၅၄ နှစ်မြောက် သျှမ်းပြည်တပ်မတော် မွေးနေ့အထိမ်းအမှတ်ကို သျှမ်းပြည်တိုးတက်ရေးပါတီမှ ဦးစီးပြီး သျှမ်းပြည်တောင်ပိုင်း ကျေးသီးမြို့နယ်အတွင်းရှိ ၀မ့်ဟိုင်းဌာနချုပ်တွင် အခမ်းအနားကျင်းပရာ မဟာမိတ်တပ်များတက်ရောက်ခဲ့ကြောင်းသိရသည်။

အဆိုပါအခမ်းအနားမှာ သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် (RCSS/SSA) မှကိုယ်စားလှယ်များ၊ ၀ ပြည်သွေးစည်းညီညွတ်ရေးပါတီ UWSA ကိုယ်စားလှယ်များ၊ မိုင်းလားတပ်ဖွဲ့ NDAA ကိုယ်စားလှယ်များ ၊ သျှမ်းတိုင်းရင်းသားများဒီမိုကရေစီအဖွဲ့ချုပ် SNLD မှကိုယ်စားလှယ်များ၊ သျှမ်းတိုင်းရင်း သားများဒီမိုကရက်တစ်ပါတီ SNDP ကိုယ်စားလှယ်များ တက်ရောက်ခဲ့သည်။

“ဒီနှစ်တော့ ထူးခြားတယ်။ ကျနော်တို့မဟာမိတ်တပ်တွေတက်ရောက်လာကြတယ်။ ၀ UWSA ကကိုယ်စားလှယ် စိုင်းဆမ်လာတယ်။ မိုင်းလား NDAA ကိုယ်စားလှယ် ဗိုလ်မှူးကြီး စဝ်ဆိုင်လား လာတယ်။ ကျားဖြူပါတီက စိုင်းခင်အုန်းနဲ့ RCSS/SSA ကိုယ်စာလှယ် ဗိုလ်မှူးကြီး စဝ်အောင်မြ တို့တက်ရောက်တယ်။ ပွဲက မှန်းထားတာထက်ပိုကြီးသွားတယ်။ ဒါကကျနော်တို့စည်းလုံးမှု အပြုသဘောဆောင်တဲ့ လက္ခဏာပြတယ်။ ကောင်းတဲ့ရလာဒ်တော့ရလာမှာပါ”- ဟု SSPP/SSA ၏ အတွင်းရေးမှူး ၂ ဒုတိယဗိုလ်မှူးကြီးစိုင်းဆု က ပြောသည်။

ဧပြီလ ၂၄ ရက် မနက် ၆ နာရီခွဲကတည်းက အခမ်းအနား စတင်ကျင်းပခဲ့ပြီး သျှမ်းပြည်တိုးတက်ရေးပါတီ / သျှမ်းပြည်တက်မတော်၏ နာယက ဗိုလ်ချုပ်ကြီးဆေထင် အပါအဝင် တာဝန်ရှိသူများ အခမ်းအနားတက်ရောက်သူ စုစုပေါင်း ၄၀၀၀ ခန့်ရှိပါသည်။

“ဘယ်ပါတီ ဘယ်အဖွဲ့အစည်းဘဲနေနေ အရေးမကြီးဘူး။ အချင်းချင်းနားလည်ဖို့ဘဲ။ အခုချိန်က အရေးကြီး တဲ့အချိန်။ အချင်းချင်းဆွေးနွေးနိုင်တာအရမ်းကိုကောင်းတဲ့လက္ခဏာဖြစ်နေပြီ။ အရင်ကတဖွဲ့နဲ့တဖွဲ့ မျက်နှာ ချင်း ဆိုင်ဖို့တောင်ခက်ခဲတယ်လေ။ အခုဒီလိုလာတွေ့ဆုံတော့ ဆွေးနွေးတိုင်ပင်လို့ရတယ်။ ပြသနာတွေဖြေရှင်းလို့ရတယ်”- ဟု SNLD အထွေထွေအတွင်းရေးမှူး စိုင်းညွန့်လွင်ကပြောသည်။

သျှမ်းပြည်တိုးတက်ရေးပါတီ/သျှမ်းပြည်တပ်မတော်သည် ၁၉၆၄ ခုနှစ်က ညောင်ရွှေစော်ဘွားကြီးစဝ်ရွှေသိုက် ၏မဟာဒေဝီ စဝ်နန်းဟိန်းခမ်းက ဦးဆောင်တည်ထောင်ခဲ့ပါသည်။