သျှမ်းပြည်မြောက်ပိုင်း နမ္မတူမြို့နယ်နားဆိုင်းရွာတွင် ၄င်းတို့နေအိမ်ခြံဝင်းအတွင်း ဗွက်အိုင်တွင်
ကျထားသည့် လက်နက်ကြီးကျည်တလုံးအား ကလေး ၃ ယောက်မှယူဆောင်ဆော့ကစားရာ ကျည်ကြီးပေါက်ကွဲသဖြင့် ၁ကလေး ၁ ဦးသေဆုံး ၂ ဦးဒဏ်ရာအပြင်းအထန်ရရှိကြောင်းသိရသည်။
မေလ ရ ရက်နေ့က နေအိမ်ခြံဝင်းအနောက်ဘက်ရှိ ၀က်ခြံအတွင်း ၀က်စာများသွားဖြည့်စဉ် ကလေး ၃ ယောက်မှာ ခြံဝင်းအတွင်းကျထားသည့် လက်နက်ကြီးကျည် တလုံးကောက်ယူ စဉ် အဆိုပါကျည်ကြီး ပေါက်ကွဲခြင်းဖြစ်ပြီး ကလေးများအား ထိမှန် ဒဏ်ရာရရှိခဲ့သည်။
နားဆိုင်း ရွာသား စိုင်းပြားက – ဒီကျည်ကြီးက ရွှံ့ဗွက်ထဲမှာ ကျထားတယ်။ ကလေးတွေက ကောက်ယူပြီး ယူလာဆော့တာလေ။ ကျည်မှန်းမသိတော့ဆော့တာပေါ့။ အဲတာနဲ့ ကျည်ပေါက်တာ သူတို့ ၃ ယောက်ဒဏ်ရာအပြင်းအထန်ရတယ်။ လားရှိုးဆေးရုံပို့ရင်း လမ်းမှာ ၁ ယောက်သေသွားတယ်။ ကျန် ၂ ယောက်ကအခုလားရှိုးဆေးရုံမှာ- ဟု သျှမ်းသံတော်ဆင့်အားပြောပြသည်။
အဆိုပါလက်နက်ကြီးကျည်မှာ မည်သည့်လက်နက်ကိုင်တပ်ဖွဲ့၏ ကျည်ဖြစ်ကြောင်းကိုမူ မသိရကြောင်း ၄င်းကဆိုသည်။
ဒီဘက်မှာ လက်နက်ကိုင်တပ်ဖွဲ့တွေများတယ်။ ဘယ်တဖွဲ့ရဲ့ကျည်ကျထားမှန်းမသိဘူး။ တိုက်ပွဲလည်းခနခနဖြစ်နေတော့ လူထုရဲ့လုံခြုံရေးအတွက် အထူးစိုးရိမ်နေရတယ်။ – ဟုဆက်လက်ပြောပြသည်။
ကလေး ၃ ယောက်မှာ ယောကျားလေး ၂ ယောက် မိန်းခလေး ၁ ယောက်ဖြစ်ပြီး သေဆုံးသူမှာ ယောက်ကျားလေး တယောက်ဖြစ်ကြောင်းသိရသည်။
ပြီးခဲ့သည့် ဧပြီလက နားဆိုင်းရွာတွင် အစိုးရတပ်မတော်နှင့် တအာင်းတပ်ဖွဲ့ TNLA တို့တိုက်ပွဲဖြစ်ပွါးခဲ့သဖြင့် နားဆိုင်းရွာသားများ မန်စံ မိုင်းမု ဘက်သို့ ထွက်ပြေးတိမ်းရှောင်ခဲ့ရသည်။
