သျှမ်းပြည်တောင်ပိုင်း မိုင်းရှူးမြို့နယ် သျှမ်းတိုင်းရင်းသားများဒီမိုကရေစီအဖွဲ့ချုပ် မြို့နယ်ဥက္ကဌ စိုင်းစွမ်လိတ် အသက် ၄၈ နှစ်သည်အသည်းကင်ဆာရောဂါဖြင့် ဧပြီ ၂၂ ရက်နေ့တွင် ကွယ်လွန်သွားပြီး ဧပြီလ ၂၅ ရက်နေ့ မိုင်းရှူးမြို့ တွင်သဂြိုဟ်မည်ဖြစ်ကြောင်းသိရသည်။
“ဧပြီလ ၂၅ ရက်နေ့မှာသဂြိုဟ်မှာဖြစ်ပါတယ်။ ကျမတို့ မိုင်းရှူးမြို့နယ်က SNLD ပါတီအတွက် ဆုံးရှုံးမှုကြီး တခုဖြစ်ပါတယ်။ ကျမတို့ဥက္ကဌက အဘက်ဘက်မှာ တက်ကြွစွာပါ၀င်ကူညီတယ်။ လှုပ်ရှားတယ်။ ပါတီဝင်တွေ အပေါ် ဂရုစိုက်တယ်။ သူက လူချစ်လူခင်များတယ်။ အကြွေစောတဲ့အတွက် ကျမကိုယ်တိုင်ရော ပါတီဝင်တွေအားလုံးကပါ ၀မ်းနည်းကြေကွဲရပါတယ်။ နှမြောမိပါတယ်။” – ဟု မိုင်းရှူးမြို့နယ် SNLD ပါတီ ပြည်နယ်လွှတ်တော်ကိုယ်စားလှယ်နန်းကောင်ခမ်းကပြောသည်။
စိုင်းစွမ်လိတ်သည် မိုင်းရှူးမြို့နယ် ကျားခေါင်းပါတီ အလုပ်အမှုဆောင်ဖွဲ့စည်းတည်ထောင်စဉ်ကတည်းက မြို့နယ်ဥက္ကဌအဖြစ်ပါ၀င်ဆောင်ရွက်လာခဲ့သည်။
ထိုမတိုင်ခင်ကလည်း မြို့နယ်စာပေယဉ်ကျေးမှုအဖွဲ့အတွင်းပါ၀င်လှုပ်ရှားသကဲ့သို့ ရပ်ရေးရွာရေး လူမှုအသင်းအဖွဲ့များတွင်လည်း အစဉ်ပါ၀င်လှုပ်ရှားလာခဲ့သည်။
စိုင်းစွမ်လိတ်သည် မိုင်းရှူးမြို့ ရပ်ကွက် ၂ ရှိ (လုံးဆိုင်မိန်း ) နှင့်ပါနန်းယုံ တို့၏သားဖြစ်သည်။ မိုင်းရှူးမြို့ရပ်ကွက် ၂ ရပ်မိရဖ စဝ်လုံးခွန်မန် ၏ သားမက်ဖြစ်ပါသည်။ လက်ရှိတွင် ဇနီး နန်းခေးဇမ် နှင့် အသက် ၁၆ နှစ်အရွယ် သားစိုင်းနော်ခေးလီ တို့ကျန်ရစ်ပါသည်။
မိုင်းရှူးမြို့ SNLD ပါတီ မြို့နယ်ဥက္ကဌ သစ်ပြန်လည်ရွေးချယ်ရန်အချိန်ပေးရမည်ဖြစ်ကြောင်းလည်း နန်းကောင်ခမ်းကပြောသည်။
စိုင်းစွမ်လိတ်ကွယ်လွန်ခြင်းအတွက် အထူးဝမ်းနည်းကြေကွဲကြောင်းလည်း SNLD ပါတီဗဟိုရုံးချုပ်မှ ဥက္ကဌကြီးခွန်ထွန်းဦးကလည်း သဝဏ်လွှာပေးပို့ခဲ့သည်။
