တရုတ်နိုင်ငံသည် မြန်မာနိုင်ငံ၏ အချုပ်အခြာအာဏာနှင့် နယ်မြေတံ့ခိုင်မြဲရေးကို လေးစားပြီး မည်သည့် အခြေအနေပြောင်းလဲမှုမျိုးတွင်မဆို တရုတ်နိုင်ငံ၏ မူဝါဒ ထာဝစဉ်မပြောင်းလဲကြောင်း မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျားက ပြောသည်။
ယနေ့ မေလ ၅ ရက် စစ်ကောင်စီလက်အောက်ခံ မြန်မာအလင်းသတင်းစာမှ ဖော်ပြသော တရုတ်သံအမတ်ကြီး မစ္စမာကျားရေးသားသည့် ဆောင်းပါးထဲတွင် ထိုကဲ့သို့ထည့်သွင်းပြောဆိုထားခြင်း ဖြစ်သည်။
တရုတ်နိုင်ငံသည် မြန်မာနိုင်ငံ မြောက်ပိုင်းဒေသ ငြိမ်းချမ်းရေးလုပ်ငန်းစဉ် မြှင့်တင်ရာတွင် မြန်မာနိုင်ငံအား တက်ကြွစွာ ကူညီပေးခဲ့ပြီး မြန်မာ့ငြိမ်းချမ်းရေး၊ တည်ငြိမ်ရေးနှင့် စီးပွားရေးစဉ်ဆက်မပြတ် ဖွံ့ဖြိုးတိုးတက်ရေး၊ ပြည်သူ့ကောင်းကျိုး သယ်ပိုးရေး စသည့်မူဝါဒများ ထာဝစဉ်မပြောင်းလဲကြောင်း ဆောင်းပါး၌ ရေးသားဖော်ပြခဲ့သည်။
ထို့ပြင် ငလျင်သည် ကမ္ဘာမြေကြီးကို အက်ကွဲစေခဲ့သော်လည်း တရုတ်-မြန်မာ ဆွေမျိုးပေါက်ဖော် ချစ်ကြည်ရေးကို ဖြတ်တောက်၍ မရသလို ကံကြမ္မာတူ၊ ဖေးမကူသော စိတ်ဓာတ်နှင့် ယုံကြည်မှုကိုလည်း မလှုပ်ခတ်နိုင်ကြောင်း ဆိုထားသည်။
တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) အနေဖြင့် တရုတ်အစိုးရ၏ ခြိမ်းခြောက်မှုနှင့် ဖိအားပေးမှုများ ခံနေရသည်ဟု ယမန်နေ့ မေလ ၄ ရက်တွင် တရားဝင်ပြောဆိုလာပြီးနောက် နေ့စဉ်သတင်းစာ၌ တရုတ်၏မူဝါဒအကြောင်း သံအမတ်ကြီး၏ ဆောင်းပါး ပါဝင်လာခြင်း ဖြစ်သည်။
တရုတ်အစိုးရကြားဝင်မှုကြောင့် ဧပြီလ ၁၉ ရက်နေ့မှစ၍ လားရှိုးမြို့တွင် စစ်ကောင်စီနှင့် အုပ်ချုပ်ရေး ယန္တရားအဖွဲ့များ ပြန်လည်ဝင်ရောက်လာပြီး ကိုးကန့်တပ် MNDAA တပ်ဖွဲ့များ ခုတ်ခွာပေးရသည်။
Leave a Comments