မူစယ်မြို့က တိုက်ပွဲကြား မြေစာပင် ဖြစ်ခဲ့ရတဲ့ ယဉ်ကျေးလိမ္မာ ဆရာ ၂ ဦး  

“ကျနော်တို့ မဟာဝေဠုဝန်ကျောင်း က ယဉ်ကျေးလိမ္မာ ဓမ္မဆရာ ၂ယောက် သေဆုံးတဲ့အထဲပါသွားတယ်။ ကျနော် သူငယ်ချင်း တယောက်ဆိုရင် ရုပ်အလောင်းတောင် ပြန်မရဘူး။ သေနတ်နဲ့ပစ်ခံရတဲ့အပြင် မီးပါရှို့ ရုပ်တောင်မမြင်ရတော့ဘူး” လို့ မဟာဝေဠုဝန်ကျောင်း က ယဉ်ကျေးလိမ္မာ ဓမ္မဆရာ စိုင်းဆိုင်လှိုင်း က သျှမ်းသံတော်ဆင့်ကို ပြောပါတယ်။

တအာင်း အမျိုးသားလွတ်မြောက်ရေး တပ်မတော်( TNLA) နဲ့  အစိုးရရဲတပ်ဖွဲ့၊ ပြည်သူ့စစ်တပ်ဖွဲ့ တို့ကြား မေ ၁၂ရက်နေ့ ဖြစ်ပွားတဲ့ တိုက်ပွဲကြောင့် ရဲ၊ ပြည်သူ့စစ် နဲ့ အရပ်သား ၂၀ ဦး သေဆုံးကာ အရပ်သား ၂၆ ဦး ဒဏ်ရာရရှိခဲ့ကြောင်း မူစယ်မြို့အခြေစိုက် ဂရုဏာ လူမှု ကူညီရေး အသင်းမှ ဦးသောင်းထွန်း ကပြောပါတယ်။

မန္တလေးဆေးရုံပို့မယ့် သူက မေမြို့မှာ ဆုံးသွားတယ်။ အားလုံးစုပေါင်း သေဆုံး ၂၀ ဖြစ်သွားတယ်။ အများဆုံးကတော့ နောင်ယန်း မြစ်ဆိပ် ၁၆ ယောက်သေပါတယ်။ အဲ့မှာ အမျိုသမီး ၂ ယောက်ပါတယ်။ တယောက်က ကိုယ်ဝန် ၃ လ ပါတယ်။ ဒုရဲအုပ် ၁ ဦး၊ ပြည်သူ့စစ် တွေလည်း ပါပါတယ်” လို့ ဦးသောင်းထွန်း က ဆိုပါတယ်။

သေဆုံးသွားတဲ့ထဲက ဆရာ ၂ယောက်ဖြစ်တဲ့ စိုင်းရွှေလင်း နဲ့ စိုင်းထွန်းလှိုင်း က အပတ်စဉ် တနင်္ဂနွေ နေ့ မဟာဝေဠုဝန်ကျောင်း မှာ ကလေးတွေကို ယဉ်ကျေးလိမ္မာ သင်ကြားပေးနေတဲ့သူတွေပါ။

“ သူတို့ ၂ယောက်က တနင်္ဂနွေနေ့ဆို ကလေးတွေ စာလာသင်တယ်။ ကျန်ရက်တွေဆိုရင်တော့ နောင်ယန်း မြစ်ဆိပ်မှာ ကူတို့ မောင်းတာ၊ စက်လှေ အဝင်၊ အထွက်ကို စာရင်းမှတ်ပေးတဲ့သူတွေပါ။” လို့ စိုင်းဆိုင်လှိုင်း က ပြောပြပါတယ်။

ယဉ်ကျေးလိမ္မာ ဓမ္မဆရာ ၂ ဦးမှာ တလလျှင် ကျပ်ငွေ ၃ သိန်းလခဖြင့် မြစ်ဆိပ်တွင် စာရေးပြုလုပ်ကြောင်းလည်း စိုင်းဆိုင်လှိုင်းက ပြောပါတယ်။

“ အဲ့နေရာ ပြည်သူ့စစ်ပဲနေကြတာမဟုတ်ဘူး။ အရပ်သားတွေလည်းနေကြတယ်။ နောက် လောင်းကစားနေရာလည်းမဟုတ်ဘူး။ အဲ့မှာလုပ်နေတဲ့ အရပ်သားတွေလည်း ရှိပါတယ်။ လွှတ်မြောက်လာတဲ့သူဆိုရင်တော့ စိုင်းရွှေလင်း ရဲ့မရီး နဲ့ကလေး ပဲ လွှတ်လာတယ်” လို့ သူက ပြန်ပြောပြပါတယ်။

နောင်ယန်းမြစ်ဆိပ်ကို တအာင်း အမျိုးသားလွတ်မြောက်ရေး တပ်မတော်( TNLA) က မေ ၁၂ရက် မနက် ၄နာရီခန့် ဝင်ရောက်တိုက်ခိုက်ခဲ့ကြောင်း ထိုဝင်ရောက်တိုက်ခိုက်ချိန်တွင် ကူးတို့ ဆိပ်စောင့်တွေက အိပ်ကောင်းနေချိန်ဖြစ်ပါတယ်။

“ မြစ်ဆိပ်မှာ အလုပ်လုပ်နေတဲ့ လူငယ် ၄ ယောက် ဆုံးရှုံးရတယ်။ သာသနာ အကျိုး တာဝန်ထမ်းဆောင်နေတဲ့ ဆရာတွေ ဆုံးရှုံးရတယ်။ အရမ်းဝမ်းနည်းစရာကောင်းတယ်” လို့ ယဉ်ကျေးလိမ္မာ ဓမ္မဆရာ စိုင်းဆိုင်လှိုင်းက ဆိုပါတယ်။

 

TNLA ရဲ့ မေ ၁၂ရက်နေ့ ထုတ်ပြန်ချက်အရ မူစယ်မြို့အဝင် နမ့်ပေါ်ပန်ခမ်း တံတားအနီးရှိ ပန်ဆေးပြည်သူ့စစ် လောင်းကစားရုံကို မြန်မာတပ်မတော်၊ ရဲတပ်ဖွဲ့နှင့် ပြည်သူ့စစ်တို့ လုံခြုံရေးပေးထားတဲ့နေရာဖြစ်ပြီး လောင်းကစားရုံကြောင့် ပြည်သူတွေ ဘဝ ဆုံးရှုံးရသဖြင့် ဝင်ရောက်ရှင်းလင်းရခြင်းဖြစ်သည် ဟု ရေးသားထားပါတယ်။

TNLA နဲ့ မူစယ် အခြေစိုက် မြို့မ ပြည်သူ့စစ် တို့ တိုက်ပွဲကြောင့် အရပ်သား အများအပြား သေဆုံးသည့်အပေါ် မူစယ်ဒေသခံများက ရှုတ်ချလိုက်ကြောင်းလည်း သိရပါတယ်။

“ ဒီတိုက်ပွဲက အရပ်သား အထိများဆုံးပါပဲ။ လောင်းကစားရုံကို ပစ်မှတ်ထားပေး ပြည်သူ့စစ်ကို ပစ်ပေမယ့် ထိမှန်တာ အများဆုံးက ပြည်သူတွေပါ။ အဓိက လူငယ်တွေ တော်တော်များများပါတယ်။ ပြည်သူ့စစ် က နည်းတယ်” လို့ မူစယ်ဒေသခံ ပန်ခမ်း ကျေးရွာ နေထိုင်သည့် စိုင်းကျော် က ပြောပါတယ်။

လက်ရှိ သေဆုံးတဲ့ ထဲမှာ အရပ်သားတွေ လူငယ်တွေ ပညာတက်တွေလည်း ပါတဲ့အတွက် စိတ်မကောင်းကြောင်း၊ လောင်းကစားရုံကို ပစ်မှတ်ထားပေမယ့် လက်ရှိမှာ ထိခိုက်နစ်နာတာ လူငယ် အရပ်သားတွေ ဟုလည်း စိုင်းကျော် က ပြောပါတယ်။

လွန်ခဲ့တဲ့တနှစ်က မူစယ် ကုန်သွယ်ရေး ဇုံ( ၁၀၅) မိုင် မှာ ဖြစ်တဲ့ မြောက်ပိုင်း မဟာမိတ် နဲ့မြန်မာ တပ်မတော် တိုက်ပွဲ ကြောင့် ကုန်သွယ်ရေးဇုံ ရက်ဆိုင်းခဲ့ရပေမယ့် မူစယ်မြို့ အနီးတိုက်ပွဲကတော့ ကုန်သွယ်ရေး ရပ်ဆိုင်းမရှိသလို လက်ရှိမှာတော့ မူစယ်မြို့ က ပြန်လည် လှုပ်ရှားနေကြောင်း လည်း မူစယ်မြို့ကုန်သည် တဦး ကပြောပါတယ်။

“ ဒီတိုက်ပွဲမှာ အထိများတာ ပြည်သူတွေပါ။ ပြည်သူတွေပဲခံရတာပါ။ တိုက်ပွဲထပ်ဆင်နွဲကြမယ်ဆိုရင် ပြည်သူတွေနဲ့ အလှမ်းဝေးတဲ့နေရာဖြစ်ဖို့ တောင်းဆိုချင်ပါတယ်” လို့ လည်း မူစယ်မြို့ ကုန်သည် တဦးက ပြောပါတယ်။

မူစယ်မြို့ နေထိုင်သူတွေကတော့ တိုက်ပွဲတွေ သေနတ်သံတွေ လက်လုပ်မိုင်းတွေ မကြာခဏ ကြားရ၊ မြင်နေရတဲ့အတွက် ငြိမ်းချမ်းရေးကို လိုလားနေကြကြောင်း၊ တိုက်ပွဲဖြစ်ပွား သေနတ်ပစ်ခတ်ခံရရင်လည်း ပြည်သူတွေ ထိခိုက်သေဆုံးနေရတာလည်းများနေသဖြင့် စိုးရိမ်မှုနေတာ နေထိုင်နေရသည် ဟု မူစယ်ဒေသခံတွေ ကပြောဆိုလိုက်ပါတယ်။

ဆက်လက်ပြီး ယဉ်ကျေးလိမ္မာ ဓမ္မဆရာ စိုင်းဆိုင်လှိုင်း က “ မြို့ထဲ မှာ လာပစ်တော့ သေဆုံးတာ လူငယ်တွေ ပြည်သူတွေပဲ သေတယ်။ ဒီလို လျှောက်ပစ် လုပ်နေကြရင်တော့ လူမျိုးရေး တွေ ဖြစ်လာနိုင်တယ်။ အခုဆို ကျနော် သူငယ်ချင်းတွေ သေသွားတယ်။ လူမျိုးရေး မဖြစ်လာဖို့ပဲ မျှော်လင့်ရပါတယ်” လို့ ထောက်ပြလိုက်ပါတယ်။

SHARE

LEAVE A REPLY

Please enter your comment!
Please enter your name here