ကော်တိုင်း သျှမ်းပညာရေးအဖွဲ့အစည်း တည်ထောင်ခြင်း ၁၉ နှစ်ပြည့်အခမ်းအနားတရပ်ကို သျှမ်းပြည်တောင်ပိုင်းကွန်ဟိန်းမြို့နယ် ကာလိမြို့နယ်ခွဲရှိ အမျိုးသားကောလိပ်တွင် ကျင်းပရာ တက်ရောက်သူလူဦးရေစုစုပေါင်း ၃၀၀ ရှိကြောင်းသိရသည်။
အဆိုပါအခမ်းအနားတွင် ကော်တိုင်းအမျိုးသားကောလိပ်မှအကြီးအကဲများ ဆရာ ဆရာမ များ က ကော်တိုင်းပညာရေးအဖွဲ့ ဖြစ်ပေါ်လာပုံ၊ ကော်တိုင်းကောလိပ်၏လုပ်ငန်းများကိုရှင်းပြရာ အခမ်းအနားတက်ရောက်သူများက ပြန်လည်မေးမြန်းမှု ၊ ဖြေကြားမှုများရှိခဲ့ကြောင်းသိရသည်။
ကော်တိုင်းကောလိပ်မှ ဒါရိုက်တာ စိုင်းဖုန်းခေါင်က -“ အမျိုးသားရေး၊ နိုင်ငံရေး ဖွံ့ဖြိုးတိုးတက်ဖို့အတွက် ပညာရေးဟာအဓိကဘဲ။ ငွေကြေးချမ်းသာကြွယ်ဝ ပြီး ပညာမရှိရင် သူများကိုဘယ်တော့မှမှီနိုင်မှာမဟုတ်ဘူး။ မကြာခင်မှာဘဲကိုယ့်အမျိုးသားရေးပျောက်ကွယ်သွားမှာဘဲစိုးရိမ်ရတယ်။ ဒါကြောင့် မိဘပြည်သူလူထုကို တခုတိုက်တွန်းချင်ပါတယ်။ ကိုယ့်သားသမီးမြေးမြစ်တွေကိုပညာရေးမှာ မြှင့်တင်အားပေးကြပါ။ ”- ဟု ပြောဆိုသည်။
ကော်တိုင်းပညာရေးအဖွဲ့အား ၁၉၉၉ ခုနှစ်ကစတင်ဖွဲ့စည်းခဲ့ပါသည်။ သျှမ်းလူငယ်ထုအား ပညာရေး၊ နိုင်ငံရေး၊ ပြန်ကြားရေး၊ လူမှုရေး၊ အင်္ဂလိပ်စာနှင့်စကားပြော ၊ အခြေခံကွန်ပြူတာ၊ ဒေသဖွံ့ဖြိုးရေးတို့တွင် ပို့ချမြှင့်တင်ပေးခဲ့ပြီး သျှမ်းလူငယ်များ နိုင်ငံတကာသို့တက္ကသိုလ်များဆက်လက်သင်ကြားခွင့်ရရေး ကူညီဆောင်ရွက်ပေးခဲ့သည်။ မိခင်အဖွဲ့အစည်းထံပြန်လာပြီးကူညီမှုပေးနေသည့် ဘွဲ့ရလူငယ် ၃၀ ခန့်ရှိပါကြောင်း၊ လက်ရှိတွင် အမျိုးသားကျောင်းအား ကွန်ဟိန်းမြို့နယ် ကာလိမြို့နယ်ခွဲ ၊ သီပေါမြို့နယ် မိန်းခေးအုပ်စုနှင့် နမ့်စန်မြို့နယ် ပန်လျန်းဆိုင်တို့တွင် ဖွင့်လှစ်ထားကြောင်းသိရပါသည်။
