သျှမ်းပြည် မြောက်ပိုင်း မူဆယ်မြို့ အဝင် တိုးဂိတ် ၌ ယနေ့ ည ၈နာရီခွဲတွင် ဗုံးပေါက်ကွဲမှု ဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ မူဆယ်မြို့ အဝင် တိုးဂိတ် တွင် အမည်မသိ လက်နက်ကိုင် ၂ဦးသည် ဆိုင်ကယ် မောင်းနှင်လာပြီး အိတ်ကို တိုးဂိတ် ငွေကောက် ကောင်တာ အတွင်းသို့ ပစ်ချခဲ့သည်၊ ထိုပစ်ချလိုက်သည်ကို သိသိချင်း ငွေကောက်နေသူက ထွက်ပြေးသဖြင့် လူထိခိုက်မှုမရှိခဲ့ကြောင်း မျက်မြင်အမျိုးသားတဦးက သျှမ်းသံတော်ဆင့်ကို ပြောသည်။
“ ကုန်ကားတွေ များနေတော့ တိုးဂိတ်ကို ပိတ်ထားတာ။ အဲ့မှာ လူ ၂ ဦးဆိုင်ကယ် မောင်းလာပြီး အိတ်အနက်ရောင်ကို လာပစ်ချသွားတယ်။ ငွေကောက်နေတဲ့ ကလေးက ထွက်ပြေးပြီးသတင်းပို့နေချိန်မှာပဲ ပေါက်ကွဲသွားတာ။လူမထိဘူး” ဟု အဆိုပါ မျက်မြင်အမျိုးသားက ဆိုသည်။
ပေါက်ကွဲမှု ပြင်းထန်သော်လည်း လူထိခိုက်မှု တစုံတရာမရှိကြောင်း၊ ပေါက်ကွဲမှုကြောင့် တိုးဂိတ် တခုလုံး ပျက်စီးသွားကြောင်းလည်း မူဆယ်မြို့ မှ အမည်မဖော်လိုသူ အစိုးရ ဝန်ထမ်းတဦးက ပြောသည်။
“ဒီချိန်က အားလုံး မျက်နှာဖုံး၊နှာခေါင်းစည်း ( Mask) တပ်တော့ ဘယ်လို ပုံစံဆိုတာ ပြောရခက်တယ်။ ဒါပေမယ့်ကျနော်တို့ CCTVပြန်ကြည့်နေကြပါတယ်” ဟု ၎င်း တာဝန်ရှိသူ က ပြောသည်။
ကိုဗစ်-၁၉ ကာကွယ်ထိန်းချုပ်သည့် အချိန်ကာလ ဖြစ်သည့် အလျောက် ဗုံးပေါက်ကွဲမှုကလည်း ဆက်တိုက်ဖြစ်နေသည့် အပေါ် စိုးရိမ်ထိတ်လန့်နေကြောင်း လည်း မူဆယ်ဒေသခံများက ပြောသည်။
“ အခုကာလက ကိုဗစ်-၁၉ ကာကွယ်ထိန်းချုပ်တဲ့ ကာလဖြစ်တယ်။ လူတွေကတော့ အပြင်မထွက်ပေမယ့်ဒီကလူတွေက ဗုံးလည်းလန့်ရ၊ ရောဂါလည်း လန့်နေရတယ်။ သတိတော့ရှိရတာပေါ့” ဟု မူဆယ်ဒေသခံ စိုင်းမောဝ် က ပြောသည်။
လွန်ခဲ့သည့် ဧပြီ ၁၂ ရက်ကလည်း မူဆယ်မြို့ ဆက်သွယ်ရေးရုံးအနီးရှိ MPTရုံးခန်းတွင် ပေါက်ကွဲမှုဖြစ်ပွားခဲ့ပြီး၊ ဧပြီ ၂၃ရက်တွင်လည်း မူဆယ်မြို့ စွမ်စော်ရပ်ကွက်ရှိ ပန်းဆေး ပြည်သူ့စစ်ပိုင် အဆောက်အဦး ပေါက်ကွဲခံခဲ့ရသည်။
မူဆယ်မြို့ သည် တရုတ်နယ်စပ်မြို့ ဖြစ်ပြီး လက်ရှိ အချိန်ကာလတွင် တရုတ်ပြည်မှ ပြန်လာသည့် ရွှေ့ပြောင်းအလုပ်သမားများ မူဆယ်မြို့တွင် တထောင်ကျော် သောင်တင်နေသည်။
.
.
