သျှမ်းပြည်နယ် မြောက်ပိုင်း မူစယ် ကွတ်ခိုင် ကြား မန်လွယ်ကျေးရွာ ရှုခင်းသာ အတက် တွင် ယမန်နေ့ ( သြဂုတ် ၁၅) ညနေ ၄နာရီကျော် တွင် အရပ်သား ယာဉ်မောင်း ၂ ဦး သေနတ်ပစ်ခံရပြီး ဒဏ်ရာ ရရှိသွားကြောင်း သတင်းရရှိသည်။
ဖြစ်စဉ်မှာ ယမန်နေ့ ညနေ ၄ နာရီတွင် မူစယ် မှ လာရှိုးသို့ ကုန်တင် လိုက်ထရတ်ကား မောင်းသူတဦး နှင့် ကွတ်ခိုင်မှ မူစယ်သို့ သွားမည့် အိမ်စီးကားမောင်းသူတဦး ကို လက်နက်ကိုင် အဖွဲ့ တဖွဲ့ ၏ ပစ်ခတ်မှုကြောင့် ဒဏ်ရာရရှိကြောင်း အခင်းဖြစ်ချိန်တွင် သေနတ်ဒဏ်ရာရရှိသူကို ဆေးရုံသို့ပေးသည့် မူစယ် မြို့လူမှု ကူညီရေး အသင်းမှ ဦးခင်မောင်လွင် က ပြောသည်။
“ ကျနော်က လူနာကို မူစယ်ကနေ မန္တလေး ပို့ဖို့အသွားမှာပါ။ ဖြစ်သွားတာက ကျနော် ကားရှေ့ မှာပါပဲ။ သေနတ်သံတော့ အကြီးကြီးမဟုတ်ဘူး။ တပ်မတော်က စီးလာတဲ့ လိုက်ထရတ်နဲ့ မှားပစ်တာ ခံရတာ။ ယာဉ်မောင်း ၂ယောက်က ခြေထောက်မှာ ဒဏ်ရာ ရသွားတယ်။ မစိုးရိမ်ရပါဘူး” လို့ ဦးခင်မောင်လွင် က ဆိုသည်။
သေနတ်ကျည်ထိမှန်သည့် ကားမောင်း သမား တဦးကို ကွတ်ခိုင်ဆေးရုံသို့ပို့ဆောင်ပေးပြီး၊ နောက်တဦးမှာ နမ့်ဖတ်ကာ ဆေးရုံသို့ ပို့ဆောင်ပေးလိုက်ကြောင်း သိရသည်။
“ အပစ်ခံရတော့ ကျနော့်ကားကို အကူအညီတောင်းတယ်။ ဆေးလာတောင်းတယ်။ကျနော်ကားမှာလည်း ဆေးမစုံဘူး။ ကျည်ဆံထုတ်လို့ မရဘူး။ ဒါနဲ့ ကျနော် ကွတ်ခိုင် ဆေးရုံ ကို ပို့ပေးမယ်ဆိုပြီး သယ်လာတယ်။ နောက်တယောက်ကတော့တခြားကားနဲ့ နမ့်ဖတ်ကာ ဆေးရုံ ကို ဆက်သွားတယ်” အခင်းဖြစ်ပွားချိန်တွင် မျက်မြင်ကိုယ်တွေ့ ခဲ့သည့် ဦးခင်မောင်လွင် က ပြန်ပြောပြသည်။
ထို ဖြစ်ပွားချိန်တွင်လည်း တပ်မတော် တပ်သားများကလည်း လိုက်ထရတ် ကားများစီးလာပြီး၊ ပြည်သူနှင့် တပ်သား ထင်ယောင်ထင်မှား ဖြစ်သွားသည့် ပုံစံမျိုးဖြစ်သွားကာ အရပ်သားမောင်းလာသည့် လိုက်ထရတ်ကား သေနတ်ပစ် ခံ ရခြင်းဖြစ်သည် ဟု ဦးခင်မောင်လွင် က သုံးသပ်သည်။
ပစ်ခတ်မှုလက်သည်မှာလည်းမည်သည့်အဖွဲ့မှန်းမသိရကြောင်းသိရသည်။
“ တပ်မတော် အနေနဲ့ အရပ်သားတွေ စီးတဲ့ လိုက်ထရပ်ကားစီးတော့ ပြည်သူလား တပ်လား ဆိုတာ မသဲကွဲတော့ဘူး။ လက်နက်ကိုင်တွေလည်း တပ်က လိုက်ထရတ် ကားနဲ့လာမယ်ဆိုတဲ့ သတင်းရထားလို့ ဖြစ်မယ်။ တပ်မတော်အနေနဲ့ ဒီလို လုပ်ရပ်မျိုးမလုပ်သင့်ဘူး” ဟု မူစယ် ကားသမား စိုင်းအိုက်အောင် က ပြောသည်။
ယခုရက်ပိုင်း သျှမ်းပြည် မြောက်ပိုင်း ကွတ်ခိုင်မြို့နယ် အတွင်း တွင် အစိုးရတပ်မတော် နှင့် မြောက်ပိုင်း မဟာမိတ် တပ်ဖွဲ့တို့ တိုက်ပွဲများ ဆက်တိုက်ဖြစ်ပွားပြီး အစိုးရတပ်မတော် မှ စစ်အင်အားများ ဆက်တိုက် ဖြည့်တင်း နေကြောင်း သိရသည်။
