သျှမ်းပြည်မြောက်ပိုင်းနမ့်ခမ်းမြို့ဝိန်းဆာရွာတွင် ဓါတ်ဆီဆိုင်မီးလောင်ကျွမ်းမှုမှ တန်ဖိုးကျပ်သိန်းပေါင်း ၇၀ ကျော် ဆုံးရှုံးရကြောင်း သိရသည်။
မေလ ၁၀ ရက်နေ့ မွန်းတည့်ချိန်က ဝိန်းဆာရွာတွင် ဖြစ်ပွါးခဲ့သော မိုင်တေ့၏ ဓါတ်ဆီဆိုင်မီးလောင်ကျွမ်းမှုတွင် ဆိုင်ကယ်၊ စက်ဘီး နှင့်နေအိမ် ဂိုဒေါင်များ မီးစွဲလောင်မှုနှင့်အတူဆုံးရှုံးခဲ့ရကြောင်း ဆိုပါသည်။
ဝိန်းဆာရွာအုပ်ချုပ်ရေးမှူး စိုင်းထွန်းလူက – “ဆိုင်ရှင်ပြောပြချက်အရတော့ အသစ်ယူလာတဲ့ဆီတွေ စုပ်ယူနေချိန်မှာဘဲ ရုတ်တရက်မီးထလောင်တာ ။ ဆီဟောင်းတွေတော့ ရောင်းလို့ကုန်သွားပြီ။ မီးစွဲလောင်တဲ့အထဲမှာ ကားတစီးပါမယ်။ ဆိုင်ကယ် ၃ စီး၊ ဆီတွေ၊ ဆီဆိုင်နဲ့ နေအိမ်တလုံးဆုံးရှုံးတယ်။ ခန့်မှန်းချေကျပ်သိန်း ၇၀ လောက်လို့ပြောပါတယ် ”- ဟု သျှမ်းသံတော်ဆင့်အားပြောသည်။
ဓါတ်ဆီဆိုင်မီးစွဲလောင်ကျွမ်းမှုအား မီးသတ်အဖွဲ့၊ နမ့်ခမ်းဒေသခံလူထုများ စုပေါင်းငြိမ်းသတ်ရာ အချိန် ၃ နာရီခန့်ကြာမြင့်မှသာ မီးညွန့်ကျိုးသွားကြောင်းလည်း နမ့်ခမ်းမြို့ခံတဦးကပြောသည်။
မီးလောင်မှုကြောင့်တော့လူထု ထိခိုက်ဒဏ်ရာရသေဆုံးမှုတော့မရှိခဲ့ပါဘူး။ – ဟုလည်း မီးငြိမ်းသတ်ရာတွင်ပါဝင်သော နမ့်ခမ်းမြို့ခံကပြောသည်။
ဆီဆိုင်ပိုင်ရှင်မှာ မိုင်တေ့ (တရုတ်လူမျိုး)ဖြစ်ပြီး ဇနီးသည်မှာ ဒေါ်မထု(ကချင်) ဖြစ်ကြောင်း သိရသည်။ ၎င်းတို့၏ ဆီဆိုင်သည်နမ့်ခမ်းမြို့တောင်ဘက်ရှိ ဝိန်းဆာရွာစွန်တွင်ရှိပါသည်။
မည်သည့်အတွက်ကြောင့် မီးစွဲလောင်ကျွမ်းရသည်ကိုလည်းစုံစမ်း နေဆဲဖြစ်ကြောင်း အာဏာပိုင်များကပြောသည် ။
ပြီးခဲ့သည့်မေလပထမအပတ်ကလည်း ကွတ်ခိုင်မြို့တွင် လက်ကိုင်ဖုန်းဆိုင်မီးစွဲလောင်ကျွမ်းရာ ဆိုင်ရှင်ဖြစ်သူမှာ ပိတ်မိနေသူအားကယ်ထုတ်ရင်မီးစွဲလောင်ကျွမ်းသေဆုံးခဲ့ရသည်။
