သျှမ်းပြည်မြောက်ပိုင်း နမ္မတူမြို့နယ်အတွင်း ယနေ့ နံနက်တွင် ဖြစ်ပွားသော တိုက်ပွဲများကြောင့် လယ်ယာ လုပ်ငန်း လုပ်ကိုင်နေသည့် ကျေးလက်ဒေသခံ ရာဂဏန်း နေရပ်မှ တိမ်းရှောင်နေရသည်ဟု ဆိုသည်။
နိုင်ငံတကာ လူမှုကူညီရေးအသင်းအဖွဲ့တခုက ဇူလိုင်လ ၁၆ ရက် ၂၀၁၈ ရက်နေ့၌ နမ္မတူမြို့နယ်အတွင်း တအာင်း TNLA နှင့် သျှမ်းပြည်တပ်မတော် RCSS/SSA တို့အကြားတိုက်ပွဲကြောင့် ဒေသခံ ၂၇၀ ကျော် စစ်ဘေးရှောင်နေရကြောင်း ပြောဆိုသည်။
နမ္မတူမြို့နယ် မိုင်းမု ကျေးရွာအုပ်စုအတွင်းနေ ၀မ်ပုံ၊ မန်မိုင်၊ ဆမ်ခါ ၊ နောင်ငင်း ၊ နားဟုတ် နှင့် နမ့်ဆီလင်း ရွာသားများက ပန်လုံဘုန်းကြီးကျောင်းသို့လည်းကောင်း ကောင်းဟုန်း၊ လုံမိတ်၊ မိုင်းမု ရွာသူ ရွာသားများက မန်စံကျောင်းဟောင် ဘုန်းကြီးကျောင်းတွင်လည်းကောင်း ယနေ့နံနက်ပိုင်းမှ စ၍ ထွက်ပြေးတိမ်း ရှောင်နေကြကြောင်း စစ်ဘေးရှောင်စုစုပေါင်း ၂၇၀ ကျော် (ကျား ၁၂၀ ကျော်နှင့် မ ၁၄၀ ကျော်) ရှိကြောင်း သိရသည်။
သျှမ်းပြည်တပ်မတော် SSPP/SSA ပြန်ကြားရေးဌာနက – နမ္မတူမြို့နယ်အတွင်းဖြစ်ပွါးခဲ့သော တိုက်ပွဲနှင့်ပတ်သက်ပြီး သျှမ်းပြည်တပ်မတော် SSPP/SSA အနေဖြင့် စုံစမ်းမှုပြုလုပ်နေကြောင်း ၊ တိုက်ပွဲဆင်နွဲရန်လည်း ဗဟိုညွန်ကြားမှုမရှိကြောင်း – ထုတ်ပြန်ထားသည်။
သျှမ်းပြည်ပြန်လည်ထူထောင်ရေးကောင်စီ သတင်းစာမျက်နှာကမူ – SSPP/SSA အပါအဝင် မြောက်ပိုင်း မဟာမိတ်တပ်ဖွဲ့ဝင်များက အဆိုပါဒေသအတွင်း နေ RCSS/SSA လှုပ်ရှားတပ်များအား ၀ိုင်းရံပိတ်ဆို့ ကာ လိုက်လံတိုက်ခိုက်နေသည်ဟု ရေးသားထုတ်ပြန်ထားသည်။
အဆိုပါဒေသတွင် သျှမ်းပြည်တပ်မတော် RCSS/SSA ၊ အစိုးရတပ်မတော် ၊ မြောက်ပိုင်းမဟာမိတ် တပ်ဖွဲ့ဝင်များ ဖြစ်ကြ သည့် SSPP/SSA , တအာင်း ပလောင်အမျိုးသားလွတ်မြောက်ရေးတပ်မတော် TNLA တို့ လှုပ်ရှားလျက်ရှိသည်ဟု ဆိုသည်။