သျှမ်းပြည် မြောက်ပိုင်း သီပေါမြို့ ၉ မိုင်ခွဲ တွင် ယနေ့ ( စက်တင်ဘာ ၂၈) ညနေ ၄နာရီ ကျော် ၌ မူးယစ်ရဲတပ်ဖွဲ့ဝင် တဦး သေနတ်ပစ်သတ်ခံရကြောင်း ကနေဦးသတင်းရရှိသည်။

သီပေါမြို့ ၉ မိုင်ခွဲ မူးယစ်ဆေးဝါး စစ်ဆေးရေးဂိတ် တွင် အမည်မသိ ကားဖြင့် လူ၃ဦးလာပြီး သေနတ်ပစ်ခဲ့ရာ မူးယစ်ရဲတပ်ဖွဲ့ဝင် တဦး သေဆုံးခဲ့ကြောင်း အမည်မဖော်လိုသည့် သီပေါမြို့ဒေသခံ တဦး က သျှမ်းသံတော်ဆင့်ကို ပြောသည်။

“ လားရှိုးမြို့ကနေ လာပြီး မူးယစ်စစ်ဆေးမှုတွေလာလုပ်ကြတယ်။ လားရှိုးက မူးယစ်ရဲပါ။ ဂိတ်ကို ကား နဲ့လူ၃ယောက်လာ ပြီး သေနတ်ပစ်သွားတယ်။ မူးယစ်ရဲ ကတော့ ပွဲချင်းပြီးသေဆုံးသွားတယ်” ဟု ၎င်း အမည် မဖော်လိုသူ ကပြောသည်။

မူးယစ်ရဲကို သေနတ်နှင့် ပစ်သတ်ခဲ့သည့် သူ ၂ဦးကို ဖမ်းဆီးရမိပြီး၊ ကျန်တဦးမှာ လွှတ်မြောက်နေဆဲ ဟု သိရသည်။

“ ကားနဲ့ လူ ၂ဦးတော့ ဖမ်းမိတယ်။ ကျန် ၁ဦးကတော့ လွှတ်သွားတယ်။ အခု စုံစမ်းစစ်ဆေးနေဆဲပါ” ဟု အဆိုပါ အမျိုးသား က ထပ်လောင်းပြောသည်။

ထိုကိစ္စနှင့် ပတ်သက်ပြီး သီပေါမြို့ နယ်စည်းမခြား ပရဟိတ အသင်း မှကိုမျိုး က “ တဦးတော့ သေနတ်ပစ်ခံရပြီး သေသွားတယ်။ ကျနော်သေချာမသိသေးဘူး။ အခုတော့ စစ်ဆေးနေကြသေးတယ်” ဟု သျှမ်းသံတော်ဆင့် ကို ပြောသည်။

သီပေါမြို့နယ် တွင် မကြာခဏ သေနတ်ပစ်သတ်ခံရမှု ဖြစ်ပွားပြီး တရားခံကို တကြိမ်တခါမှ မမိသေးကြောင်း သိရသည်။