သျှမ်းပြည် အရှေ့ပိုင်း တာချီလိတ်ခရိုင် တွင် တပတ်အတွင်း ကျပ်သိန်း ၄၀၀၀ ခန့်ရှိသည့် မူးယစ်ဆေးဝါး ကို သိမ်းဆည်းရ မိကြောင်း သတင်းရရှိသည်။
တာချီလိတ်မြို့နယ် တွင် အများဆုံး ဖမ်းဆီးရမိခြင်းဖြစ်ပြီး၊ ကျန်ရှိမူးယစ်ဆေးများမှာ မိုင်းယောင်းမြို့ နှင့် မိုင်းဖြတ်မြို့တို့တွင် ဖမ်းဆီးရမိခြင်းဖြစ်သည်။
မေလ ၇ ရက် နေ့လည် ၁နာရီ က တာချီလိတ်မြို့နယ် မိုင်းဆတ်-တာချီလိတ်ကားလမ်းပေါ်တွင် အသက် ၂၁နှစ် အရွယ် လီဗု မောင်းနှင်ပြီး၊ အသက် ၂၂နှစ်အရွယ် လော်ညီး လိုက်ပါးစီးနင်းလာသည့် ကားပေါ်တွင်စစ်ဆေးရာ ကျပ်သိန်း ၃ ထောင် တန်ဖိုးရှိ စိတ်ကြွဆေးပြားများကို သိမ်းဆည်းရမိကြောင်း မူးယစ် ရဲတပ်ဖွဲ့ ထုတ်ပြန်ချက် အရသိရသည်။
ဖမ်းဆီးရမိသည့် မူးယစ်ဆေးဝါးနှင့်အတူ ယာဉ်မောင်း လီဗု နှင့် လိုက်ပါစီးနင်းသည့် လော်ညီးတို့ကို တာချီလိတ်မြို့မရဲစခန်း က မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေဖြင့် အမှုဖွင့် အရေးယူပြီး ကွင်းဆက်များဖော်ထုတ်စစ်ဆေးလျက်ရှိကြောင်း သိရသည်။
ထို့ပြင် မေလ ၅ ရက်က မိုင်းယောင်းမြို့၊ မိုင်းယောင်း-မိုင်းဖြတ် သွားလမ်းတွင် လမ်းလျှောက်လာသူအသက် ၁၉ နှစ် အရွယ် မနာဘို အား မသင်္ကာသဖြင့် စစ်ဆေးရာ ၎င်းကိုင်ဆောင်လာသည့်အိတ်အတွင်း ကျပ်သိန်း ၄၅၀ တန်ဖိုးရှိ စိတ်ကြွဆေးများကို သိမ်းဆည်းရမိကြောင်းရဲထုတ်ပြန်ချက်တွင်ဖော်ပြထားသည်။
ဆက်လက်ပြီး ကွင်းဆက်ကို စစ်ဆေးရာ မိုင်းယောင်းမြို့နယ် ရပ်ကွက် (၁) နေ အိုက်ပေး ထံ ယူလာသည်ကို သိရသဖြင့် အိုက်ပေး အိမ်ကို ဝင်ရောက်ရှာဖွေရာ အိမ်ရှေ့တွင် ရပ်ထားသည့် ကားပေါ်တွင် ကျပ်သိန်း ၂၇၀ တန်ဖိုးရှိ မူးယစ်ဆေးဝါးကို ဆက်လက် သိမ်းဆည်းရမိသည်။
ထိုနည်းတူ မေ ၄ ရက် တွင်လည်း သျှမ်းပြည် အရှေ့ပိုင်း မိုင်းဖြတ်မြို့နယ် မိုင်းဖြတ်-ကျိုင်းတုံ သွားကားလမ်းပေါ်တွင် လမ်းလျှောက်နေသည့် အမျိုးသား ၂ဦးကို မသင်္ကာသဖြင့် စစ်ဆေးရာ ခရီးဆောင်အိတ်ထဲတွင် ဘိန်းစိမ်း အလေးချိန် ၂၇ ကီလို (ဒေသ ကာလပေါက်ဈေး တန်ဖိုးငွေကျပ် ၂၇၀) ကိုသိမ်းဆည်းရကြောင်း သိရပါသည်။
