သျှမ်းပြည်မြောက်ပိုင်း နမ့်ခမ်းမြို့တွင် TNLA မှ ဖမ်းဆီးထားသော နမ့်ခမ်းမြို့သူ ကလေး ၃ ဦးမိခင် နန်းမိုဟွမ် ပြန်လည်လွှတ် မြောက်ရေးအတွက် မိသားစုဝင်များ က ငြိမ်းချမ်းစွာဆန္ဒပြ တောင်းဆို သွား မည်ဖြစ်ကြာင်းသိရသည်။
စက်တင်ဘာလ ရ ရက်နေ့ သောကြာနေ့တွင် မိသားစုဝင်များ ဆွေမျိုးသားချင်းများ က စုပေါင်းကာ မြို့လယ်ဘုရားကျောင်းရှေ့တွင် “ နန်းမိုဟွမ်အား အမြန်ဆုံးပြန်လွှတ်ပေးရန်” ဆန္ဒထုတ် ဖော်သွားမည်ဖြစ်ပြီး ဒေသတွင်းလုံခြုံရေးတပ်ဖွဲ့နှင့် အရံမီးတပ် တပ်ဖွဲ့တို့မှ လုံခြုံရေးယူပေးမည်ဖြစ်ကြောင်း မိသားစုနှင်းနီးစပ်သူ နမ့်ခမ်းဒေသခံ စိုင်းအိုက်ကပြောသည်။
“မနေ့က မိသားစုက နိုင်ငံတော်အကြီးအကဲနဲ့ သက်ဆိုင်ရာအာဏာပိုင်တွေကို စာရေးသားပေးပို့တယ်။ နန်းမိုဟွမ် အမြန်ဆုံးပြန် လည်လွှတ်မြောက်ရေးအတွက် ကူညီဆောင်ရွက်ပေးဖို့။ တဖက်ကလည်း မြို့နယ်အုပ်ချုပ်ရေးတို့ ရဲတို့ကို ငြိမ်းချမ်းစွာ ဆန္ဒထုတ် ဖော်ခွင့် ခွင့်ပြုချက်တောင်းတယ်။ မြို့နယ်အုပ်ချုပ်ရေးမှူးကပြောတယ် လူမျိုးရေးပြသနာဖြစ်လာရင်ဘယ်သူတာဝန်ယူမလဲ တဲ့။ ကျနော်တို့လုံခြုံရေး ကျနော်တို့ဘဲ ပြန်ပြီးတာဝန်ူယူနေရတယ်လေအခုလည်းဘဲ။ ဒါမယ့် ဒီနေ့မနက် ခွင့်ပြုစာကျလာတယ်။ ရ ရက်နေ့မှာ ဆန္ဒပြခွင့်ပေးတယ်။” – ဟု နမ့်ခမ်းမြို့ လူမှုညီ ညွတ်ရေး အသင်း UP အဖွဲ့ဝင်လူငယ်လည်းဖြစ်သည့် စိုင်းအိုက် က သျှမ်းသံတော်ဆင့်အားပြောသည်။
တဖက်တွင်လည်း နမ့်ခမ်းမြို့တွင်းအဖွဲ့အစည်းများဖြစ်ကြသော သံဃာတော်များအဖွဲ့၊ ရပ်ကွက်အုပ်ချုပ်ရေးမှူးများအဖွဲ့၊ အုပ်စုအုပ်ချုပ် ရေးမှူးများအဖွဲ့ ၊ စာပေယဉ်ကျေးမှုအဖွဲ့၊ ကျားဖြူပါတီ၊ လူမှုညီညွတ်ရေးအသင်း၊ တောင်သူလယ်သမား များအဖွဲ့၊ အမျိုးသမီးရေးရာ အဖွဲ့ (ကျားဖြူပါတီ) ၊ လူငယ်ကွန်ယက်၊ သျှမ်းလူငယ်များအဖွဲ့ တို့ကလည်း စာရေးစုပေါင်း လက်မှတ် ရေးထိုးကာ နန်းမိုဟွမ် အမြန်ဆုံးပြန် လည်လွှတ်မြောက်ရေး ကူညီဆောင်ရွက်ပေးရန် ဌာနဆိုင်ရာ အကြီးအကဲများအား ယမန်နေ့က တင်ပြပေးပို့ခဲ့သည်။
TNLA တအာင်း ဘက်ကမူ ယမန်နေ့ စက်တင်ဘာလ ၃ ရက်နေ့က ကြေငြာချက်တစောင်ထုတ်ပြန်ရာ – TNLA အကောက်ခွန်ဦးစီးဌာနမှ အကောက်ခွန်ဝန်ထမ်းများ လုပ်ငန်းတာဝန် ထမ်းဆောင်စဉ် အပြင်းအထန်ထိခိုက်သေဆုံးစေသည်အထိ နန်းမိုဟွမ်မှ တာဝန် ၀တ္တရား နှောင့် ယှက်ခဲ့သောကြောင့် နန်းမိုဟွမ်အား ရာဇသတ်ကြီး ဥပဒေပုဒ်မ ၃၃၃ ဖြင့် PSLF/TNLA ၏ ဗဟိုတရားရုံးမှ အမှုဖွင့်အရေးယူထားသည်- ဟု ကြေငြာချက်တွင် ပါရှိပါသည်။
နိုင်ငံတော်၏ ရာဇသတ်ကြီးပုဒ်မ ၃၃၃ တွင် -ပြည်သူ့ဝန်ထမ်းအဖြစ်ဖြင့် တာဝန်ဝတ္တရား ဆောင်ရွက်နေသော ပြည်သူ့ဝန်ထမ်းအားနာကျင်စေလျှင် ၁၀ နှစ်အထိ ထောင်ဒဏ်အမျိုးမျိုးချမှရမည့်အပြင် ငွေဒဏ်လည်းချမှတ်နိုင်သည် – ဟု ပါရှိပါသည်။
ယမန်နှစ် ၂၀၁၇ ဇူလိုင်လက အိမ်ဆောက်ပစ္စည်းရေးဝယ်ရေးဆိုင်ရှင် နန်းမိုဟွမ် မိသားစု အား ပိုက်ဆံ ၁၁ သိန်း ဆက်ကြေး ကောက်ခံ အပြီးအပြန် TNLA တပ်သား ၂ ဦးအား လမ်းတွင် အစိုးရတပ်မတော်က ခြုံခိုတိုက်ခိုက်ရာ တပ်သားတဦး သေဆုံးပြီး တဦးအား ဖမ်းဆီးခဲ့သည်။ ၄င်းဖြစ်စဉ်မှာ နန်းမိုဟွမ် မှသတင်းပေးမှုကြောင့်ဟု TNLA က စွပ်စွဲကာ သြဂုတ်လ ၁၇ ရက်နေ့က နေအိမ်၌ ကလေးလေးအား နန်းမိုဟွမ် မနက်စာခွံ့နေစဉ် သေနတ်ဖြင့်ထိုးချိန်ကာ ဖမ်းဆီးခေါ်ဆောင်သွားခဲ့သည်။ စက်တင်ဘာလ ၅ ရက်နေ့တွင် ရက် ၂၀ ပြည့်ပြီဖြစ်သည်။
