ဝေးလံသည့်ဒေသ မီးရရှိဖို့ အီတလီ နိုင်ငံမှ အတိုးမဲ့ချေးငွေ ယူရို ၃၀ သန်း ရယူမည်ဟုဆို

မဟာဓာတ်လိုင်းအား ပြင်ပအမျိုးသား လျှပ်စစ်ဓာတ်အားရရှိ စီမံကိန်း (NEP- ID) အကောင်အထည်ဖော် ဆောင် ရွက်ရန် အတွက်အီတလီ နိုင်ငံမှ အတိုးမဲ့ ချေးငွေ ယူရို ၃၀ သန်း ရယူရန် အတွက် ယမန်နေ့ ( သြဂုတ် ၁) ရက် နေ့တွင် ပြည်ထောင်စုလွှတ်တော်အစည်းအဝေးတွင် ဆွေးနွေးခဲ့ကြသည်။

အီတလီ ချေးငွေ နှင့် လျှပ်စစ်မီး လက်လှမ်းမီမှုနည်းပါးပြီး လမ်းပန်းဆက်သွယ်ရေး ခက်ခဲသည့် ချင်းပြည်နယ်နှင့် အနီးတစ်ဝိုက်ရှိ ပြည်နယ် တိုင်းဒေသကြီးများအတွင်း ဆောင်ရွက်သွားမည် ဖြစ်ကြောင်း စိုက်ပျိုုးရေး၊ မွေးမြူရေး နှင့် ဆည်မြောင်း ဝန်ကြီးဌာန ပြည်ထောင်စု အောင်သူ နှင့် စီမံကိန်း နှင့် ဘဏ္ဍာရေး ဝန်ကြီး ဌာ ဒုတိယ ဝန်ကြီး ဦးမောင်မောင်ဝင်း တို့က လွှတ်တော်သို့ရှင်းလင်တင်ပြခဲ့သည်။

၂၀၃၀ တွင် တစ်နိုင်ငံလုံး လျှပ်စစ်မီး ရရှိရေး ဆောင်ရွက်နေသည့် မြန်မာနိုင်ငံ အစိုးရ၏ ကာလတို ရည်မှန်း ချက်အရ ၂၀၂၀ – ၂၁ ဘဏ္ဍာနှစ်တွင် ကျေးရွာပေါင်း ၉၈၀၀ ခန် ့ကို မီးပေး နိုင်မည်ဟု မျှော်မှန်းထားကြောင်း ဒေါက်တာအောင်သူက ပြောဆိုခဲ့သည်။

နောက်ထပ် ၁၅ နှစ် အတွင်း မဟာဓာတ်အားလိုင်း မ ရောက်ရှိနိုင်သည့်နေရာ ၊ မဟာဓာတ်အားလိုင်း နှင့် ၁၀ မိုင် အထက် ဝေးကွာသည့်ဒေသများ၊ သွားလာဆက်သွယ်မှုခက်ခဲပြီး ဝေးလံ ခေါင်ဖျား သည့်ဒေသများ၊ အိမ်ခြေ နှင့် လူသူထူထပ်ပြီး ပြည်သူ မှ ၁၀ ရာခိုင်နှုန်း ထည့်သည့် ရွေးချယ်မှုများပေါ် အခြေခံပြီး ကျေးရွာများကို ရွေးချယ်ဆောင်ရွက်သွားမည် ဖြစ်ကြောင်း သိရသည်။

မဟာဓာတ်အားလိုင်း ပြင်ပအမျိုးသား လျှပ်စစ်ဓာတ်အား ရရှိရေးစီမံကိန်း ဆောင်ရွက်ရန်အတွက် အီတလီနိုင်ငံမှ အတိုးမဲ့ ချေးငွေ Soft Loan ယူရိုငွေ သန်း ၃၀ ၏ စည်းကမ်းချက်များမှာ ဆိုင်းငံ့ကာလ ၁၈ နှစ်၊ ပြန်ဆပ်ကာလ ၁၀ နှစ်၊ စုစုပေါင်း ချေးငွေ သက်တမ်း ၂၈ နှစ် ဖြစ်ပြီး အတိုးပေးရန်မလိုဘဲ အရင်းငွေကို တစ်နှစ်လျှင် နှစ်ကြိမ် နှုန်းဖြင့် စုစုပေါင်း ၂၀ ကြိမ်ပေးဆပ်ရမှာ ဖြစ်ကြောင်း စီမံကိန်းနှင့် ဘဏ္ဍာရေး ၀န်ကြီးဌာန ဒုတိယ ၀န်ကြီး ဦးမောင်မောင်ဝင်းကလည်း ဆက်လက်တင်ပြခဲ့ပါသည်။

မြန်မာနိုင်ငံမှာ ကျေးရွာပေါင်း ၆ သောင်းကျော် ရှိသည့်အနက် မီးလင်းသည့် ကျေးရွာပေါင်း ၂ သောင်းခွဲ ခန့်သာရှိ ကြောင်း ကျန်ရှိသည့် ၃ သောင်းခွဲကျော်တွင် လျှပ်စစ်မီး မရရှိသေးကြောင်း ပြည်ထောင်စုဝန်ကြီးက ပြောဆိုသည်။

ကမ္ဘာ့ဘဏ်၏ ကွင်းဆင်းလေ့လာမှုများ အရ မြန်မာနိုင်ငံအတွင်း ရ၀ ရာခိုင်နှုန်းရှိ အိမ်ထောင်စုများသည် တရက်လျှင် အနည်းဆုံး လျှပ်စစ်မီး ၂ နာရီခန့်သာ အသုံးပြုနေရပြီး ရ၀ ရာခိုင်နှုန်းသောအိမ်ထောင်စုများမှ ၃၀ ရာခိုင်နှုန်းသည် မဟာဓာတ်အားလိုင်းပြင်ပမှ လျှပ်စစ်မီးရရှိနေကြခြင်းဖြစ်ကြောင်း သိရသည်။

ကမ္ဘာ့ကုလသမဂ္ဂက အတည်ပြုထားသည့် သက္ကရာဇ် ၂၀၃၀ တွင် လူတိုင်း လက်လှမ်းမီပြီး ယုံကြည် စိတ်ချ ရေရှည်တည်တံ့မည့် ခေတ်မီ စွမ်းအင် ရရှိရေး အကောင်အထည်ဖော် ဆောင်ရွက်ရာတွင် တိုးတက် အောင်မြင် မှုများကို အကဲဖြတ် မှတ်တမ်းတင်နိုင်ရန် ၂၀၁၇ ခုနှစ်၌ မြန်မာနိုင်ငံအပါအဝင် ၁၅ နိုင်ငံတို့တွင် ကမ္ဘာ့ဘဏ်က ကွင်းဆင်း သုတေသနပြုခဲ့သည်။