စက်တင်ဘာလ ၁၀ ရက်နေ့က NCA လက်မှတ်ထိုးထားတဲ့ တိုင်းရင်းသားလက်နက်ကိုင်တပ်ဖွဲ့ နိုင်ငံရေး ဆွေးနွေးညှိနှိုင်းမှုအဖွဲ့ NCA-S EAO နဲ့အစိုးရကိုယ်စားလှယ်တို့တွေ့ဆုံဆွေးနွေးရာမှာ ၂၁ ရာစု ပင်လုံညီလာခံ ကျင်းပရေးအပါအဝင် အချက်အလက်အများအပြားကို ဆွေးနွေးနိုင်ခဲ့တယ်လို့ သိရပါတယ်။သို့ပေမယ့် ၂ ဦး ၂ ဖွဲ့ဟာ အထက်ကိုအသီးသီးပြန်လည်တင်ပြဆွေးနွေးရမှာဖြစ်တာကြောင့် ဆုံးဖြတ်ချက်လုပ်တဲ့အနေ အထား မရှိသေးဘူးလို့ ဆွေးနွေးရေးမှာ တိုင်းရင်းသားဘက်က အဖွဲ့ခေါင်းဆောင် ဗိုလ်မှူးကြီးစိုင်းငင်းကပြောပါတယ်။ အသေးစိပ်သိရအောင် သျှမ်းသံတော်ဆင့်သတင်းထောက် စိုင်းယွက်ခမ်းက ဆက်သွယ်မေးမြန်းထားပါတယ်။

မေး။ ။ မင်္ဂလာပါခင်ဗျ ။ နိုင်ငံရေး ဆွေးနွေးညှိနှိုင်းမှုအဖွဲ့ NCA-S EAO နဲ့ အစိုးရကိုယ်စားလှယ်တွေတွေ့ဆုံဆွေးနွေးခဲ့တာနဲ့ပတ်သက်ပြီးနဲနဲပြောပြပေးလို့ရမလားခင်ဗျ။

ဖြေ။ ။ စက်တင်ဘာလ ၁၀ ရက်နေ့က NCA-S EAO ညှိနှိုင်းဆွေးနွေးရေးအဖွဲ့ နဲ့ အစိုးရကိုယ်စားလှယ်တွေ တွေ့ဆုံဆွေးနွေးတာဖြစ်ပါတယ်။ ကျနော်တို့ဘက်က ၁၅ ယောက်ပါ။ အစိုးရဘက်ကတော့ ၁၀ ယောက်ပါ။ ကျနော်တို့ ရန်ကုန်မြို့ NRPC ရုံးမှာ တွေ့ဆုံကြတာဖြစ်ပါတယ်။

မေး။ ။ ဆွေးနွေးပွဲမှာ ၂၁ ရာစုပင်လုံညီလာခံ ၂၀၂၀ နှစ်ဆန်းပိုင်းမှာ ကျင်းပဖို့ အတွက်ရော ဘယ်လိုထူးခြားချက်တွေရသလဲခင်ဗျ။

ဖြေ။ ။ ပြောမယ်ဆိုရင်ကျနော်တို့က ညှိနှိုင်းရေးအဖွဲ့ဘဲလေနော် ။ အစိုးရကိုယ်စားလှယ်အဖွဲ့ကလည်း ညှိနှိုင်းရေးအဖွဲ့ဘဲဆိုတော့ ဆုံးဖြတ်ပိုင်ခွင့်အာဏာမရှိကြဘူးလေ။ အဲလို ညှိနှိုင်းကြတော့ အစိုးရဘက် ကကြည့်ရင်လည်း ၂၁ ရာစု ပင်လုံညီလာခံကို သူတို့လည်းလုပ်ချင်တယ်။ ကျနော်တို့ဘက်ကလည်း လုပ်ချင်တယ်ဆိုတော့ ဘယ်ချိန်မှာလုပ်ရင်သင့်တော်မလဲလို့ အချိန်ပြန်ကြည့်တဲ့အခါကျတော့ ၂၀၂၀ နှစ်ဆန်းပိုင်းမှာ ဖြစ်နိုင်ဖွယ်ရှိတယ်အဲလိုအကြမ်းဖျဉ်းဘဲ ရပါတယ်။ ၂ ဖက်လုံးက ဒါကိုယူပြီးတော့အသီးသီး ဦးဆောင်အဖွဲ့ဆီကိုပြန်သွားဆွေးနွေးရပါမယ်။ ကျနော်တို့ဆိုရင်လည်း ထိပ်သီးခေါင်းဆောင် PPST ဆီကိုပြန်ယူလာရမယ်လေ။ အစိုးရဘက်ကလည်း ခေါင်းဆောင်ပိုင်းကို ပြန်သွားဆွေးနွေးမယ်ပေါ့။ ကျနော်တို့ဘယ်လိုဖြစ်ချင်ကြလဲဆိုတာ ဆွေးနွေးညှိနှိုင်းတဲ့အဆင့်ဘဲရှိပါသေးတယ်။ ဆုံးဖြတ်တဲ့အဆင့်တော့မဟုတ်သေးပါဘူး။

မေး။ ။ ဟုတ်ကဲ့အဲ့ဆိုရင် ထပ်သွားဆွေးနွေးရဦးမှာပေါ့နော်။ ဘယ်တော့လောက်သိနိုင်မလဲခင်ဗျ။

ဖြေ။ ။ ၂ ဖက်လုံးအကြီးအကဲတွေကို ပြန်သွားတင်ရဦးမယ်လေ။ကျနော်တို့ဆိုရင် PPST ပေါ့။ လာမယ့်လ ဒုတိယပတ်လောက်တွေ့ဖြစ်မယ်လို့မျှော်မှန်းထားကြပါတယ်။

မေး။ ။ အဲလိုဆိုရင် မနေ့က ဆွေးနွေးပွဲမှာဘာတွေဆွေးနွေးခဲ့သလဲဆိုတာ ပြောပြလို့ရမလားခင်ဗျ။

ဖြေ။ ။ အဓိကကတော့ ငြိမ်းချမ်းရေးလုပ်ငန်းစဉ်မှာ တစ်ဆို့ တုန့်ဆိုင်းနေတယ် ရှေ့မဆက်နိုင်ဘူး။ ဒါကြောင့် ကျနော်တို့က ဒါကိုကျော်လွှားချင်တယ်။ ကျနော်တို့ ၁၀ ဖွဲ့ကပြင်ဆင်ထားတယ်။ အစိုးရဘက်ကလည်းပြင်ဆင် လာတယ်။ ပြင်ဆင်လာတာကို ကျနော်တို့လာပြီး တင်ပြကြတာ ဆွေးနွေးကြတာလေ။ ဒီဟာကို ခေါင်းစဉ်တွေ ရပြီဆိုရင် ဘယ်လိုဆက်ဆွေးနွေးသွားကြမလဲစတာတွေဆွေးနွေးတာလေ။

နောက်တခုက လာမယ့်လ ၁၅ ရက်နေ့ကလည်း NCA လက်မှတ်ထိုးခြင်း ၄ နှစ်ပြည့်ပြီဆိုတော့လေ အရင် နှစ်တွေတုန်းကလိုဘဲ ဒီနှစ်လည်း အခမ်းအနားကျင်းပချင်တယ်ပေါ့။ အဲလိုဆွေးနွေးကြတယ်။ ပြင်ဆင်ကြတယ်။ ဒီအခမ်းအနားအခွင့်အလှမ်းကနေပြီးတော့ ထိပ်သီးခေါင်းဆောင်များ တွေ့ဆုံနိုင်အောင်လုပ်ချင်တယ်။ အခမ်း အနားအပြီး ၃-၄ ရက်လောက်ဆိုရင် တွေ့နိုင်အောင် ပေါ့နော်။ ပြန်လည်နီးစပ်မှုရှိအောင် လို့ပြောရ မလား။ ခုအနေအထားကြည့်ရင် ဝေးနေသလို ခံစားရလို့လေ။

မေး။ ။ အဲလိုဆိုရင် NCA ၄ နှစ်ပြည့်အခမ်းအနားကျင်းပ ဖို့ဆိုတဲ့ဟာကိုရော ဆွေးနွေးသဘောတူခဲ့ကြတယ် ပေါ့ အဲလိုလားခင်ဗျ။

ဖြေ။ ။ NCA ၄ နှစ်ပြည့်အခမ်းအနားကိစ္စကတော့ ဟိုးအရင်ကတည်းက သဘောတူညီချက်ရှိပြီးသားလေ။ ဘယ်လိုလုပ်ကြမလဲဆိုတာနည်းလမ်းလေးဘဲဆွေးနွေးရတာပါဘဲ။

မေး။ ။ ဟုတ်ကဲ့ ဗိုလ်မှူးကြီးပြောတဲ့အတိုင်းဆိုရင် ငြိမ်းချမ်းရေးက ၄ နှစ်ထဲဝင်လာပြီဆိုပေမယ့် တစ်ဆို့တုန့်ဆိုင်းနေသေးတဲ့အပေါ် ဘယ်လိုဖြေရှင်းသင့်ပါသလဲ။ လုပ်နေရတဲ့လုပ်ငန်းစဉ်အပေါ်မှာကော အားရကျေနပ်မှုရှိပါသလားခင်ဗျ။

ဖြေ။ ။ လက်မှတ်ရေးထိုးခြင်း ၄ နှစ်တာကာလမှာ ငြိမ်းချမ်းရေးလုပ်ငန်းစဉ်ကတော့ ကျေနပ်အားရ လောက် တဲ့ အနေအထားမရှိဘူး။ ဒါပေမယ့် စိတ်သဘောထားရှည်ရှည်ထားပြီး သူ့ဘက်ကိုယ့်ဘက်ကြည့်ပြီးတော့ တွေ့ဆုံဆွေးနွေးဖြေရှင်းသွားရတာပေါ့။ ဘာလို့လဲဆိုတော့ NCA ဘောင်ထဲကနေသွားမယ်ဆိုတဲ့ခါကျတော့ အကြမ်းဖက်နည်း သုံးလို့မရဘူးလေ။ မနေ့ကကျနော်တို့ဆွေးနွေးခဲ့တဲ့အတိုင်း လက်မှတ်မထိုးရသေးတဲ့ အဖွဲ့တွေလည်း ပါ၀င်လာနိုင်အောင် ဘယ်လိုစီစဉ်ပြီးတွေ့ဆုံကြမလဲ ။ စာရင်းထဲအတိုင်း သွားမယ်ဆိုရင် တိုင်းရင်းသားလက်နက်ကိုင်အဖွဲ့က ၂၀ လောက်ရှိမယ်လေ။ ခုက ဒီ NCA ထဲပါလာတာ ၁၀ ဖွဲ့လောက်ဘဲ ရှိသေးတယ်လေ။ NCA ပြင်ပမှာ ၁၀ ဖွဲ့လောက်ကျန်နေသေးတယ်လေ။ ဒါကိုအားလုံးနဲ့ဆက်ဆွေးနွေးသွားရမယ်။ နည်းလမ်းရှာရမယ်လေ။

ဟုတ်ကဲ့ စိတ်ရှည်ရှည်နဲ့ဖြေကြားပေးတဲ့အတွက် ကျေးဇူးအထူးတင်ပါတယ်ခင်ဗျ။

စက်တင်ဘာလ ၁၀ ရက်နေ့မှာ ကျင်းပတဲ့ NCA-S EAO နဲ့ အစိုးရကိုယ်စားလှယ်တွေတွေ့ဆုံဆွေးနွေးပွဲမှာ အစိုးရကိုယ်စားလှယ်ဘက်က ရှေ့နေချုပ် ဦးထွန်းထွန်းဦး ( NRPC ဒုဥက္ကဌ ၃ ) ၊ ဒုတိယဗိုလ်ချုပ်ကြီး ခင်ဇော်ဦး (ငြိမ်း)၊ဒုတိယဗိုလ်ချုပ်ကြီး ရာပြည့် ၊ ဒုတိယ ဗိုလ်ချုပ်ကြီး မင်းနောင်၊ ဗိုလ်ချုပ် စိုးနိုင်ဦး၊ ဗိုလ်ချုပ် နေလင်း၊ ဦးပြုံးချို (ခ) ဦးဌေးဝင်းအောင်၊ ဦးလှမောင်ရွှေ ၊ ဦးမိုးဇော်ဦး၊ ဦးဇော်ဌေးတို့ပါ၀င်ပါတယ်။

NCA-S EAO ညှိနှိုင်းရေးအဖွဲ့မှာကျတော့ – ဗိုလ်မှူးကြီး စိုင်းငင်း (Team Leader) ရဲဘော်မျိုးဝင်း (Coordinator) ဒေါက်တာ လျန်မှုန်းဆာခေါင်း ၊ စောမြရာဇာလင်း ၊ ခွန်မြင့်ထွန်း ၊ နိုင်အောင်မငေး ၊ ဗိုလ်မှူးကြီး စောစိန်ဝင်း ၊ ပဒိုစောအယ်ကလူးစေး ၊ ဗိုလ်မှူးကြီး စောကျော်ညွှန့် ၊ဗိုလ်မှူးကြီး ဆော်လမွန် ၊ ပဒိုစောဆဲဂေ (Team Leader) ၊ စိုင်းလျန်း (Coordinator)၊ ဗိုလ်မှူးချုပ် စောတာမလာသော ၊ ဗိုလ်မှူးကြီး ဆောင်းဟန် ၊ ဗိုလ်မှူးကြီး ဗညားချမ်းနွန် နဲ့ နှစ်ဖက် ရုံးအဖွဲ့၊ အလုပ်အဖွဲ့တွေ တက်ရောက်ခဲ့ပါတယ်။