NLD အစိုးရ သက်တမ်းတလျှောက် သျှမ်းပြည် ငြိမ်းချမ်းရေးကြိုးပမ်းမှု ခရီးစဉ် သည် အကြီးမားဆုံး စိန်ခေါ်မှုဖြစ်ကြောင်း သျှမ်းပြည် ဝန်ကြီးချုပ် ဒေါက်တာလင်းထွဋ် က ပြောကြားလိုက်သည်။
အဆိုပါ ပြောဆိုမှုသည် ယနေ့ ( သြဂုတ် ၁၇) ညနေ ၃ နာရီတွင် သျှမ်းပြည်အစိုးရ၏ စတုတ္တနှစ်တာ ကာလအတွင်း လုပ်ငန်းဆောင်ရွက်များနှင့် ပတ်သက်သည့် သတင်းစာရှင်းလင်းပွဲ ၌ ပြောကြားခဲ့သည်။
“တိုက်ပွဲရှောင် ပြည်သူတွေရဲ့ ဒုက္ခ သောကကို ဖြေရှင်းဆောင်ရွက်တဲ့အခါ ကျနော်တို့ အစိုးရအဖွဲ့ အကြီးမားဆုံး အခက်ခဲ တွေ့ကြုံရတယ်” ဟု ဒေါက်တာလင်းထွဋ် က ပြောသည်။
၂၁ ရာစု ပင်လုံ ညီလာခံ ကြီးမှတစ်ဆင့် ပြည်ထောင်စုကြီး တစ်ခုလုံး ရင်ကြားစေ့နိုင်ပြီး ငြိမ်းချမ်းရေးကို ကြိုးပမ်းဆောင်ရွက်လျက်ရှိသည်။
ငြိမ်းချမ်းရေး ဖော်ဆောင်သည့် နေရာတွင်လည်း စီးပွားရေး၊ ပညာရေး ကျန်းမာရေး ၊ဟိုတယ် နှင့် ခရီးသွား လုပ်ငန်း စသည့် လုပ်ငန်းအကောင်အထည် ဖော်ဆောင်ရွက်သည့်အချိန်တွင် အခက်ခဲများ တွေ့ရကြောင်း ဒေါက်တာလင်းထွဋ် က ဆက်လက်ပြောကြားသည်။
“ဘာဖြစ်လို့လဲဆိုတော့ အားလုံး သိကြပြီဖြစ်တဲ့အတိုင်း ပြည်ထောင်စု နဲ့ တကွ တိုင်းဒေသ နှင့် ပြည်နယ်အားလုံး ပြည်ထောင်စု ကြီးတစ်ခုလုံး ငြိမ်းချမ်းမှ သာလျှင် ဖွံ့ဖြိုးတိုးတက် ပြီး လျင်မြန်ချောမွေ့စွာ အကောင်အထည် ဖော်နိုင်မှာ ဖြစ်ပါတယ်။” ဒေါက်တာလင်းထွဋ် ကပြောသည်။
၂၀၁၆ ခုနှစ် ဧပြီ ၁ ရက်တွင် နိုင်ငံ့တာဝန်ကို စတင်ယူခဲ့သော လက်ရှိအစိုးရ၏ သက်တမ်းသည် ပြီးခဲ့သည့် ဧပြီလတွင် ၄ နှစ် သက်တမ်း ပြည့်မြောက်ခဲ့ပြီးဖြစ်သည်။
ယနေ့ ပြုလုပ်သည့် သတင်းစာရှင်းလင်းပွဲ တွင် မြေယာပြဿာနာ၊ ပညာရေး၊ သျှမ်းမြောက်တွင် နွားကားများ တရားမဝင် တင်သွင်းမှုအခြေအနေ၊ မီဒီယာဖွံ့ဖြိုး တိုးတက်ရေး ၊ နယ်စပ် ပြည်သူ့စစ်အခြေအနေ ၊ အသေးစား ချေးငွေ နှင့် သျှမ်းပြည်အတွင်းရှိ စီမံကိန်းများအခြေအနေ တို့ကို လာရောက်ပြောကြားခဲ့ကြောင်းသိရသည်။
လက်ရှိ ၂၀၂၀ ပြည့်နှစ်တွင် ပြည်သူ့အတွက် စတုတ္တတစ်နှစ်တာ လုပ်ငန်းဆောင်ရွက်ချက် သတင်းစာရှင်းလင်းပွဲကို ကချင်ပြည်နယ်၊ ကယားပြည်နယ် နှင့် မကွေးတိုင်းဒေသကြီးအပါအဝင် တိုင်းဒေသကြီး နှင့် ပြည်နယ် အစိုးရအချို့မှာ ကျင်းပနိုင်ခဲ့ပြီးဖြစ်ကြောင်းသိရသည်။
Leave a Comments