သျှမ်းပြည်မြောက်ပိုင်း လားရှိုးမြို့နယ် ကျေးလက်ကျောင်းသူတဦး ၂၀၁၇-၂၀၁၈ တက္ကသိုလ်ဝင်တန်း စာမေးပွဲတွင် ၆ ဘာသာဂုဏ်ထူးဖြင့် အောင်မြင်ကြောင်းသိရသည်။

ဇွန်လ ၂ ရက်နေ့က ထုတ်ပြန်သော ၂၀၁၇-၂၀၁၈ တက္ကသိုလ်ဝင်တန်းစာမေးပွဲအောင်စာရင်းထုတ်ပြန်ရာတွင် လားရှိုးမြို့အရှေ့ဘက် ၂ မိုင်ခန့်အကွာရှိ ဟတ်ကာကျေးရွာတွင်နေထိုင်သည့် ကျောင်းသူ နန်းမြစိန် အသက် ၁၆ နှစ်သည် ဘာသာစုံဂုဏ်ထူးဖြင့် နှစ်ချင်းပေါက်အောင်မြင်ခဲ့ကြောင်းသိရသည်။

ကျမ စာမကြိုးစားရင် ထူးထူးချွန်ချွန်နဲ့မအောင်မြင်ရင် မိဘတွေလိုဘဲ လယ်ယာထဲပြန်ဆင်းရမယ်။ ကျမ ထူးချွန်ပေါက်မြောက်အောင်မြင်ရင် ကျမတို့ကျေးလက်သူတွေ အနာဂတ်တိုးတက်မှု ရရှိမယ်။ အကောင်းဆုံးဖြစ်စေချင်ပါတယ်။ ကျမ ဆရာဝန်ဖြစ်ချင်ပါတယ်။ ဆရာဝန်ဖြစ်ရင် ကျမတို့ရွာသားတွေကို ဆေးကုပေးချင်တယ်။ မရှိဆင်းရဲသားတွေကို အခမဲ့ဆေးကုပေးမယ်လို့ ဆန္ဒရှိပါတယ်။ – ဟု ၆ ဘာသာဂုဏ်ထူးရှင် နန်းမြစိန် ကသျှမ်းသံတော်ဆင့်အားပြောသည်။

နန်းမြစိန်သည် လားရှိုးမြို့အရှေ့ဘက် ဟိုနားကျေးရွာအုပ်စု ဟတ်ကာကျေးရွာနေ လုံးစိုင်းထွန်းနှင့် ပါ့နန်းညွန့်တို့၏ သမီးဖြစ်ပြီးမောင်နှမ ၃ ဦးရှိပါသည် ။ လားရှိုးမြို့ အထက ၄ တွင် ပညာသင်ကြားခဲ့ပြီး တက္ကသိုလ်ဝင်တန်းဖြေဆိုအောင်မြင်ခဲ့ကြောင်းသိရသည်။