သျှမ်းပြည်မြောက်ပိုင်း မူစယ်မြို့တွင်ကျင်းပသော သျှမ်းနှစ်သစ်ကူးပွဲတော်၌ ထူးချွန်ပုဂ္ဂိုလ်များအား နှစ်စဉ်ပေးအပ်မြဲ ဖြစ်သော စဝ်ဆေခန်ဖှ (သိုခန်ဘွား) ဆုကို ယခုနှစ် ဒေါက်တာစိုင်းခမ်းလိတ်အား ရွေးချယ်ကာ အပ်နှင်းခဲ့ကြောင်းသိရသည်။
သျှမ်းနှစ်သစ်ကူးပွဲတော်အား မူစယ်မြို့လွယ်တိန်ခမ်းကျောင်းတိုက်တွင် နို၀င်ဘာလ ၁၈ ရက်မှ ၂၀ ရက်နေ့အထိ ကျင်းပခဲ့ပါသည်။
မူစယ်မြို့ သျှမ်းစာပေယဉ်ကျေးမှုကော်မတီမှလူငယ်ခေါင်းဆောင် စိုင်းဟင်လိတ်က – “ကျနော်တို့ ဒီဆုကို စာပေပိုင်းဆိုင်ရာမှာထူးချွန်ထက်မြက်သူ၊ လူမှုရေးအသိုင်းအဝိုင်းမှာ တက်ကြွလှုပ်ရှားသူ၊ အနုပညာပိုင်းမှာ ထူးချွန်ထက်မြက်သူတွေကိုရွေးချယ်ပြီး ချီးမြှင့်ပေးအပ်တယ်။ ဒီနှစ်မှာတော့ကျနော်တို့ ဆရာ ဒေါက်တာစိုင်းခမ်းလိတ်ကို စဝ်ဆေခန်ဖှ ဆု ချီးမြင့််အပ်နှင်းတယ်။ ရွှေတကျပ်သား ဆွဲပြားနဲ့ ဂုဏ်ပြုလွှာပေါ့”- ဟု သျှမ်းသံတော်ဆင့်အား ရှင်းပြသည်။
နို၀င်ဘာလ ၁၉ ရက်နေ့က မူစယ်ရပ်ကွက် ၂ ရှိ မောက်ကော်ဆွဲ့ခန်းမ တွင် ဆရာစိုင်းခမ်းလိတ်အား ဂုဏ်ပြုဆုချီးမြှင့်ကာ ကန်တော့ခြင်းအခမ်းအနားကျင်းပခဲ့သည်ဟုသိရပါသည်။
ယမန်နှစ်က စစ်ရေးအခြေအနေကြောင့်မူစယ်မြို့တွင် သျှမ်းနှစ်သစ်ကူးပွဲတော်မကျင်းပခဲ့ရပေ။ မူစယ်မြို့ သျှမ်းစာပေနှင့်ယဉ်ကျေးမှုကော်မတီသည် ထူးချွန်သူများအား စဝ်ဆေခန်ဖှ ဆုချီးမြှင့်လာခဲ့သည်မှာ ခရစ်သက္ကရာဇ် ၂၀၀၀ ခုနှစ် (သျှမ်းသက္ကရာဇ် ၂၀၉၅ ခုနှစ်) ကတည်းကဖြစ်ပါသည်။
၂၀၉၅ ခုတွင် တေးရေးဆရာ စိုင်းမောဝ်ခမ်းမူစယ်အားလည်းကောင်း၊ ၂၀၉၆ ခုနှစ်တွင် သျှမ်းစာပေဖွံ့ဖြိုးတိုးတက်ရေးလုပ်ဆောင်သူ သျှမ်းစားပေပညာရှင် ဆရာကြီးလုံးတန်းကေး တောင်ကြီးအားလည်းကောင်း၊ ၂၀၉၇ တွင် သမိုင်းနှင့်စာပေ ပညာရှင် ဆရာစိုင်းအောင်ထွန်း ရန်ကုန်အားလည်းကောင်း ၂၀၉၈ တွင် လူမှုရေးပိုင်းဆိုင်ရာ လှုပ်ရှားသူ ဆရာ လုံးဆေဟုံမိန်း နမ့်ခမ်းအားလည်းကောင်း ချီးမြှင့်ခဲ့သည်။ ၂၁၀၇ တွင်သျှမ်းစာပေပညာရှင်ဆရာလုံးစိုင်းဖှ နမ့်တူ အား ဆုပြန်လည်ချီးမြှင့်ခဲ့သည်။ ၂၁၁၂ ခုသျှမ်းနှစ်သစ်ကူး ယခုနှစ်တွင် ဆရာစိုင်းခမ်းလိတ်အား ၆ ဦးမြောက် ဆုရှင်အဖြစ် ဆုချီးမြှင့်ခဲ့ပါသည်။
