သျှမ်းပြည်နယ် မြောက်ပိုင်း လားရှိုး – မူစယ်လမ်းမ ပေါ် နမ့်ခိုင်တံတားစောင့် ပြည်သူ့စစ်တပ်ဖွဲ့ဝင်တဦးက ခရီးသွားဒေသခံအမျိုးသမီး တဦးအား ကိုယ်ထိ လက်ရောက်ရိုက်နှက်မှုပြုခဲ့ကြောင်း သိရသည်။
သြဂုတ် ၈ ရက် မနက် ၉ နာရီ က နမ့်ခိုင် တံတား စောင့် ပြည်သူ့စစ်တပ်ဖွဲ့ဝင်တဦးက ကားသမားတဦးအား ပိုက်ဆံ ၃၀၀၀ ကျပ် တောင်းရာ ကားသမား လင်မယားက ပိုက်ဆံ ၂ ထောင်ကျပ်သာ ကျန်တော့ကြောင်း ပြန်ပြောပြီးနောက် ပြည်သူ့စစ်က ကိုယ်ထိလက်ရောက်ရိုက်နှက်မှုကျူးလွန်ခဲ့ကြောင်း သိရသည်။
“ လမ်းမှာကားပျက်လာတဲ့အတွက် ပိုက်ဆံက ၂ထောင် ပဲ ရှိပါတော့တယ်။ နမ့်ဖတ်ကာကိုလိုက်ယူပါလို့ ပြောလိုက်တယ်။ အဲ့မှာ သူက မရဘူးဆိုပြီး ကားကိုဂွနဲ့ရိုက်တယ်။ ကျနော် မိန်းမ က ကားကို ဘာဖြစ်လို့ ရိုက်တာလဲလို့မေးတော့ ကျနော့မိန်းမကိုဆွဲထိုးတယ်။ ” ဟု လက်သီးထိုးခံရသည့် အမျိုးသမီး၏ အမျိုးသားဖြစ်သူက ၄င်း၏ဖေ့ဘွတ်အကောင့် စာမျက်နှာတွင် ရေးသားထားသည် ။
ထို့အပြင် ကားသမား ကို လည်းဓားဖြင့် လိုက်ခုတ်ရာ၊ အနီးရှိ တာဝန်ရှိရဲများ၊ စစ်သားများမှလည်း ၀င်ရောက်ကူညီဖြန်ဖြေပေးမှုမရှိဘဲ ရပ်ကြည့်နေကြကြောင်း ၄င်း၏ ဖေ့ဘုတ်တွင်ဖော်ပြထားသည်။
“ ပြည်သူ့စစ် က ပြောတယ်။ သေနတ်နဲ့မပစ်တာတောင်ကံကောင်းတယ်တဲ့။ အခေါက်တိုင်း ကျနော်ပိုက်ဆံပေးတယ်။ ဒီတစ်ခေါက်မပေးတာနဲ့ ဒီလိုဖြစ်သွားတယ်။ လက်နက်အားကိုးနဲ့အနိုင်ကျင့်နေတဲ့ နမ့်ခိုင်တံတားက ရဲနဲ့ပြည်သူ့စစ် ဘယ်လိုအရေးယူမလဲ ။ဘယ်ဆီကို သွားတိုင်ရမလဲ” ဟု ကားသမားက သျှမ်းသံတော်ဆင့်အား ပြောသည်။
အဆိုပါဖြစ်စဉ်၏ ဗီဒီယိုဖိုင်တွင် ပြည်သူ့စစ် ယူနီဖောင်း ဝတ်ဆင်ထားသည် လူငယ်တဦးကလည်း “ မပစ်တာ ကံကောင်းတယ်နော်။ ဘယ်လူကြီးပဲခေါ်လာခဲ့ ကြောက်မယ်ထင်လား။ စိတ်တိုအောင် လာမလုပ်နဲ့” ဟု ကားသမားလင်မယားအား ပြောဆိုခဲ့သည်ကိုကြားရသည်။
လားရှိုး-မူစယ်လမ်းတွင် ကားလမ်းပိတ်မှုပြသနာအပြင် တဖက်ကလည်း လက်နက်ကိုင် တပ်ဖွဲ့များကို ကြောက် ရွံ့နေရကြောင်း၊ ထို့အပြင် တိုက်ပွဲ များအချိန်မရွေးဖြစ်ပွါးနိုင်သည်ကိုလည်း စိုးရိမ်ကြောင့်ကြ သတိချပ်နေရ ကြောင်း မူစယ်ဒေသခံ ကားသမားစိုင်းယီက ပြောသည်။
“ လားရှိုး မူစယ် ကားလမ်းကတော့ လက်နက်ကိုင်တွေ ဆက်ကြေးကောက်တာ။ ရတာယူတာကတော့ မဆန်းတော့ပေမယ့် ကိုယ်ထိလက်ရောက်ဖြစ်တာကတော့ ဆန်းတယ်။ နောက်အမျိုးသမီး ကို ထိုးတယ်ဆိုတာ မဖြစ်သင့်ဘူး။ ပြည်သူတွေ အတွက် ဒီလမ်းက မလုံခြုံတော့ဘူး” ဟု စိုင်းယီ က ဆိုသည်။
“ လက်နက်ကိုင် ပြည်သူ့စစ်တွေ ပြည်သူတွေကို အနိုင်ကျင့် ပါက တိုင်ကြားနိုင်ပါတယ်” ဟု လုံခြံုရေး နှင့် နယ်စပ် ရေးရာ ဝန်ကြီး (ဟောင်း) ဗိုလ်မှူးကြီး နိုင်ဝင်းအောင်က ယခုနှစ် မေ ၂၅ တွင် တောင်ကြီးမြို့တွင် ပြုလုပ်သည့် ပြည်နယ် အစိုးရ အဖွဲ့ သတင်းစာရှင်းလင်းပွဲ တွင် ပြောကြားခဲ့သည်။
