သျှမ်းပြည် တောင်ပိုင်း နမ့်စန်မြို့နယ် အတွင်း မြန်မာ့ တပ်မတော် မှ ဖမ်းဆီးသွားသည့် သျှမ်းပြည် ပြန်လည် ထူးထောင်ရေး ကောင်စီ (RCSS/SSA) အဖွဲ့ဝင် ၂ဦး ယနေ့ ထိတိုင် မလွှတ်သေးကြောင်း သတင်းရရှိသည်။
ဖြစ်စဉ်မှာ ဒီဇင်ဘာ ၁၉ ရက် တွင် နမ့်စန်မြီု့နယ် နားပွဲကျေးရွာ ၌ ပြုလုပ်သည့် လူထု အစည်းအဝေး ပွဲ သို့ RCSS မှ အဖွဲ့ဝင် ၂ဦးသည် အရပ်ဝတ်ဖြင့် တက်ရောက်လာစဉ် ဖမ်းဆီးလိုက်ရခြင်း ဖြစ်သည် ဟု RCSS မှ ဒုတိယ ဗိုလ်မှူးကြီး စိုင်းဦး က သျှမ်းသံတော်ဆင့် သို့ပြောသည်။
“ အခုထိတော့ မလွှတ်သေးဘူး။ သူတို့ကို ရဲစခန်း အပ်ထားတယ်။ တရားစွဲဆိုသွားမယ်လို့ ကြားရတယ်” ဟု ဒုတိယ ဗိုလ်မှူးကြီး စိုင်းဦး က ဆိုသည်။
အဆိုပါ ဖမ်းဆီးခံရသည့် RCSS အဖွဲ့ဝင် ၂ဦးသည် လက်နက်မပါဘဲ အရပ်ဝတ်ဖြင့် လူထု အစည်းအဝေး ပွဲသို့ သွားနားထောင်ကြပြီး၊ မြန်မာ့တပ်မတော် က ထို သူ ၂ဦး ၏ လက်ကိုင်ဖုန်းကို ယူပြီးစစ်ဆေးသည့်အခါ စစ်ဝတ်စုံဖြင့် ဝတ်ထားသည်ကို တွေ့မြင်သွားသဖြင့် ဖမ်းဆီးသွားခြင်းဖြစ်ကြောင်း လည်း ဒုတိယ ဗိုလ်မှူးကြီး စိုင်းဦး က ပြောသည်။
“ စစ်ဝတ်စုံ ဝတ်ထားတဲ့ပုံမြင်တော့ သူတို့ကို ကားပေါ်ခေါ်တင်ပြီး ရွာထဲကို ခေါ်သွားသေးတယ်။ သတို့ သွားဖူးတဲ့အိမ်၊ အိပ်ဖူးတဲ့အိမ်တွေကိုလည်း စစ်ဆေးသေးတယ်” ဟု ဒုတိယ ဗိုလ်မှူးကြီး စိုင်းဦး က ဆိုသည်။
လက်ရှိမှာ မြန်မာ့တပ်မတော် မှ ဖမ်းဆီးထားသည့် RCSSတပ်ဖွဲ့ဝင် ၂ဦး ပြန်လွှတ်ရန် အတွက် တပ်မတော် ထံ တင်တောင်းဆိုထားပြီး၊ တပ်မတော် နှင့် တွေ့ဆုံရန် လည်း တောင်ဆိုထားကြောင်းလည်း ဒုတိယ ဗိုလ်မှူးကြီး စိုင်းဦး က ဆိုသည်။
ဇန်နဝါရီ ၈ ရက်တွင် နေပြည်တော်တွင် ကျင်းပ သည့် JICM အစည်းအဝေး ကို တက်ရောက်သည့် RCSS ဗိုလ်ချုလ်ကြီး ယွက်စစ် သည် မြန်မာ့ တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် နှင့် သီးသန့် တွေ့ဆုံရန် ကြိုးစားခဲ့သော်လည်းမရရှိခဲ့ကြောင်း သတင်းရရှိသည်။
RCSSတပ်ဖွဲ့ဝင် ၂ဦး ကိစ္စ နှင့် ပတ်သက်ပြီး သျှမ်းသံတော်ဆင့် က တပ်မတော် သတင်းမှန် ပြန်ကြားရေး အဖွဲ့ ပြောရေးဆိုခွင့် ရှိသူ ဗိုလ်မှူးချုပ် ဇော်မင်းထွန်းကို ဖုန်းဆက်မေးမြန်းရန် ကြိုးပမ်းခဲ့သော်လည်း မရရှိခဲ့ပေ။
RCSS သည် တနိုင်ငံလုံး အပစ်ခတ်ရပ်စဲရေး သဘောတူစာချုပ် ( NCA) လက်မှတ်ရေးထိုးထားသည့် တိုင်းရင်းသားလက်နက်ကိုင် တပ်ဖွဲ့ဖြစ်သည်။
Leave a Comments