လေပြင်းတိုက်ခိုက်မှုကြောင့် ပျက်စီးဆုံးရှုံးသွားသည့် သျှမ်းပြည်တောင်ပိုင်း နမ့်စန်မြို့နယ် အတွင်းရှိ နေအိမ်များကို သျှမ်းပြည်အစိုးရမှ ထောက်ပံ့မှု ပြုလုပ်သွားမည် ဖြစ်ကြောင်း သိရသည်။
မေလ ၁၀ ရက် က လေပြင်းမုန်တိုင်း တိုက်ခိုက်ခြင်းခံရသည့် နမ့်စန်မြို့နယ် ရှိ ကျေးရွာ ၅ ရွာ အတွင်းရှိ အိမ်ခြေ ၁၅၂ လုံး ကို သျှမ်းပြည် အစိုးရ က ကူညီထောက်ပံ့ပေးသွားမည် ဟု ဗမာတိုင်းရင်းသားရေးရာ ဝန်ကြီး ဒေါက်တာအောင်သန်းမောင် က သျှမ်းသံတော်ဆင့် ကိုပြောသည်။
“အခု ထောက်ပံ့ဖို့ နမ့်စန်ရောက်နေပီ။ အခုပဲ အဲ့ဒီရွာတွေကို ဆက်သွားနေပီ။ တစ်အိမ်က လုံးဝ ပြိုသွားတယ်။ အဲ့ပြိုတဲ့အိမ်က ပစ္စည်း ၁၇ မျိုးပါတဲ့ ပုံးတစ်ပုံးရယ် ဆန် ၅ ရက်စာရယ်။ ငွေ တစ်သိန်း ထောက်ပံ့မယ်။ ဒါက ဆရာတို့ ဘေး /စီမံက ထောက်ပံ့တာ။ သျှမ်းပြည်နယ် အစိုးရကလည်း ငွေကြေးထောက်ပံ့တယ်” ဟု ဗမာတိုင်းရင်းသား ရေးရာ ဝန်ကြီး ဒေါက်တာအောင်သန်းမောင် ကပြောသည်။
လေပြင်းတိုက်ခိုက်မှုကြောင့် ဘာသာရေးဆိုင်ရာ အဆောက်အအုံ ဖြစ်သည့် ဘုန်းကြီးကျောင်း ၃ ကျောင်း နှင့် ခရစ်ယာန်ကျောင်း ၂ ကျောင်း ကို တကျောင်းလျှင် ကျပ်ငွေ တသိန်းစီ ထောက်ပံ့သွား မည်ဖြစ်ကြောင်း သိရသည်။
“နောက်တစ်ခုက ၁ သိန်း အထက်ပေါ့နော် ပစ္စည်းဆုံးရှုံးမှု တန်ဖိုး တစ်သိန်း အထက်က ၅၆ အိမ် ရှိတယ်။ ၁ သိန်း အထက်က ၉ သောင်း ထောက်ပံ့မယ်။ သျှမ်းပြည်နယ်အစိုးရက တစ်အိမ်ကို ၅ သောင်း ထောက်ပံ့မယ်” ဟု ဒေါက်တာအောင်သန်းမောင် ကပြောသည်။
အခြားပျက်စီး ဆုံးရှုံးသည့် နေအိမ်တွင်လည်း သျှမ်းပြည်အစိုးရ ၏ သဘာဝဘေးအန္တရာယ် စီမံကိန်းမှ အနည်းအများ ဆက်လက် ထောက်ပံ့သွားမည်ဖြစ်ကြောင်း သိရသည်။
