နေပြည်တော်တွင် ကျင်းပသည့် တနိုင်ငံလုံး ပစ်ခတ်တိုက်ခိုက်မှု ရပ်စဲရေး NCA ၄နှစ်ပြည့် အခမ်းအနားသို့ သျှမ်းပြည်တပ်မတော် RCSS/SSA အဖွဲ့ဝင်များ တက်ရောက်ခြင်းမရှိကြောင်း သိရသည်။

သျှမ်းပြည်တပ်မတော် RCSS/SSA သည် ၂၀၁၅ ခုနှစ် အောက်တိုဘာ ၁၅ ရက်နေ့တွင် NCA လက်မှတ်ထိုးထားသည့် အဖွဲ့ဝင် တဖွဲ့ဖြစ်သည်။

RCSS/SSA ခေါင်းဆောင် ဗိုလ်ချုပ်ကြီး ယွက်စစ် သည် အောက်တိုဘာ ၂၈ ရက်နေ့ နေပြည်တော်တွင် ကျင်းပမည့် NCA ၄နှစ်ပြည့်အခမ်းအနားတက်ရောက်ရန်ို RCSS/SSA ဌာနချုပ် လွိုင်တိုင်းလျဲန်းမှ ဟိုမိန်း- လင်းခေး- တောင်ကြီး ဘက် ကားဖြင့်သွားမည် ကို အရှေ့ အလယ်ပိုင်းတိုင်း စစ်ဌာနချုပ် (ရလခ) တိုင်းမှ ခွင့်မပြုသဖြင့် အခမ်းအနား တက်ရောက်နိုင်ခြင်းမရှိပေ။

“ RCSS/SSA ဖက်က မတက်ဘူး။ အားလုံး ပြန်လာပြီ။ ဒီလိုသာထပ်သွားမယ်ဆိုရင်တော့ သူတို့ချမှတ်ထားတဲ့လုပ်ငန်းစဉ်အတိုင်းတည်ဆောက်မယ့် ပြည်ထောင်စုကြီးက ဖြစ်လာဖို့ မရှိဘူးလို့တော့မပြောချင်ဘူး။ ဒါပေမယ့် လွဲသွားတယ်လို့ ပြောချင်တယ်။ လမ်းပေါ်ပြန်ရောက်အောင် ၊ ငြိမ်းချမ်းရေးအမြန်ရရှိအောင်တိုးတက်မှုရှိအောင်တော့ ကျနော်တို့ ၀ုိင်းဝန်းလုပ်ဆောင်သွားရမယ်။ တကယ်လို့ ကြိုးစားမှုမရှိရင်တော့ ၂၀၂၀ နောက်ပိုင်း အစိုးရအသစ်ရှိလာရင် ဘာဆက်ဖြစ်လာမလဲ ဆိုတာကျနော်တို့မသိနိုင်ဘူး။ ” RCSS/SSA အတိုင်ပင်ခံပုဂ္ဂိုလ် ဦးခွန်စိုင်း က ပြောသည်။

အဆိုပါပြသနာသည် အစိုးရ တပ်မတော် နှင့် RCSS/SSA ကြားပြသနာသာမဟုတ်ဘဲ ပြည်ထောင်စုတိုင်းရင်းသားအားလုံး၏ ပြသနာဖြစ်နေသဖြင့် နိုင်ငံသားအားလုံးမှ ကူညီညှိနှိုင်း ပေးရန် လိုအပ်ကြောင်း ဦးခွန်စိုင်း က ပြောသည်။

NCA အခမ်းအနား တက်ရောက်ခြင်း မရှိသည့်အတွက် နောက်ဆက် ကျင်းပမည့် NCA အကောင်အထည် ဖော်မှုဆိုင်ရာ ညှိနှိုင်းအစည်းအဝေး (JICM) ကိုလည်း တက်ရောက်မည်မဟုတ်ကြောင်း RCSS/SSA ဥက္ကဌ ဗိုလ်ချုပ်ကြီး ယွက်စစ် က အောက်တိုဘာ ၂၇ ရက်နေ့ မီဒီယာများတွေ့ဆုံစဉ် တွင် ပြောကြားခဲ့သည်။

ထို့ကြောင့် ယနေ့ကျင်းပမည့် NCA ၄နှစ်ပြည့်တွင် NCA လက်မှတ်ထိုးထားသည့် တိုင်းရင်းသား လက်နက်ကိုင် ၉ ဖွဲ့ သာ တက်ရောက်ကြောင်း သိရသည်။