သျှမ်းပြည် တန့်ယန်းမြို့နယ်အတွင်း ဖမ်းဆီးရမိသည့် ကျားဖြန့်လုပ်ကိုင်သူ တရုတ်နိုင်ငံသား (၆၆) ဦးတို့ကို ‘ဝ’တပ်ဖွဲ့ UWSA မှ တရုတ်နိုင်ငံသို့ လွှဲပြောင်းပေးအပ်ခဲ့ကြောင်း သတင်းသိရသည်။

ဇူလိုင်လ (၁) ရက်တွင် ‘ဝ’ပြည်သွေးစည်းညီညွတ်ရေးတပ်မတော် UWSA ဝင်ရောက်တပ်စွဲထားသည့် တန့်ယန်းမြို့နယ်အတွင်း ဖမ်းဆီးရမိသော အွန်လိုင်းကျားဖြန့် လုပ်ကိုင်သူ တရုတ်နိုင်ငံသား (၆၆) ဦးတို့ကို ပန်ဝိုင်မြို့နယ်ရှိ တရုတ်-မြန်မာ နယ်စပ်ဂိတ်မှတဆင့် တရုတ်ရဲတပ်ဖွဲ့ထံ လွှဲပြောင်းပေးခဲ့ကြောင်း UWSA မှ သတင်းထုတ်ပြန်သည်။

တန့်ယန်းမြို့နယ်အတွင်း ‘ဝ’တပ်သားများမှ ကင်းလှည့်နေစဉ် ပုံမှန်မဟုတ်သည့် အခြေအနေကို တွေ့ရှိခဲ့ပြီးနောက် အသေးစိတ် စုံစမ်းစစ်ဆေးမှုနှင့် အထောက်အထားများ စုဆောင်းကာ ၎င်းကျားဖြန့်လုပ်ကိုင်သူများကို ဖမ်းဆီးနိုင်ခဲ့ကြောင်း UWSA ထုတ်ပြန်ချက်တွင် ရေးသားထားသည်။

UWSA မှ တန့်ယန်းမြို့နယ်တွင် တတိယအကြိမ် ကျားဖြန့်ဖမ်းဆီးမှုအတွင်း ဖမ်းမိခဲ့သည့် မိုဘိုင်းလ်ဖုန်း၊ ကွန်ပျူတာနှင့် အခြားဆက်စပ် ပစ္စည်းများကို တရုတ်ရဲတပ်ဖွဲ့ထံ တပါတည်း လွှဲပြောင်းပေးအပ်ခဲ့ကြောင်း ထုတ်ပြန်ချက်အရ သိရသည်။

အလားတူ ယမန်နှစ် ၂၀၂၄ နိုဝင်ဘာတွင်လည်း UWSA မှ တန့်ယန်းမြို့နယ်အတွင်း ဖမ်းဆီးရမိခဲ့သည့် ကျားဖြန့်လုပ်ကိုင်သူ တရုတ်နိုင်ငံသား (၇၆၂) ဦးတို့ကို ပန်ဝိုင်မြို့ရှိ တရုတ်-မြန်မာ နယ်စပ်ဂိတ်တွင် လွှဲပြောင်းပေးခဲ့သည်။

စစ်ကောင်စီ ထိန်းချုပ်ထားနိုင်သည့် တန့်ယန်းနှင့် မိုင်းရယ်မြို့နယ်တို့တွင် ‘ဝ’တပ်ဖွဲ့ UWSA ၊ သျှမ်းတပ် SSPP/SSA နှင့် ကိုးကန့်တပ် MNDAA တို့လည်း တပ်စွဲထားပြီး ပြည်သူ့စစ်ထိန်းချုပ် နယ်မြေအတွင်း ရွှေ့ပြောင်းလုပ်ကိုင်နေသည့် ကျားဖြန့်ရုံ အများအပြား ကျန်ရှိနေသေးကြောင်း ဒေသခံများက ပြောသည်။

ပြီးခဲ့သည့် ဇွန်လ ၂၄ ရက်တွင် မိုင်းလားတပ်ဖွဲ့ NDAA နှင့် စစ်ကောင်စီတို့ ပူးတွဲထိန်းချုပ်ထားသည့် မိုင်းလားမြို့ တာလော့နယ်စပ်ဂိတ်မှတဆင့် ကျားဖြန့်လုပ်ကိုင်သူ တရုတ်နိုင်ငံသား (၂၀၇) ဦးကို တရုတ်နိုင်ငံသို့ လွှဲပြောင်းပေးခဲ့ကြောင်း စစ်ကောင်စီဘက်မှ ဇွန်လ ၂၉ ရက်တွင် သတင်းထုတ်ပြန်ထားသည်။