သျှမ်းပြည်မြောက်ပိုင်း သီပေါမြို့နယ် နမ့်မ အုပ်စုရှိ ကျောက်မီးသွေးတူးဖော်ရေးစီမံကိန်းအား ၁ နှစ် ထပ်မံတိုးမြှင့်တူးဖော်ရန်ကုမ္မဏီအား ဒေသခံများက ခွင့်ပြုထားကြောင်းသိရသည်။
ဒီဇင်ဘာလ ၁၃ ရက်နေ့က နမ့်မအုပ်စုအတွင်းရှိ သံဃာတော်များနှင့် ဒေသခံများအား ကျောက်မီးသွေးတူးဖော်သည့် ငွေရည်ပုလဲကုမ္မဏီက လာရောက်တွေ့ဆုံကာ တနှစ်ထပ်မံတူးဖော်ခွင့်ပေးရန် ညှိနှိုင်းရာ ၂၀၁၉ ခုနှစ် ဒီဇင်ဘာလအထိသာ ဒေသခံများက ခွင့်ပြုချက်ပေးထားကြောင်းသိရသည်။
နမ့်မဒေသခံလူငယ် စိုင်းဆာလူ က- ” ငွေရည်ပုလဲကုမ္မဏီက နမ့်မအုပ်စုမှာ ၂၀၀၄ ခုနှစ်ကတည်းကစပြီး ၂၀၁၈ အထိတူးခွင့်ရထားတယ်။အခုက ကျောက်မီးသွေးတွေမကုန်သေးလို့ တနှစ်ထပ်တူးခွင့်ပြုပါ ဆိုပြီးတောင်းလာတယ်။၂၀၁၈ ခုနှစ်တုန်းက လူထုအတွက် လုပ်ပေးလို့မပြီးသေးတဲ့ စီမံကိန်းတွေကို ဒီ ၂၀၁၉ ခုနှစ်ရဲ့ပထမ ၆ လအတွင်း ကုမ္မဏီဘက်ကနေအပြီးလုပ်ပေးဖို့ သဘောတူညီချက်ရယူကြတယ်။ ပြီးရင် လက်မှတ်ရေးထိုးကြတယ်။ တကယ်လို့ ၆ လ အတွင်း လုပ်စရာအကြွေးတွေ အပြီးမလုပ်ပေးရင်တော့ ကျောက်မီးသွေးတူးဖော်မှု လုပ်ငန်းချက်ချင်းရပ်ဆိုင်းရမယ်လို့ ပါတယ်။” – ဟု သျှမ်းသံတော်ဆင့်အားပြောသည်။
၂၀၁၉ ခုနှစ်အတွင်း ကျောက်မီးသွေးဆက်လက်တူးဖော်မည်ဆိုပါက နမ့်မဒေသခံများအတွက် မီးစက် ၁ လုံး နှင့် ဒေသခံလူထုအတွက် ရံပုံငွေ ကျပ်သိန်း ၁၀၀ ကိုတောင်းဆိုထားကြောင်း၊ နမ့်မအုပ်စုအတွင်းပါ၀င်သည့် ရွာကြီး ရ ရွာမှလည်း လမ်း၊ ကျေးလက်ခန်းမ အစရှိသည်တို့ ကုမ္မဏီဘက်မှ လုပ်ဆောင်ပေးရန် အသီးသီး တောင်းဆိုထားကြကြောင်းလည်း သိရသည်။
“ကုမ္မဏီဘက်ကတော့ ကျနော်တို့ကိုတမျိုးပြီးတမျိုးတောင်းနေတယ်လို့မြင်ကောင်းမြင်ပါလိမ့်မယ်။ ဒါပေမယ့် ကျနော်တို့ကိုကုမ္မဏီဘက်ကလုပ်ပေးတဲ့ဟာတွေက ၁၀၀ ရာခိုင်နှုန်း လုံးဝ အဆင်ပြေပြီးစီးတာမျိုး မရှိခဲ့ဘူး။ လူထုတောင်းဆိုတဲ့အတိုင်း ကွက်တိလုပ်ပေးတာမရှိခဲ့ဘူး။ တချို့ဟာတွေဆိုရင် ၁ လနဲ့ပြီးတန်တဲ့ဟာမျိုးဆို ၄ လ လား ၆ လ လားအထိ အချိန်ဆွဲပြီးလုပ်တာလေ။” – ဟု စိုင်းဆာလူ ကဆက်ပြောသည်။
နားနျုအုပ်စု ဝမ့်လုံရွာမ ရွာကြီးအတွင်း ငွေရည်ပုလဲ ကုမ္မဏီမှ ကျောက် မီးသွေး တွင်းကြီး ၃ နေရာ တူးဖော်နေရာ – ပိန်းဆိုင်းရွာ ၊ ပန်ငါးရွာ နှင့်နား ကွန်ရွာ အနီးတဝိုက်တို့တွင်ဖြစ်ကြောင်း ဒေသခံများ ပြောပြချက်အရ သိရပါသည် ။
ငွေရည်ပုလဲကုမ္မဏီသည် ၀မ့်လုံ – နမ့်မကျေးရွာအတွင်းသို့ ၂၀၀၀ ပြည့်နှစ် ကတည်းက စတင်ဝင် ရောက်လာပြီး ခန့်မှန်းဧရိယာ ၃၀ ဧကရှိသည့် ပိန်းဆိုင်းရွာ တွင် ၂၀၀၄ ခုနှစ်မှစ၍ ကျောက်မီးသွေး တူး ဖော်ကြောင်း ၊ ဧရိယာ ၅၀ ဧကခန့်ရှိ နားကွန်ရွာတွင် ၂၀၁၄ ကစတင်တူးဖော်ကြောင်း ၊ ထို့ကြောင့် လယ်ယာခြံမြေများ ၊ တောတောင်ရေမြေ သဘာဝပတ်ဝန်းကျင် ၊ ချောင်းရေများပျက်စီးဆုံးရှုံးရကြောင်း ၊ ညစ်ညမ်းသည့်လေ ၊ ညစ်ညမ်း သည့်ရေများကြောင့်ဒေသခံ၏ ကျန်းမာရေး တနေ့တခြား ဆုတ်ယုတ်လာကြောင်း ဒေသခံများပြောပြချက်အရ သိရပါသည် ။
