တောင်ကြီးမြို့ ၊ကျောင်းကြီးစုရပ်ကွက်တွင် ဇွန်လ (၅) ရက်နေ့ညနေက မိုးရေကြီးချိန်တွင် ပဥ္စမ တန်းကျောင်းသားတစ်ဦး ချောင်းရေနှင့်မျောပါသေဆုံးကြောင်းသိရသည်။
ဓါတ်ပုံ# တောင်ကြီးသူ/တောင်ကြီးသားများလူမှု့ ကွန်ယက်စာမျက်နှာ
“ညနေ ကျောင်းဆင်းချိန်မှာ မိုးတအားရွာပြီး ရေတွေ တမြို့လုံးနီးပါးကြီးနေတာ။ ကလေးပါသွားတာတွေ့တော့ လူတွေကလိုက်ကြတယ်။ Royal Star Hotel အနောက်ဖက် ရဲ့ ရေမြောင်းလေးမှာတွေ့တော့ ကလေးက သေနေပြီ ” ဟု တောင်ကြီးမြို့ ၊ ကျောင်းကြီးစုရပ်နေ ကိုမောင်စိုးကပြောသည် ။
သေဆုံးသွားသည့်ကလေးမှာတောင်ကြီးမြို့ ၊ ကျောင်းကြီး စုရပ် ၊ အ .လ.က (၁၁) မှ အသက် (၁၀)နှစ် အရွယ် ပဥ္စမ တန်းကျောင်းသားမောင်ဇင်မျိုးထက် ဖြစ်ပြီး ၄င်းမှာ ကျောင်းဆင်းချိန်တွင် ကျောင်းကြီးစုရပ် ရှိ ဂေါ်ရခါးဘုရားကျောင်းအနီး ရေချောင်းတွင် ခြေထောက်ဝင်ဆေးရာမှ ရေချောင်းအတိုင်း မျောပါသေဆုံးခဲ့ကြောင်း သိရသည် ။
တောင်ကြီး မြို့မရဲစခန်းမှအဆိုပါအမှုကို သေမှုသေခင်း ဖြင့်အမှုဖွင့် ထားကြောင်းသိရှိရပါသည် ။
ဇွန်လ (၅) ရက်နေ့ ညနေ ၃:၃၀ နာရီ ဝန်းကျင်ခန့်တွင် မိုးသည်းထံစွာ ရွာသွန်းမှုကြောင့် တစ်မြို့လုံးနီးပါး ရေကြီးကာ ချောင်းရေကြီးခြင်း၊ လူနေအိမ်အချို့လည်း ရေလွှမ်းခြင်းခံခဲ့ရသည် ။
