သျှမ်းပြည်မြောက်ပိုင်း သီပေါမြို့နယ် အောင်မင်္ဂလာဘိုးတော်ဘုန်းကြီးကျောင်းရောက် နမ္မတူဒေသခံ စစ်ဘေးရှောင် ၂၀၀ ကျော်မှာ နေရပ်ပြန်ပြီး လယ်ယာစိုက်ပျိုးရေးလုပ်ငန်းများလုပ်ကိုင်လိုပါသော်လည်း နေ့စဉ်နှင့်အမျှ ကြားနေရသော ပစ်ခတ်သံများကြောင့် နေရပ်မပြန်နိုင်သေးကြောင်းသတင်းရရှိသည်။
ပန်လုံအုပ်စု ပန်လုံရွာမှ ဒေသခံတဦးက – “ဒီမနက် သြဂုတ်လ ၂၂ ရက် သေနတ်သံထပ်ထွက်တယ်။ ဘယ်အဖွဲ့နဲ့ဘယ်အဖွဲ့ တိုက်ကြတယ် လို့တော့မသိဘူး။ ကျနော်တို့ အခြေအနေ စောင့်ကြည့်နားထောင်နေပါတယ်။ တကယ်လို့တိုက်ပွဲပြင်းထန် လာရင်တော့ ကျနော်တို့ ရွာမှာကျန်နေတဲ့လူတွေ အကုန်လုံး သူတို့(သီပေါရောက်နေသူတွေ) နောက်လိုက်သွားရမှာ။ အဲ့ကြောင့် သူတို့ကိုဖုန်းဆက်တာ ရွာကိုမပြန်လာသေးဖို့ ”- ဟု ရွာအကြီးအကဲ အဖွဲ့ဝင်တဦး က သျှမ်းသံတော်ဆင့် အားပြောသည်။
နမ္မတူမြို့နယ် ပန်လုံအုပ်စုမှ ဒေသခံရွာသားများမှာ တအာင်းတပ်ဖွဲ့နှင့် သျှမ်းပြည်တပ်မတော် RCSS/SSA တို့အကြားတိုက်ပွဲများ ကြောင့် သီပေါမြို့နယ်သို့ရောက်ရှိခိုလှုံနေသည်မှာ ၈ ရက်ခန့်ကြာပြီဖြစ်သော်လည်း ပစ်ခတ်သံများငြိမ် သက်ခြင်းမရှိသေး သောကြောင့်နေရပ်သို့မပြန်နိုင်သေးကြောင်း ၊ လယ်ယာစိုက်ပျိုးရေးလုပ်ငန်းမလုပ်ကိုင်နိုင်သောကြောင့် ၀မ်းရေးအတွက် အထူးစိုးရိမ်နေကြကြောင်း စစ်ဘေးရှောင်များကပြောသည်။
“ဒီတစ်လ နှစ်လထဲမှာဘဲ ကျမတို့ စစ်ဘေးရှောင်နေရတာ ၄ ကြိမ်ရှိပြီ။ ဒီတခေါက်လည်းဒီကျောင်းမှာခိုလှုံနေတာ ၈ ရက်ကြာပြီ။ ကျမတို့အိမ်ပြန်ချင်ပြီ။ လယ်ယာလုပ်ငန်းတွေ ကျမတို့မလုပ်ရဘူး။ မြေပဲတွေလည်းနှုတ်ပြီး ယာထဲမှာဒီတိုင်းပစ်ထားရတာ။ ဒီမနက်ပိုင်း ရွာမှာကျန်ခဲ့တဲ့ အဘိုးတွေဖုန်းဆက်လာတယ်။ ပစ်ခတ်သံရှိနေတုန်းဘဲ။ ပြန်မလာသေးနဲ့ဆိုလို့ ကျမတို့ ၁ ရက် ၂ ရက်ထပ်ပြီးစောင့်ကြည့်ရဦးမယ် ”- ဟု စစ်ရှောင် သားသည်မိခင် နန်းအေး က သျှမ်းသံတော်ဆင့်အား ပြောသည်။
မြောက်ပိုင်းမဟာမိတ်တပ်ဖွဲ့နှင့် သျှမ်းပြည်တပ်မတော် RCSS/SSA တို့အကြား သြဂုတ်လ ၁၅ ရက်နေ့က တိုက်ပွဲများဖြစ်ပွါးရာ ပန်လုံအုပ်စု ၈ ရွာမှ ဒေသခံရွာသားများ မန်စံ၊ မိုင်းမု ဘက်သို့လည်းကောင်း၊ နမ္မတူမြို့တောင်ဘက် နမ္မတူမြစ်မရောက်ခင် မန်လီရွာ၊ ပန်ဆပြေရွာရှိ ဘုန်းကြီးကျောင်းများသို့လည်းကောင်းအသီးသီး စစ်ဘေးတိမ်းရှောင်ခိုလှုံခဲ့ကြသည်။
၂၁ ရာစု ပင်လုံညီလာခံ တတိယအကြိမ် ကျင်းပပြီးနောက်ပိုင်း ကျောက်မဲ နမ္မတူဘက်တွင် အစိုးရတပ်နှင့် တအာင်း တပ်ဖွဲ့တို့ ၁၅ ကြိမ်ထက်မနည်း တိုက်ပွဲများဖြစ်ပွါးခဲ့သည်ဟု တအာင်းပြန်ကြားရေးကထုတ်ပြန်ခဲ့ပြီး ၊ သျှမ်းပြည်ပြန်လည် ထူထောင်ရေး ကောင်စီ သျှမ်းပြည်တပ်မတော် RCSS/SSA နှင့် မြောက်ပိုင်းမဟာမိတ်တပ်ဖွဲ့တို့လည်း တိုက်ပွဲများ ဆက်တိုက်ဖြစ်ပွါးနေသဖြင့် အဆိုပါဒေသမှ ဒေသခံလူထုမှာ လယ်ယာလုပ်ငန်းမလုပ်နိုင်ကြဘဲ စစ်ဘေးရှောင်တိမ်းနေရသည်။
