မြန်မာနိုင်ငံလုံး ဆိုင်ရာ သျှမ်းလူငယ်များ(TYN) တွေ့ဆုံ နှီးနှော ဖလှယ်ပွဲ စတုတ္ထကြိမ် ကို ဒီဇင်ဘာ လကုန်တွင် ကျင်းပမည် ဟု သတင်းရရှိသည်။

အဆိုပါ သျှမ်းလူငယ်များ တွေ့ဆုံ နှီးနှော ဖလှယ်ပွဲကို သျှမ်းပြည် တောင်ပိုင်း တောင်ကြီးမြို့နယ် ပုံးအင်းဒေသ တုန်မုံးရွာ တွင် ကျင်းပ မည် ဟု မြန်မာနိုင်ငံလုံးဆိုင်ရာ သျှမ်းလူငယ်များအဖွဲ့မှ ကော်မတီ အဖွဲ့ဝင် စိုင်းနော်ဆိုင် က သျှမ်းသံတော်ဆင့် ပြောသည်။

TYN တွေ့ဆုံနှီးနှော ဖလှယ်ပွဲကို ၂နှစ်တကြိမ် ကျင်းပလာခဲ့သည်မှာ ယခုသည် စတုတ္ထကြိမ်မြောက်ဖြစ်ကြောင်း သိရသည်။

“ ကျနော်တို့ TYN တွေ့ဆုံနှီးနှော ဖလှယ်ပွဲ လုပ်လာတာ ၄ကြိမ်မြောက်ပါ။ ဒီတခါမှာတော့ကျနော်တို့ သျှမ်းပြည် ရင်းနှီးမြှပ်နှံမှု တွေကိစ္စ BRI ကိစ္စတွေ သျှမ်းလူငယ်တွေ သိအောင် ပြောပြမယ်။ ဆွေးနွေးကြမယ်” စိုင်းနော်ဆိုင် က ဆိုသည်။

ဆက်လက်ပြီး TYN စတုတ္ထကြိမ်မြောက် တွင် ကော်မတီ အဖွဲ့ဝင်များ ပြန်လည်ရွေးကောက်မည်ဖြစ်ပြီး၊ တွေ့ဆုံပွဲကို ဒီဇင်ဘာ ၂၇ ရက်မှ ၂၉ ရက်ထိ ၃ရက်ကျင်းပမည် ဖြစ်ကြောင်း စိုင်းနော်ဆိုင် က ပြောသည်။

“ ကျနော်တို့တွေ့ဆုံပွဲ အတွက် သျှမ်းလူငယ် ၃၀၀ နဲ့ ၅၀၀ ကြား ခန့်မှန်းထားပါတယ်” ဟု စိုင်းနော်ဆိုင် က ပြောသည်။

TYN ဖွဲ့စည်းလာပြီး နောက်ပိုင်း သျှမ်းလူငယ် များသည် မိမိ လူမျိုးအသိုင်းအဝန်း ကို ယခင်ကထက် ပိုပြီး ပါဝင် လုပ်ဆောင်လာကြောင်း၊ နယ်ပယ် အသီးသီးတွင် ဦးဆောင်လာနိုင်ကြောင်း၊ နိုင်ငံရေး ကိုလည်း ပိုပြီး သိလာကြကြောင်း စိုင်းနော်ဆိုင် က ထပ်လောင်းပြောပြသည်။

TYN တွေ့ဆုံ နှီးနှော ဖလှယ်ပွဲကို ၂၀၁၃ ခုနစ်နှင့်၂၀၁၅ ခုနစ်တို့တွင် မန္တလေး နှင့် ၂၀၁၇ ခုနစ်တွင် ပဲခူးတိုင်း ကျောက်တံခါး မြို့နယ် တောကျွဲအင်းကျေးရွာ တွင် ပြုလုပ်ခဲ့ကြောင်း သိရသည်။