သျှမ်းတစ်မျိုးသားလုံးအတွက် နိုင်ငံရေး၊ တော်လှန်ရေး စိန်ခေါ်ချက်များကြီးမာနေချိန် ဖြစ်သဖြင့် သျှမ်းလူငယ်အရပ်ဘက်အဖွဲ့အစည်းများမှ “သျှမ်းလူငယ်ကွန်ဂရက်” DYC ကို ဖွဲ့စည်းလိုက်ကြောင်း သတင်းထုတ်ပြန်လာသည်။
အဆိုပါ သျှမ်းလူငယ်ကွန်ကရက်(DYC) သည် အာဏာရှင်စနစ် ဆန့်ကျင်ရေး၊ ဖက်ဒရယ် ဒီမိုကရေစီ ပြည်ထောင်စု ပေါ်ထွန်းလာရေး၊ မိမိတို့ ကြမ္မာ မိမိဖန်တီးခွင့်ရရှိရေး၊ သျှမ်းလူငယ်ထုမှသည် သျှမ်းတစ်မျိုးသားလုံး စည်းလုံး ညီညွတ်ရေး ဆိုသည့် မူဝါဒများအတိုင်း ဖွဲ့စည်းလိုက်ကြောင်း ထုတ်ပြန်ချက်တွင် ရေးသားထားသည်။
လွန်ခဲ့သည် ၂၀၂၄ခုနစ် မေ ၁၃ရက် မှ ၁၅ရက်အထိ သုံးရက်တာ ပထမအကြိမ် “တိုင်း” လူငယ်ထု ညီလာခံ ကျင်းပခဲ့ရာ မှ ဆုံးဖြတ်ချက် တစ်ခုဖြစ်သော သျှမ်းလူငယ်များအကြား ဆွေးနွေးညှိနှိုင်းမှု လမ်းကြောင်းများ ပေါ်ပေါက်လာရေး ဟူသောအချက်အရ ညီလာခံသို့ တက်ရောက်ခဲ့ကြသည့် သျှမ်းလူငယ်အရပ်ဘက်အဖွဲ့အစည်းများမှ DYC ကို ဖွဲ့စည်းလိုက်ခြင်းဖြစ်သည်။
“ ရည်ရွယ်ချက်က အကုန်လုံးကိုပူပေါင်းဖို့ အတွက် ရည်ရွယ်ထားတာပါ။ ပြည်တွင်းကော ပြည်ပမှာကောရှိနေတဲ့ သျှမ်းကွန်ယက်၊ လူငယ်အဖွဲ့အစည်းတွေ၊ ပြီးတော့ နိုင်ငံရေပါတီ နဲ့ သျှမ်းလက်နက်ကိုင်အဖွဲ့တွေ အကုန်ပူးတွဲပြီး အလုပ်လုပ်သွားနိုင်အောင်ပါ။” ဟု DYC ၏ ပြောခွင့်ရ စိုင်းလျန်းပန် က သျှမ်းသံတော်ဆင့်ကို ပြောသည်။
လက်ရှိတွင် သျှမ်းလူငယ်အဖွဲ့အစည်း (၆)ဖွဲ့ဖြင့် ဖွဲ့စည်းထားပြီး၊ လုပ်ငန်းများကိုလည်း ပူးပေါင်းဆောင်ရွက်နေကြောင်း သိရသည်။
“ ကျနော်တို့ ထွက်လာတဲ့ ထုတ်ပြန်ချက်မှာတော့ အဖွဲ့ ၆ ဖွဲ့ရှိပါတယ်။ တခြားအဖွဲ့တွေကြတော့ ဒီလုံခြုံရေးတွေအတွက် သူတို့လည်း နာမည်မထွက်ရဲတာသေးတာပါ။ အလုပ်လုပ်တဲ့အချိန်ကြရင်တော့ အတူပါဝင်လုပ်ဆောင်မှာပါ” ဟု စိုင်းလျန်းပန် က ဆိုသည်။
ထို့အပြင် လက်ရှိတွင် စစ်အာဏာရှင် ဆန့်ကျင်ရေး အတွက် ကဏ္ဍအသီးသီးမှ ကျရာနေရာတွင် စုစည်းပြီး ပါဝင်တိုက်ပွဲဝင်နေကြသော ပြည်တွင်း၊ပြည်ပ နေရာဒေသ အသီးသီးရှိ တော်လှန်ရေး မဟာမိတ် အင်အားစုများနှင့် လည်း လက်တွဲကာ စစ်အာဏာရှင်ကို ဆန့်ကျင်ရေးလုပ်ငန်းများကို ဆောင်ရွက်သွားမည်ဟု DYC ၏ ထုတ်ပြန်ချက်တွင် ရေးသားထားသည်။
Leave a Comments