သျှမ်းပြည် အရှေ့ပိုင်း မိုင်းခတ်မြို့နယ် ဝမ်အွန်ကျေးရွာ အုပ်စု အတွင်း အဲန် တိုင်းရင်းသားနေထိုင်သည့် ကျေးရွာ မီးလောင်မှု ဖြစ်ပွားကာ စားဝတ်နေရေး အတွက် အခက်အခဲ ရှိနေကြာင်း သတင်းရရှိသည်။
ဖြစ်စဉ်မှာ ဖေဖော်ဝါရီ ၁၂ရက်တွင် မိုင်းခတ်မြို့နယ် ဝမ်အွန်ကျေးရွာ အုပ်စုရှိ အန်ဝမ်မတ်ကျေးရွာ တွင် မီးလောင်မှု ဖြစ်ပွား ကာ အိမ်ခြေ ၆၀ ကျော် ပျက်စီး ဆုံးရှုံးခဲ့ပြီး၊ လက်ရှိမှာ အဝတ်အစား၊ လူသုံးကုန် ပစ္စည်းများနှင့်ဆေးဝါးများ လိုအပ်နေကြောင်း မီးလောင်သွားသည့်နေရာကို လိုက်လံ ကူညီပေးနေသည့် နန်းနွမ်းခမ်း က သျှမ်းသံတော်ဆင့် သို့ပြောသည်။
“ သက်ဆိုင်ရာက တော့ ကူညီပေးပါတယ်။ ဒီချိန်က အေးတဲ့ အချိန်ဆိုတော့ အိပ်ယာတွေ၊အဝတ်အစားတွေ ဆေးဝါးတွေ လိုအပ်နေသေးတယ်” ဟု နန်းနွမ်းခမ်း က ဆိုသည်။
ထိုမီးလောင်မှုကြောင့် အိမ်ခြေ ၆၀ကျော် လူဦးရေ ၃၆၀ကျော် အိုးမဲ့ အိမ်မဲ့ ဖြစ်နေကြောင်း နန်းနွမ်းခမ်း ကပြောသည်။
လက်ရှိမှာ နေအိမ်မှာ မီးလောင် ပျက်စီးသွားမှုကြောင့် တဲများ ဆောက်ကာ နေနေရကြောင်း၊ သက်ဆိုင်ရာမှ နေအိမ်များ ပြန်ဆောက်ပေးရန် စီစဉ်နေကြောင်းလည်း နန်းနွမ်းခမ်းက ပြောပြသည်။
ဝမ်အွန်ကျေးရွာ အုပ်စု သည် မိုင်းခတ်မြို့ မှ သွားပါက ၁နာရီ ခန့် ကားမောင်းရသည်။
အဲန်လူမျိုးများသည် အဝတ်အစား အနက်ရောင် ကို သာ ဝတ်ဆင်ကြသည့် လူမျိုးများဖြစ်သည့်အတွက် လက်ရှိမှာ သာမာန် ဝတ်နေသည့် အင်္ကျ ီထက် ပိတ်စ အနက်ရောင် ကို လိုအပ်နေကြောင်း သိရသည်။
