လဲချားတွင် ဆိုင်ကယ်များအား လိုင်စင်ပြုလုပ်ပေးမည်ဟုဆို  

0

သျှမ်းပြည်တောင်ပိုင်း လဲချားမြို့နယ်တွင် ကုန်းလမ်းပို့ဆောင်ရေး ညွှန်ကြားရေးမှူးဦးစီးဌာန လွယ်လင်မြို့က လဲချားမြို့ဒေသခံများအတွက် ဒေသအမှတ်ဖြင့် လိုင်စင်မဲ့မော်တော်ဆိုင်ကယ်များအား မှတ်ပုံတင်ပြုလုပ်ပေးမည်ဖြစ်ကြောင်းသိရသည်။

Photo by- Sai Lang Herng LaiKha

ဇွန်လ ၂၇ ရက်နှင့် ၂၈ ရက် နေ့တို့တွင် လဲချားမြို့တွင်း ကွင်းဆင်းဆောင်ရွက်မည်ဖြစ်သဖြင့် မော်တော်ဆိုင်ကယ်လိုင်စင်များလာရောက်ပြုလုပ်ကြရန် ဇွန်လ ၁၃ ရက်နေ့က မြို့နယ်ထွေအုပ်က သက်ဆိုင်ရာအုပ်စု၊ ရပ်ကွက် အုပ်ချုပ်ရေးမှူးများထံ အကြောင်းကြားစာပေးပို့ခဲ့ကြောင်းသိရသည်။

“လိုင်စင်လုပ်မယ့်မော်တော်ဆိုင်ကယ်တွေကို အမည်စာရင်းပေးဖို့ပြောနေတယ်။ မော်တော်ဆိုင်ကယ်အမျိုးအစားအလိုက် လိုင်စင်ပြုလုပ်တဲ့စျေးနှုန်းတွေက ကွာတယ်။ တရုတ်ကလာတဲ့ဆိုင်ကယ်တွေဆိုရင် လိုင်စင်ကြေးက စျေးအနိမ့်ဆုံး ၃၉၈၅၀ ကနေ စျေးအများဆုံးက ၈ သောင်းကျော်အထိ ရှိတယ်။ ဂျာမနီဆိုင်ကယ်ဆိုရင်သိန်း ၃၀၀ ကျော်တယ်။ ထိုင်းဆိုင်ကယ်ဆိုရင် စျေးအနိမ့်ဆုံးက ၂ သိန်းကနေ စျေးအမြင့်ဆုံးက သိန်း ၂၀ လောက်အထိ ရှိတယ်။ အမျိုးအစားအလိုက် စျေးအနိမ့်အမြင့်ကွာတယ်”- ဟုလဲချားဒေသခံ နန်းမီး ကပြောသည်။

လဲချားမြို့ လူငယ်များအဖွဲ့၏ အကြံပေး စိုင်းလိုင်းဟိန်း က- “သူများတွေလာလုပ်ပေးတဲ့အချိန်မှာ ကျနော်တို့သွားလုပ်သင့်တယ်လို့မြင်တယ်။ ကျနော်တို့ လိုင်စင်ရှိရင်ဘယ်သွားသွား လွတ်လွတ်လပ်လပ် သွားနိုင်တယ်ပေါ့။ အရင်တုန်းကလာလုပ်ပေးတာက ၂ နှစ်တခါ သက်တမ်းတိုးရတယ်။”- ဟု သျှမ်းသံတော်ဆင့်အားပြောသည်။

ဇွန်လ ၁၁ ရက်နေ့က ကညန၊ ရဲ၊ မူးယစ်များပူးပေါင်းအဖွဲ့သည် သျှမ်းပြည်နယ်မြို့တော်တောင်ကြီး မြို့အဝင်အထွက်တွင်လည်းကောင်း လွယ်လင်မြို့အဝင်အထွက်တွင်လည်းကောင်းထို့အပြင်တာချီလိတ်မြို့ ကျိုင်းတုံမြို့များနှင့်တခြားမြို့များတွင် ကားများတားဆီးစစ်ဆေးရာ လိုင်စင်မဲ့ကားများအား ဖမ်းဆီးခဲ့သည့်သတင်းလူမှုကွန်ယက်တွင်ပျံ့နှံ့ခဲ့ပြီးနောက် ဆိုင်ကယ်များလိုင်စင်ပြုလုပ်ပေးမည်ဖြစ်ကြောင်းကြေငြာချက်ထွက်ပေါ်လာခဲ့သည်။

SHARE

LEAVE A REPLY

Please enter your comment!
Please enter your name here