သျှမ်းပြည် မြောက်ပိုင်း ကျောက်မဲခရိုင်တွင် မြို့ရှောင်လမ်း နှင့် အသစ်တည်ဆောက်မည့် ဂုတ်ထိပ် တံတား သစ်အတွက် နစ်နာဆုံးရှုံးခဲ့ရသည့် လယ်ယာမြေများအတွက် လျော်ကြေး ၉၅ ရာခိုင်နှုန်း ပေးပြီးဖြစ်ကြောင်း သတင်းရရှိသည်။
Photo credit to Picgra : နောင်ချိုနှင့်ကျောက်မဲကြား ဂုတ်တွင်းလမ်း
“ မနေ့က အစည်းအဝေးလုပ်တယ်။ နောင်ချိုက ၉ ယောက် လက်မှတ်ထိုးတယ်။ ကျောက်မဲ က ၁၀ ယောက် လက်မှတ်ထိုးတယ်။ နစ်နာကြေး လက်ခံလိုက်တယ် ” ဟု နောင်ချို မြို့ သျှမ်းအမျိုးသား ဒီမိုကရေစီ အဖွဲ့ချုပ် မှ စိုင်းအောင်မိန်းက သျှမ်းသံတော်ဆင့်ကို ပြောသည်။
မြို့ရှောင်လမ်း နှင့် ဂုတ်ထိပ် တံတားသစ် တည်ဆောက်မှု အတွက် လျော်ကြေးငွေပေး ဆောင်ရန် လိုအပ်သည့် နောင်ချို မှ ၁၆ ဦးအနက် ၉ ဦးက မတ်လ ၂၆ ရက်နေ့ကလက်မှတ်ရေးထိုးပြီး၊ ကျောက်မဲမြို့ လယ်ယာမြေ နစ်နာ သူ ၁၁ ဦးအနက် ၁၀ ဦး လက်မှတ်ရေးထိုးကာ လျော်ကြေးငွေ လက်ခံခဲ့ကြကြောင်း စိုင်းအောင်မိန်းက ပြောပြသည်။
“ လောလောဆယ်တော့ နောင်ချိုက ၄ယောက်၊ ကျောက်မဲက ၁ ယောက်ပဲကျန်တော့တယ်။ နစ်နာကြေးတွေ မဆုံးရှုံးအောင် ကျနော်တို့ကြားခံကူညီပေးကြပါတယ်” ဟု စိုင်းအောင်မိန်းက ဆိုသည်။
လယ်ယာမြေ တဧက ကို ကျပ်သိန်း ၁၅၀ အစိုးရက လျော်ကြေးပေးဆောင်ပြီး လယ်ယာမြေ တွင် စိုက်ပျိုး ထားသည့် နှစ်ရှည် သီးနှံပင် လျော်ကြေးငွေ အတွက် ၃ဆ လျော်ပေးကြောင်း၊ တချို့ မြို့ နှင့် နီးစပ်သည့် မြေကိုလည်း စျေးပိုပေးကြောင်းလည်း စိုင်းအောင်မိန်းက ဆိုသည်။
ကျောက်မဲခရိုင် အတွင်း လမ်းသစ်ဖောက်ရန် အတွက် OHC (Oriental Highway Company) ကုမ္ပဏီ မှ တာဝန်ယူထားကြောင်းသိရသည်။
ဂုတ်တွင်း ရှောင်လမ်းဖောက်ရန် အတွက် ကျောက်မဲမြို့ နယ် ဒေသခံ များ၏ လယ်ယာမြေ ၁၆၉ ဧက၊ နောင်ချို မြို့ခံ များလယ်ယာမြေ ၃၂၉ ဧက၊ စုပေါင်း ၄၉၉ ဧကကို ပါ အသုံးပြုခဲ့ရကြောင်း ထို့အနက် ၃၆ ဧက မှာ အစိုးရ၏ လယ်ယာမြေ ပါဝင်နေကြောင်းသိရသည်။
