တိုင်းရင်းသား လက်နက်ကိုင်များကို လက်နက်ခဲယမ်းများ ထောက်ပံ့ပေးခြင်း လုံးဝမရှိကြောင်း တရုတ်သမ္မတ ရှီကျင့်ဖျင် က ပြောဆိုလိုက်သည်။
အဆိုပါ ပြောဆိုမှု သည် ဇန်နဝါရီ ၁၈ ရက် မနက်ပိုင်းတွင် တရုတ်ပြည်သူ့ သမ္မတ နိုင်ငံ သမ္မတ ရှီကျင့်ဖျင် နှင့် တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် တို့ နေပြည်တော်ရှိ Horizon Lake View Resort Hotel ၌ တွေ့ဆုံစဉ် ပြောကြားခဲ့ခြင်းဖြစ်သည်။
အများကစွပ်စွဲပြောကြားနေသလို မြန်မာနိုင်ငံရှိ လက်နက်ကိုင်အဖွဲ့အစည်းများကို လက်နက်၊ ခဲယမ်းများ ထောက်ပံ့ပေးနေခြင်း လုံးဝမရှိကြောင်း၊ အခြားနည်းလမ်းများနှင့် ရရှိနိုင်သည် ဖြစ်၍ မိမိတို့ကလည်း သေချာစွာစိစစ်ဖြေရှင်းပေးသွားမည်ဖြစ်ကြောင်း တရုတ် သမ္မတ ရှီကျင့်ဖျင် က ပြောကြားခဲ့သည်။
တရုတ်နိုင်ငံ က ဆောင်ရွက်နေသည့် “ One Belt One Road” စီမံကိန်းများတွင် မြန်မာနိုင်ငံသည် တရုတ်နိုင်ငံ ၏ အိမ်နီးချင်းနိုင်ငံဖြစ်သည့်အတွက် မြန်မာနိုင်ငံအတွက် အကျိုးရှိစေသည့် ဆောင်ရွက်ချက်များ ဆောင်ရွက်နိုင်ပါက တိုင်းပြည်ဖွံ့ဖြိုး တိုးတက်လာပြီး ငြိမ်းချမ်းရေး လမ်းကြောင်းအတွက် အထောက်အကူ ရရှိစေနိုင်ကြောင်း တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် က ပြောကြားလိုက်သည်။
ထို့ပြင် ငြိမ်းချမ်းရေးဆောင်ရွက်ရာတွင်လည်း ဥပဒေနှင့်အညီသာ ဆောင်ရွက်ရ မည်ကို တိုင်းရင်းသားအားလုံး နားလည်လက်ခံနိုင်ရန် လိုအပ်ပါကြောင်း၊သမ္မတ ရှီကျင့်ဖျင် ကလည်း တိုက်တွန်းအားပေးနိုင်ပါရန် မေတ္တာရပ်ခံလိုပါကြောင်း ဗိုလ်ချုပ်မှူးကြီး မင်းအောင်လှိုင် က ယနေ့ တရုတ်သမ္မတ ရှီကျင့်ဖျင်နှင့် တွေ့ဆုံစဉ် ပြောဆိုခဲ့သည်။
ဆက်လက်ပြီး မိုင်းပေါင်း ၂၀၀၀ ကျော် နယ်နိမိတ် ထိစပ်လျက်ရှိသည့် နယ်စပ်ဒေသဆိုင်ရာ ပူးပေါင်း ဆောင်ရွက်မှု တိုးမြှင့် နိုင်ရန် အရေးကြီးကြောင်း၊ မည်သည့် အဖွဲ့အစည်း ဖြစ်စေ တရုတ်နိုင်ငံ ပိုင်နက် ကို အသုံးချပြီး မြန်မာနိုင်ငံကို ထိခိုက်အောင် ဆောင်ရွက်ခြင်းမျိုး လက်မခံကြောင်းလည်း တရုတ်သမ္မတ ရှီကျင့်ဖျင် က ပြောဆိုလိုက်သည်။
ယနေ့ မနက်ပိုင်း တွင် တရုတ်ပြည်သူ့ သမ္မတ နိုင်ငံ သမ္မတ မစ္စတာ နှင့် နိုင်ငံတော် ၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် တို့သည့် ယနေ့ မနက်ပိုင်း တွင် နေပြည်တော် သမ္မတအိမ်တော် ၌ တွေ့ဆုံဆွေးနွေးခဲ့သည်။
ထို့ တွေ့ဆုံဆွေးနွေးပွဲ အပြီးတွင် တရုတ်-မြန်မာ ၂နိုင်ငံကြား နားလည်မှု စာချွန်လွှာ ၃၃ခု ကို သဘောတူ လက်မှတ်ရေးထိုး လိုက်ကြောင်း သိရသည်။
