၂၀၂၀ ပါတီစုံရွေးကောက်ပွဲအတွက် ညီညွတ်သောဒီမိုကရက်တစ်ပါတီ (UDP) လူသိများသည့် နှင်းဆီပါတီ သည် ရွေးကောက်ပွဲကော်မရှင်မှ ဖျက်သိမ်းကြောင်း တရားဝင် ကြေငြာထားသော်လည်း လက်ရှိသက်ကြီးရွယ်အို နှင့်အစိုးရဝန်ထမ်းများကြိုတင်မဲပေးနေသော မဲစာရွက်များတွင် အဆိုပါ နှင်းဆီပါတီအမှတ်တံဆိပ်ပါနေသေးကြောင်း သိရသည်။
အောက်တိုဘာ ၁၇ ရက်က ပြည်ထောင်စု ရွေးကောက်ပွဲ ကော်မရှင် UEC က နှင်းဆီပါတီကို တရားဝင်ဖျက်သိမ်း လိုက်ကြောင်း ကြေညာချက် ထုတ်ပြန်ခဲ့သည်။
သို့သော် လက်ရှိကြိုတင်မဲပေးရာတွင် နှင်းဆီပါတီကို တရားဝင်ဖျက်သိမ်းထားသည့်အကြောင်း သက်ကြီးရွယ်အိုများအားလုံးမသိရှိရပေ။
၎င်းနှင့်ပတ်သက်ပြီး တချို့ မဲရုံရှေ့တွင် နှင်းဆီ ပါတီ သည် တရားဝင်ဖျက်သိမ်းထားသည့်ပါတီဖြစ်ကြောင်းကို ကြေညာထားသော်လည်း တချို့မဲရုံများမှာ ကြေညာထားခြင်းမရှိကြောင်း သိရသည်။
“နှင်းဆီပါတီ ဖြုတ်လိုက်ပြီးဆိုတာ မသိရဘူး။ အဖွားက အိမ်မှာဘဲနေနေရတော့ မသိဘူး။ ထင်ယောင်ထင်မှားတော့ မဖြစ်ပါဘူး။ ဒီပါတီ ဖြုတ်လိုက်ပြီးဆိုတာကိုတော့ မဲထည့်တဲ့အချိန်မှာတော့ ပြောပြပါတယ်” ဟု တောင်ကြီးမြို့ ရေအေးကွင်း တွင် ကြိုတင်မဲလာရောက်ပေးသည့် အသက် ၆၈ ဒေါ်နန်းသိန်းယဉ် က သျှမ်းသံတော်ဆင့်ကို ပြောသည်။
ကြိုတင်မဲပေးသည့် မဲရုံရှေ့တွင် ညီညွတ်သော ဒီမိုကရက်တစ်ပါတီ(UDP)ကို ဖျက်သိမ်းပြီးဖြစ်ကြောင်း၊ ယင်းပါတီ ကိုယ်စားပြုလွှတ်တော်ကိုယ်စားလှယ်လောင်းများကို ဆန္ဒပြုရန်မလိုကြောင်းနှင့် ဆန္ဒပြုခဲ့ပါလျှင် ပယ်မဲအဖြစ်သတ်မှတ်မည်ဖြစ်ကြောင်း မဲရုံတချို့ တွင် ကြေညာချက်ကိုကပ်ထားသည်။
ထိုလိုဂိုသည် မြို့နေပြည်သူအတွက် ပြဿနာ သိပ်မရှိသော်လည်း ကျေးလက်ပြည်သူများအတွက် ပြဿနာရှိလာနိုင်ကြောင်း၊ ထိုနေရာကို မဲသွားပေးမည်ကို စိုးရိမ်နေရကြောင်းလည်း တောင်ကြီးမြို့ တွင်နေထိုင်သည့် စိုင်းနော် က ဆိုသည်။
“ မြို့ပေါ်မဲဆန္ဒရှင်တွေက နှင်းဆီပါတီ ပယ်ဖျက်တာ သိတာများတယ်။ ကျေးရွာ လမ်းပန်းဆက်သွယ်ရေးခက်ခဲတဲ့နေရာက ပြည်သူတွေအတွက် ပိုစိုးရိမ်တယ်” ဟု စိုင်းနော် က ပြောသည်။
နှင်းဆီပါတီ လိုဂို (တံဆိပ်ကို) မဲစာရွက်ပေါ်တွင် မပယ်ဖျက်သည့်အပေါ် ကိုယ်စားလှယ်တဦး အနေနဲ့ စိုးရိမ်မှုများစွာ ရှိကြောင်းလည်း SNLD ပါတီ ကိုယ်စားပြု တောင်ကြီး အမျိုးသားလွှတ်တော်ကိုယ်စားလှယ်လောင်း စိုင်းအောင်မြင့်ဦးက ပြောဆိုလိုက်သည်။
“တချို့ ပြည်သူတွေက မသိတော့ နှင်းဆီပါတီ ကို မဲပေးမိမှာ စိုးရိမ်တယ်။ ကျနော်တို့ အတွက် တော့ စိတ်ပူစရာတခုဖြစ်တာပေါ့။ ထည့်မိရင် ပယ်မဲဖြစ်မှာလေ” ဟု စိုင်းအောင်မြင်ဦးက ပြောသည်။
ထို နှင်းဆီပါတီ လိုဂိုကို ဖျက်မထားခြင်းသည် မဲလာထည့်သူတွေအတွက် ထင်ယောင်းထင်မှား မဖြစ်စေနိင်ကြောင်း တောင်ကြီးမြို့ရေးအေးကွင်းရပ်ကွက် ရွေးကောက်ပွဲကော်မရှင် ဥက္ကဌ ဦးကျော်မြင့်က ပြောသည်။
“ထင်ယောင်ထင်မှား ဖြစ်စေတာ မရှိပါဘူး။ လူတိုင်းသိနေတာဘဲ နှင်းဆီပါတီရုပ်သိမ်းလိုက်ပြီးဆိုတာ လူအများစုက သိနေတယ်။ ဒီမှာလဲ ကြောညာထားတယ်” ဟု ဦးကျော်မြင့် ကပြောသည်။
၂၀၂၀ ပါတီစုံရွေးကောက်ပွဲ အတွက် အောက်တိုဘာ ၂၉ ရက်နေ့မှစတင်ပြီး အသက် ၆၀ အထက်များ ကြိုတင်မဲ များပေးနေပြီး ရွေးကောက်ပွဲကျင်းပရန်အတွက်မူ ၄ ရက်သာကျန်တော့ကြောင်း၊ နိုင်ငံရေးပါတီများ စည်းရုံးရေးဆင်းရာတွင် လူ ၅၀ ထက်ပိုမစုရဟု ရွေးကောက်ပွဲကော်မရှင်က ကြေငြာထားသော်လည်း ကျန်းမားရေးနှင့် အားကစားဝန်ကြီးဌာန ကမူ ရွေးကောက်ပွဲမဲပေးသည့်ရက်တွင် လူ ၃၀ နှင့် အထက်ပိုပြီး စုဝေးနိုင်ကြောင်း ခွင့်ပြုထား သည်။
