သျှမ်းပြည်တောင်ပိုင်း လွိုင်လင်ခရိုင် နမ့်စန်မြို့နယ် ရလခတိုင်းရုံးစိုက်ရာ ခိုလမ်မြို့နယ်ခွဲရှိ အမှတ် ၆၆ ခြေလျင်တပ်ရင်းမှ တောင်သူ ၄၇ ဦး ကို တရားစွဲဆို ထားကြောင်း စုံစမ်းသိရသည်။

အမှတ် ၆၆ ခြေလျင်တပ်ရင်း သည် တောင်သူ ၆၄ ဦး ပိုင်ဆိုင်ထားသည့် မြေဧက (၁၃၅၃.၃၃ )ဧက ကို သိမ်းဆည်းခဲ့ပြီး ဇွန် ၉ ရက်နေ့က တောင်သူ ၄၇ ဦး ကို နမ့်စန်မြို့နယ် တရားရုံးမှာ တရားဆို ထားသည်။

“ တပ်သိမ်းမြေတွေကို ပိုင်တာက တောင်သူ ၆၄ဦးပါ။ တရားစွဲဆိုခံရတာက ၄၇ဦးရှိပါတယ်” ဟု မြေသိမ်းခံရသည့် တောင်သူ ဦးလှထွန်းက သျှမ်းသံတော်ဆင့် ကို ပြောသည်။

အဆိုပါ မြေပေါ်တွင် တောင်သူများ နှစ်ပေါင်း ၄၀ ကျော် စိုက်ပျိုးလုပ်ကိုင်လာခဲ့ပြီး၊ ၂၀၁၉ ခုနစ် ၈ လပိုင်း တွင်မူ တပ်ပိုင်မြေ ဖြစ်ကြောင်း ကနဦးပိုင်ရှင်မှ လက်မှတ်ရေးထိုးပေးရန် အတွက် အထွေထွေ အုပ်ချုပ်ရေးရုံး မှတဆင့် အစည်းအဝေးခေါ်ယူခဲ့ကြောင်း ဦးလှထွန်း က ပြောပြသည်။

“တပ်မြေကိုကျူးကျော်စိုက်နေတယ်လို့ပြောတယ်။ လက်မှတ်ထိုးပေးပေါ့။ လောဆယ် လုပ်စားလို့ရသေးတယ်။ နောက် နိုင်ငံတော် က လုပ်စရာရှိရင် ဖယ်ခိုင်းမယ်။ ကျနော်တို့ တယောက်မှ လက်မှတ်မထိုးသေးဘူး” ဟု ဦးလှထွန်းက ဆိုသည်။

တပ်မှ တောင်သူများကို ၄ကြိမ်တိုင်တိုင်တွေ့ဆုံပြီး လက်မှတ်ထိုးခိုင်းသော်လည်း တောင်သူများက လက်မှတ်မထိုးပေးခဲ့ကြောင်း၊ အစည်းအဝေး ခေါ်ယူရာတွင်လည်း တကြိမ်နှင့် တကြိမ် အစည်းအဝေးလာတက်သူများမတူကြကြောင်း၊ နောက်ဆုံး ခေါ်ယူသည့် ၄ ကြိမ်မြောက် အစည်းအဝေးလာတက်သည့် တောင်သူ ၄၇ ဦးကို တပ်က ပုဒ်မ ၄၄၇ဖြင့် အမှုဖွင့် တရားစွဲဆိုလိုက်ကြောင်း သိရသည်။

“ ကျနော်တို့၄ ကြိမ်စလုံး လုံးဝ လက်မှတ်မထိုးတော့ သူတို့အမှုဖွင့်လိုက်တာပဲ” ဟု မြေသိမ်းခံရသည့် တောင်သူ ဦးလှထွန်းကပြောသည်။

တပ်သိမ်းမြေပေါ်တွင် တောင်သူများနေ့စဉ် စိုက်ပျိုးရေးလုပ်နေရာ ထိုသို့တပ်မှလာရောက် ဟန့်တားသည့်အပေါ် လက်ရှိတောင်သူများအတွက် အခက်အခဲများစွာ ရင်ဆိုင်ကြုံတွေ့နေရကြောင်း လည်း မြေယာသိမ်းဆည်းခံရသည့် တောင်သူများက ပြောဆိုလိုက်သည်။

“ ကျနော်တို့ ရှေ့နေရှာပြီး အမှုရင်ဆိုင်သွားမယ်” ဟု အမည်မဖော်လိုသည့် တောင်သူ တဦးက ပြောသည်။

ခိုလမ်မြို့ နယ် ရှိ တောင်သူ ၄၇ဦးကို တပ်မှ တရားစွဲဆိုသည့် ကိစ္စနှင့် ပတ်သက်ပြီး သျှမ်းသံတော်ဆင့်မှ ခိုလမ်မြို့နယ်ခွဲရှိ အုပ်ချုပ်ရေးမှူးနှင့် တပ်ကို ကြိုးစားဆက်သွယ်ခဲ့သော်လည်း မရရှိခဲ့ပေ။

သျှမ်းပြည်တောင်ပိုင်း ဆီဆိုင်မြို့နယ် တွင်လည်း မေလနှောင်းပိုင်း တွင် အစိုးရ တပ်နှင့် ဆီဆိုင်မြို့နယ်ကျေးရွာ ၅ရွာ မှတောင်သူများမြေယာ အငြင်းပွားမှု ဖြစ်ပွားကာ အစိုးရ တပ်မှ ဒေသခံတောင်သူ ၇၀ ကျော် ကို တရားစွဲဆိုထားသည်။

အစိုးရတပ် မြေယာ သိမ်းမှုသည် ယခုရက်ပိုင်း သျှမ်းတောင်ပိုင်းသာမက သျှမ်းပြည်မြောက်ပိုင်း တွင်လည်း သိမ်းဆည်းမှုများရှိနေသဖြင့် သျှမ်းပြည်သူများလည်း စိုးရိမ်ပူပန်မှုဖြစ်ပွားနေသည်။