သျှမ်းပြည်မြောက်ပိုင်း သီပေါမြို့နယ် ပန်ဆင်မ် ကျေးရွာနေ လယ်သမား ၂ ဦးသည် လယ်ယာရေသွင်းရန် ရေလုကြရာမှ အချင်းများပြီး ရိုက်နှိက်သည့် အဆင့်အထိ ဖြစ်ပွားခဲ့ကြောင်း သိရသည်။
ဖြစ်စဉ်မှာ အောက်တိုဘာ ၁၆ ရက် မနက် ၉ နာရီ တွင် လယ်ချင်းကပ်လျက်ရှိသော အသက် ၆၀ ကျော် လုံးအောင်ပီးနှင့် အသက် ၄၈ နှစ် အရွယ် လုံးကျော် တို့သည် လယ်ယာစိုက်ပျိုးရေးအတွက်လယ်ရေသွင်းရာ၌ အချင်းများကြရာ ရိုက်နှိက်မှု ဖြစ်ပွားခဲ့ကြောင်း သတင်းရရှိသည်။
ရိုက်နှက်မှုကြောင့် လုံးအောင်ပီးမှာ ဦးခေါင်းပေါက်ကွဲဒဏ်ရာရရှိခဲ့ပြီး လက်ရှိတွင် ကျေးရွာဆေးပေးခန်း၌ဆေးကုသမှုခံယူနေကြောင်း လည်း ပန်ဆင်မ် ကျေးရွာ ဒေသခံ က ပြောသည်။
“ မနေ့က သူတို့ လယ်ရေသွားသွင်းကြရာမှာ ရန်ဖြစ်တာ။ လယ်ရေက မိုးကျမှ သွင်းဖို့ရှိတာလေ။ သူလည်းသူ့လယ်သွင်းချင်ကိုယ်လည်းကိုယ့်လယ်သွင်းချင်ဆိုတော့ ရေလုကြရင်း လုံးအောင်ပီးကု လုံးကျော်က ဝါးရင်းတုတ်နဲ့ ရိုက်တာ။ လုံးအောင်ပီး ဦးခေါင်း ဒဏ်ရာရသွားတယ်” ဟု ဒေသခံ စိုင်းလှ က ပြောသည်။
လယ်သမား ၂ ဦး ပြသနာဖြစ်ပွားသည့် သီပေါမြို့နယ် ပန်ဆင်မ်ကျေးရွာသည် သျှမ်းပြည် တိုးတက်ရေး ပါတီ၊ သျှမ်းပြည်တပ်မတော်(SSPP/SSA) ထိန်းချုပ်ရာနေရာဖြစ်သည်။လက်ရှိတွင်ရိုက်နှက်မှုကျူးလွန်သူကို SSPP/SSA မှ ခေါ်ယူစစ်ဆေး အရေးယူဆောင်ရွက်နေကြောင်း သိရသည်။
Leave a Comments