သျှမ်းပြည်မြောက်ပိုင်း ကျောက်မဲမြို့နယ်အတွင်း လက်လုပ်မိုင်းများဆက်တိုက်ပေါက်ကွဲခဲ့ရာ သေကြေဒဏ်ရာ ရမှုများရှိခဲ့ပါသည်။
ကျောက်မဲမြို့နယ် တိုးဂိတ်အနီးတွင် ၂၆ ရက်ည ၁၁ နာရီခွဲက မိုင်း ၃ လုံးထပ်ဆင့်ပေါက်ကွဲရာ မိုင်းရှင်း လင်းရေး လုံခြုံရေးတပ်ဖွဲ့မှာ တပ်ကြပ်အဆင့်ရှိသူတဦး မိုင်းစထိမှန် ဒဏ်ရာရရှိကြောင်း သိရသည်။
“ပထမမိုင်းတလုံးပေါက်ကွဲသံကြားတယ်။ ကျောက်မဲအဝင် တိုးဂိတ်မှာပါ။ အဲဒီနေရာမှာတော့ ထိခိုက်ဒဏ်ရာရယူမရှိပါဘူး။ အဲဒီနောက် လုံခြုံရေးတပ်ဖွဲ့က အဲ့နားတဝိုက်ကိုရှင်းလင်းရေးလုပ်တော့ ရီမုဒ်မိုင်း လို့ထင်ရတဲ့ မိုင်း ၂ လုံးရှေ့ဆင့် နောက်ဆင့် ပေါက်ကွဲတယ်။ မိုင်းရှင်းတဲ့ တပ်ကြပ်တဦးပုခုံးမှာ မိုင်းစထိမှန်တယ်။ ဒဏ်ရာက မစိုးရိမ်ရဆိုပေမယ့် လူထုကတော့ သွားသတိ လာသတိ ဖြစ်နေကြတယ်”- ဟု ကျောက်မဲမြို့ ဇီဝိတလူမှုကူညီရေးအသင်းမှ ဦးတင်မောင်သိန်းကပြောသည်။
အဆိုပါပေါက်ကွဲမှု၏လက်သည်ကိုမူ ယနေ့တိုင် အာဏာပိုင်များဘက်မှ ကြေငြာခြင်းမပြုသေးပေ။
သို့သော်အဆိုပါဒေသသည် အစိုးရတပ်မတော်မှလုံခြုံရေးအထူးထားရှိသည့်နေရာပြီးဖြစ်ပြီး ပြီးခဲ့သည့်အပတ်ကမူ TNLA နှင့် RCSS တို့အကြား ကျောက်မဲမြို့နယ်အတွင်း တိုက်ပွဲများဖြစ်ပွါးခဲ့သည်။ ထို့အပြင် ထိုဒေသဖက်တွင် SSPP/SSA မှလည်းသွားရောက်လှုပ်ရှားသည်ဟု အစိုးရဖက်ကပြောဆိုပါသည်။
အလားတူ ပြီးခဲ့သည့် မတ်လ ၁၈ ရက်နေ့ကလည်း ကျောက်မဲမြို့နယ် တော့ဖယ်သူတဦး တော့ဖယ်ရွာအနီး လက်ဖက်ခြံတွင်လက်ဖက်ခူးနေစဉ် မိုင်းနင်းမိသဖြင့် နေရာတွင်ပင် ပွဲချင်းပြီးသေဆုံးခဲ့သည်။
သေဆုံးသူမှာ တော့ဖယ်ရွာသူ ကလေး ၂ ယောက်မိခင် နန်းအေးဟန် အသက် ၃၉ နှစ်ဖြစ်ပြီး ၄င်း၏ခြံမှာ တော့ဖယ်ရွာမှ ၁၅ မိနစ်ခန့်လမ်းလျှောက်သွားရကြောင်း မိုင်းငေါ့ရွာသား လုံးခမ်း ကပြောသည်။
“ညအိမ်ပြန်မရောက်လာတော့ သူ့ခလေးတွေနဲ့ ရွာသားတွေလိုက်သွားကြည့် မှ ခြံထဲမှာသေနေတာတွေ့တာ။ အဲ့ဒီရွာဖက်မှာပြီးခဲ့တဲ့အပတ်ကအထိ TNLA နဲ့ RCSS တို့ တင်းမာနေကြတာလေ။ဒီတပတ်ထဲမှာမှ နဲနဲငြိမ်သွားတာ။” – ဟု ၄င်းကပြောသည်။
အဆိုပါအမျိုးသမီး၏အလောင်းအား ကျောက်မဲမြို့ ဇီဝိတလူမှုကူညီရေးအသင်း၏ ကူညီမှုဖြင့် မတ်လ ၁၉ ရက်နေ့က သဂြိုလ်ကြောင်းသိရသည်။
အလားတူ မတ်လ ၂၅ ရက်ကလည်း ကျောက်မဲမြို့နယ် ပန်မုံရွာဘုန်းကျောင်းမှ သံဃာတော် ၁ ပါးနှင့် ကိုယ်ရင် ၂ ပါး ကျောင်းသို့သွယ်တန်းသည့်တောင်ရေပြတ်သွားသဖြင့် သွားရောက်ကြည့်ရှုရာ တောင်ထိပ်တွင် မိုင်းနင်းမိ သဖြင့်ထိခိုက်ဒဏ်ရာရရှိခဲ့ပြီး လက်ရှိတွင် ကျောက်မဲမြို့ ပြည်သူ့ဆေးရုံတွင် ဆေးကုသမှု ခံယူနေပါသည်။
