စစ်ကောင်စီ တပ်စခန်း ဝန်းရံထားသည့် သျှမ်းရှေ့မိုင်းယောင်းမြို့နယ်အတွင်း ကျောင်းသားဦးရေ အလိုက် ရက်သတ်မှတ်ပြီး စာသင်နေပြီး၊ ကျောင်းတက်သူဦးရေသည် တခြားမြို့နယ်ထက်များကြောင်း စုံစမ်းသိရသည်။
ဇွန် (၁)ရက် မှစတင်ကာ စစ်ကောင်စီ ၏ အမိန့်အရ မြန်မာတဝှမ်းလုံးရှိ ပညာသင်ကျောင်းများပြန်ဖွင့်ခဲ့ပြီး သျှမ်းပြည်အတွင်းရှိ တခြားမြို့နယ်များတွင် ကျောင်းတက်သူအများစု စစ်တပ်မိသားစုဝင်များဖြစ်ကြပြီး၊ ကျောင်းတွင် စစ်ကောင်စီ အုပ်စုမှ လုံခြုံရေးလာရောက်ယူထားရကြောင်း သိရသည်။
မိုင်းယောင်းမြို့နယ် သည် စစ်ကောင်စီ တပ်စခန်းဝန်းရံထားသည့် မြို့ဖြစ်ပြီး ယခုနှစ် စာသင်နှစ်တွင် စစ်တပ်မိသားစုဝင်များ ကျောင်းတက်နေရသဖြင့် တခြားမြို့နယ်ထက် ကျောင်းတက်ဦးရေပိုများသည်။
“ ကျမတို့ ဘက်မှာက စစ်တပ်တွေ များတယ်။ နောက်ပြီး စစ်အာဏာရှင်ဆန့်ကျင်မှု က လှုပ်ရှားရခက်တယ်။ ကျောင်းမတက်ရင်လည်း ပြဿနာဖြစ်နိုင်တယ်။ နေရာတိုင်းမှာ တပ်တွေရှိတယ်။ ကလေးတွေ ကျောင်းပို့ရတာရှိတယ်။ တချို့ကတော့ ကိုဗစ် အကြောင်းပြချက်နဲ့ မပို့ကြဘူး” ဟု မိုင်းယောင်း ဒေသခံတဦးက သျှမ်းသံတော်ဆင့်ကို ပြောသည်။
ကိုဗစ်-၁၉ ကူးစက်ရောဂါ ဖြစ်ပွားချိန်နှင့် နိုင်ငံရေး အကြပ်အတည်း ချိန်ကြား ကလေးများကို ကျောင်းလွှတ်ရသော်လည်း စိုးရိမ်မှုများကြောင်း၊ ကျောင်းတွင် ကိုဗစ် စံနှုန်းဖြင့် ကျောင်းသားဦးရေ အကန့်လိုက် သင်ကြားပေးနေကြောင်းလည်း သိရသည်။
လက်ရှိ မိုင်းယောင်းမြို့နယ်အတွင်းကျောင်းတက်သည့်သူများသည် တပ်မိသားစုဝင်များသာမက ပြည်သူများပါကြောင်း၊ စစ်တပ်များစွာ ဝန်းရံသည့်မြို့ ဖြစ်သည့်အတွက် စိုးရိမ်မှုများစွာရှိကြောင်း လည်း မိုင်းယောင်းဒေသခံ က ပြောသည်။
