nor (စိုင်းနော်) သည် ရည်းစားဟောင်းကို သတိရ၍ သွားရောက်တွေ့ဆုံပြီး အတူနေရန် တောင်းဆိုခဲ့သော်လည်း ရည်းစားဖြစ်သူက ချစ်သူအသစ်ရနေပြီဖြစ်၍ ငြင်းဆိုခဲ့သည်။

ထို့နောက် စိုင်းနော်သည် ဒေါသထွက်ပြီး ကိုယ်ထိလက်ရောက်ကျူးလွန်ကာ ပိုက်ဆံလုယူထွက်ပြေးခဲ့ကြောင်း ဝန်ခံထွက်ခဲ့သည်ဟု Chiang Mai News သတင်း၌ ရေးသားဖော်ပြထားသည်။

အဆိုပါဖြစ်စဉ်မှာ (သြဂုတ် ၁၃ ရက်) နေ့လယ်ပိုင်းက ချင်းမိုင်မြို့ Si Phum ရပ်ကွက်ရှိ တည်းခိုးခန်းတွင် ဖြစ်ပွားခဲ့ခြင်း ဖြစ်သည်။

အသက် (၂၂) နှစ်အရွယ် စိုင်းနော် သည် ရည်းစားဟောင်းဖြစ်သူ အသက် (၁၉) နှစ်အရွယ် ယဉ်ဦး ထံမှ ဓားထောက်ပြီး ထိုင်းဘတ်ငွေ (၄,၀၀၀) လုယက်ပြီး ဆိုင်ကယ်ဖြင့် ထွက်ပြေးသွားခဲ့သည်။​
ဓားထောက်မှုကြောင့် ယဉ်ဦးသည် ဦးခေါင်း၊ မျက်နှာနှင့် ဘယ်ဘက် လက်မောင်းတို့တွင် ဓားဒဏ်ရာများဖြင့် ဒဏ်ရာရရှိခဲ့ကြောင်း Chiang Mai News သတင်းဌာနက ဖော်ပြထားသည်။

တရားခံ ထွက်ပြေးလွတ်မြောက်သွားကြောင်း သတင်းရရှိသဖြင့် ချင်းမိုင်မြို့မရဲစခန်းမှ စုံစမ်းစစ်ဆေးရေး အဖွဲ့က CCTV မှတ်တမ်းများကို စစ်ဆေးရာတွင် တရားခံမှာ ချင်းမိုင်ခရိုင် San Pa Tong မြို့ San Klang ရပ်ကွက် တွင် နေထိုင်သည့် အသက် (၂၂) နှစ်အရွယ် စိုင်းနာ် ဆိုသူ ဖြစ်ကြောင်း ဖော်ထုတ်နိုင်ခဲ့သည်ဟု သိရသည်။

ထို့နောက် ချင်းမိုင်တရားရုံးမှ ဝမ်းဝရမ်းထုတ်ပြီး တရားခံကို သွားရောက်ဖမ်းဆီးနိုင်ခဲ့ပြီး ပြစ်မူကျူးလွန်ရာတွင် အသုံးပြုခဲ့သော ဆိုင်ကယ်၊ ခရမ်းရောင် ပိုက်ဆံအိတ် ၁ လုံး၊ ငွေသား ၂,၅၀၀ ဘတ်နှင့် ပြစ်မှုကျူးလွန်စဉ်က ဝတ်ဆင်ခဲ့သည့် အဝတ်အစားများကိုလည်း သိမ်းဆည်းရမိခဲ့ကြောင်း Chiang Mai News က ဖော်ပြထားသည်။

လက်ရှိ စိုင်းနော် ကို လက်နက် (ဓား) ဖြင့် ခြိမ်းခြောက်လုယက်မှု၊ သူတစ်ပါးအား ကိုယ်စိတ်ဆင်းရဲအောင် ပြုလုပ်မှု၊ လက်နက်ကိုင်ဆောင်မှု စသည့် စွဲချက်များဖြင့် ချင်းမိုင်မြို့မရဲစခန်းသို့ လွဲပြောင်း ပေးအပ်ထားပြီး ဥပဒေအရ ဆက်လက် အရေးယူဆောင်ရွက်သွားမည်ဖြစ်ကြောင်း သိရသည်။