သျှမ်းပြည် တောင်ပိုင်း ပင်လုံမြို့တွင် တည်ရှိသည့် သမိုင်းဝင် ပင်လုံကျောက်တိုင်ပေါ်တွင် ရေးသားထားသည့် စားသားများကို မူလ အတိုင်း ပြန်လည်ပြင်ဆင်ကြောင်း သတင်းရရှိသည်။

ပင်လုံ ကျောက်တိုင် တွင် “ ပြည်မ တောင်တန်း ပူးပေါင်းရေး စာချုပ်” အစား မူလ စာဖြစ်သည့် “ တောင်တန်း ပြည်မ ပူးပေါင်းရေး စာချုပ်” ကို ယနေ့ (ဇန်နဝါရီ ၁၀) ရက်တွင် ပြန်လည်ပြင်ဆင်နေ ကြောင်း ပင်လုံ ဒေသခံများပြောပြချက် အရ သိရသည်။

“ အရင် ပြည်မ တောင်တန်း စာလုံးကို မူလ“ တောင်တန်း ပြည်မ” အဖြစ် ပြန်ပြင်တာပါ။ ဒီနေ့ ၁နာရီ မှာ စ လာပြင်တာ” ဟု ပင်လုံမြို့ဒေသခံ ဆေနော် က သျှမ်းသံတော်ဆင့် သို့ ပြောသည်။

အဆိုပါ“ ပြည်မ တောင်တန်း ” အစား မူလစာ “ တောင်တန်း ပြည်မ” ကို ပြင်ဆင်ရန် အတွက် ဒီဇင်ဘာ ၁၈ ရက်တွင် ကျင်းပသည့် ဒုတိယအကြိမ် သျှမ်းပြည် လွှတ်တော် (၁၇)ကြိမ်မြောက် ပုံမှန် အစည်းအဝေးတွင် မိုင်းရှုးမြို့နယ် မဲဆန္ဒနယ် အမှတ်(၁) ပြည်နယ် လွှတ်တော် ကိုယ်စားလှယ် စိုင်းလင်းမြတ် ရဲ့ ပင်လုံကျောက်တိုင်း မှာ ရေးထိုးထားသည့်ကဗ္ဗည်း မော်ကွန်း ရေးထိုးထားမှုကို မေးမြန်းခဲ့သည်။

ထို့ကြောင့် “ ပြည်မ တောင်တန်း” ကို ၇၃ နှစ် မြောက် ပြည်ထောင်စု နေ့ မတိုင်မီ မူလ အတိုင်း ပြန်လည် ပြင်ဆင်သွားမည် ဟု သိရသည်။

“ ကျနော်အခု ပင်လုံ ကျောက်တိုင် ပြင်ဆင်တဲ့နေရာမှာ ရှိပါတယ်။ အဓိကတော့ ပြည်သူတွေကို သမိုင်းမှန်သိစေချင်တယ်။ နောက် သမိုင်းမှန် ဖြစ်စေချင်တယ်” ဟု မိုင်းရှူးမြို့နယ် မဲဆန္ဒနယ် အမှတ်(၁) ပြည်နယ်လွှတ်တော် ကိုယ်စားလှယ် စိုင်းလင်းမြတ် က ဆိုသည်။

တောင်တန်းက ပြည်မကို သွားပြီး ပူးပေါင်းတာ မဟုတ်ကြောင်း၊ ပြည်မ က တောင်တန်းကို လာရောက် ပူးပေါင်းသည့်အတွက် တောင်တန်း ပြည်မ ဟု သုံးနှုန်းဲ့ကြောင်း လွိုင်လင်မြို့နယ် မဲဆန္ဒနယ် အမှတ်(၂) နန်းမြထွေး က ပြောသည်။

“အခုလို ပြင်တာ ဝမ်းသာပါတယ်။ သမိုင်းမှန်ဖြစ်ဖို့ အတွက် ပြင်စရာတွေ အများကြီးရှိသေးတယ်။ လူငယ်တွေ အနေနဲ့လည်း သမိုင်းမှန် သိဖို့လိုအပ်ပါတယ်” ဟု နန်းမြထွေး က ဆိုသည်။

သျှမ်းပြည် တောင်ပိုင်း ပင်လုံမြို့တွင် ရှိသည့် ပင်လုံ ကျောက်တိုင်ကို ၁၉ ၄၇ ခုနစ် ဖေဖော်ဝါရီ ၁၂ ရက် ၌ ပင်လုံစာချုပ်လက်မှတ်ရေးထိုးခဲ့သည့် စားပွဲနေရာတွင် ဗိုလ်ချုပ်အောင်ဆန်း ကိုယ်တိုင် ၁၂ပေ တိုင် ရှည်သည့် သပြေတိုင် တခုကို အထိမ်းအမှတ်ဖြင့် တောင်တန်း ပြည်မ ပူးပေါင်းရေး ကျောက်တိုင် ဟု ကမ္ပည်း ရေးထိုးခဲ့ကြောင်း သိရသည်။