သျှမ်းပြည်တောင်ပိုင်းလင်းခေးမြို့နယ် တောင်ဘက် ၄ မိုင်ခန့်အကွာရှိ နားလင်းရွာတွင် မိုင်းဖုန်းဆရာတော် အမည်ရ အရှင် ဉာဏသံဝရ အမှူးပြုတည်ထားသည့် စေတီတော်တဆူအား ဆရာတော်၏ သက်တော် ၅၅ နှစ်ပြည့်အထိမ်းအမှတ်အဖြစ် ရည်စူးကာ လင်းခေးမြို့ခံများ ယနေ့စုပေါင်းထီးတော်တင်ကြသည်။
ဂျန္နဝါရီလ ၅ ရက်နေ့ ယနေ့နံနက် ၁၀ နာရီက လင်းခေးမြို့နယ် သံဃာတော်ကြီးများ ၅၀ ကျော် ဦးဆောင်ကာ လင်းခေးဒေသခံ ရာဂဏန်းက မိုင်းဖုန်းဆရာတော် သက်တော် ၅၅ နှစ်ပြည့်အလှူအဖြစ် ဆရာတော်တည်ထားကိုးကွယ်သော လင်းခေးမြို့ နားလင်းရွာရှိ စေတီတော်အားဆွမ်းကပ်လှူဒါန်းကာ ထီးတော်တင် ရေစက်ချခဲ့ကြခြင်းဖြစ်သည်။
“နိဗ္ဗာန်စျေးရှိပါတယ်။ စေတနာရှင် ၁၀ ကျော်ရှိပါတယ်။တချို့လည်း ထမင်းထုတ် ဟင်းထုတ်၊ တချို့ကလည်းခေါက်ဆွဲကြော် ၊လဘက်ရည် ၊ ကြာဆံကြော် ၊ တချို့ကလည်း ကောက်ညှင်းထုတ် စတာတွေလာလှူပါတယ်။ ပွဲလည်းတော်တော်စည်တယ်။ လာရောက်လှူဒါန်းတဲ့ပရိသတ် ၅၀၀ လောက်ရှိမှာပါ။ ထူးခြားတာတခုက ဖိတ်ကြားထားတဲ့သံဃာတော် ၁၀၈ ပါးအနက် ၅၆ ပါးဘဲ ကြွချီတယ်။ ဆရာတော်ရဲ့သက်တော်နဲ့အကိုက်ဖြစ်နေတယ်”- ဟု စားသောက်ဖွယ်ရာများသွားရောက်လှူဒါန်းသည့် လင်းခေးမြို့ခံ ပါ့နန်းလောဝ်က သျှမ်းသံတော်ဆင့်အားပြောပြသည်။
စေတီတော်မှာ ၂၀၁၅ ခုနှစ် လင်းခေးမြို့နယ် နှစ် ၅၀ ပြည့် ကမ္မဌာန်းကျောင်းတိုက် သံဃာ့ညီလာခံကြီးကျင်းပစဉ်က မိုင်းဖုန်းဆရာတော်ညီလာခံသွားတက်စဉ် စေတီတော်တည်ထားရန် မိန့်မှာထားပြီး စေတီတော်တည်ရန်လည်း မတည်ငွေကျပ် ၅ သိန်းခန့် ပေးထားကြောင်း၊ ဒေသခံလူထု အင်အားဖြင့် စေတီတော်အား တည်ထားနိုင်ခဲ့ပြီး ဆရာတော်သက်တော် ၅၅ နှစ်ပြည့် ယနေ့မှသာထီးတော်တင်ရေစက်ချခဲ့ကြောင်း သိရသည်။
လင်းခေး ၀မ့်ဟတ်ကားလမ်းပေါ်ရှိ အဆိုပါ စေတီ၏ အရှေ့ဘက် ၁ မိုင်ခန့်အကွာတွင်လည်း မိုင်းဖုန်းဆရာတော်ညွှန်ကြားမှုဖြင့် တရားကျင့်ရန်သင့်လျော်သည့် ဂူတလုံးကိုလည်း ပြီးခဲ့သည့်လကပင် လင်းခေးမြို့ခံများသွားရောက်ရှင်းလင်းကာ ဂူအသွားလမ်းကိုပါ လမ်းဖောက်ထားကြောင်းသိရပါသည်။
