၂၀၀၈ ဖွဲ့စည်းပုံ ခြေ/ဥ ပြင်ဆင်ရေး ဒုတိယနေ့တွင် သမ္မတဖြစ်ရေး အတွက် ကန့်သတ်ထားသည့် ပုဒ်မ ၅၉ (စ) အပါဝင် ပုဒ်မ ၁၅ ခု ပြင်ဆင်ခွင့်မရခဲ့ကြောင်း သတင်းရရှိ သည်။
ယနေ့ ပြည်ထောင်စု လွှတ်တော် တွင် ၂၀၀၈ ဖွဲ့စည်းပုံ အခြေခံ ဥပဒေ ပြင်ဆင်ရေး ပုဒ်မ၊ ပုဒ်မခွဲ ၁၅ ခု အတွက် မဲခွဲ ဆုံးဖြတ်ရာ တခုမျှ မအောင်မြင်ခဲ့ပေ။
မဲခွဲဆုံးဖြတ်သည့် ပုဒ်မ၊ ပုဒ်မခွဲများမှာ ဒေါ်အောင်ဆန်းစုကြည် သမ္မတ ဖြစ်ခွင့် ဟန့်တားထားသည့် ပုဒ်မ ၅၉ (စ) အပြင် အမျိုးသား ကာကွယ်ရေး နှင့် လုံခြုံရေး ကောင်စီ ဆိုင်ရာ ပုဒ်မများဖြစ်ခဲ့ပြီး တခုမျှ ပြင်ဆင်ရေးအတွက် မအောင်မြင်ခဲ့ကြောင်းသိရသည်။
ယနေ့ ပြည်ထောင်စု လွှတ်တော် အစည်းအဝေးကို လွှတ်တော်ကိုယ်စားလှယ် ၆၃၅ ဦး တက်ရောက်ခဲ့သည်။
၂၀၀၈ ဖွဲ့စည်းပုံ အခြေခံ ဥပဒေ ပုဒ်မများ ပြင်ဆင်ရာတွင် လွှတ်တော်ကိုယ်စားလှယ် စုစုပေါင်း ၇၅ ရာခိုင်နှုန်းကျော် ထောက်ခံရန် လိုအပ်သည်။
ယမန်နေ့(မတ် ၁၀) ကလည်း ၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး ပုဒ်မ၊ ပုဒ်မခွဲ ဖြစ်သည့် တပ်မတော် အခန်းကဏ္ဍများကို မဲခွဲဆုံးဖြတ်ရာတွင် အောင်မြင်မှု မရရှိခဲ့ပေ။
ယမန်နေ့တွင် ပုဒ်မ၊ ပုဒ်မခွဲ ၁၄ခု မဲခွဲဆုံးဖြတ်ရာတွင် ၂ ခုသာ အနိုင်ရခဲ့ပြီး အဆိုပါ ၂ခုမှာ ပုဒ်မ ၃၂(က) နှင့် ပုဒ်မ ၃၂ (ခ) တွင်ရှိသော “ အိုမင်းမစွမ်း” စာသား အစား “ သက်ကြီးရွယ်အို” အစားထိုးခြင်း၊ “မသန်မစွမ်း”အစား “ မသန်စွမ်း” ဟုအစားထိုးခြင်း တို့သာဖြစ်ကြောင်း သိရသည်။
Leave a Comments