သျှမ်းပြည်ညီညွတ်ရေးကော်မတီ CSSU ၏ အလှည့်ကျဥက္ကဌသစ်အား ကြိုဆိုသောအားဖြင့် ကျားဖြူပါတီ ဦးဆောင်ကာ သျှမ်းပြည်မြောက်ပိုင်း ကျောက်မဲမြို့နယ်ပြည်သူလုထုမှ ညစာစားပွဲကျင်းပခဲ့ကြောင်းသိရသည်။
မတ်လ ၁၈ ရက်နေ့က ကျောက်မဲမြို့နယ် ကောလီဟိုတယ်တွင်ကျင်းပခဲ့ခြင်းဖြစ်ပြီး သျှမ်းပြည်မြောက်ပိုင်း ရှိ ကျားဖြူပါတီဝင်များ တက်ရောက်ခဲ့ကြောင်းသိရသည်။
“CSSU ဆိုတာက သျှမ်းလူမျိုးတမျိုးတည်းသာမကဘူး။ သျှမ်းပြည်လူထုတဝှမ်းလုံးကပါ၀င်ရမယ်။ ငြိမ်းချမ်း ကိုအဓိကလုပ်ဆောင်မယ်။ ငြိမ်းချမ်းမှ စီးပွါးရေး စိုက်ပျိုးရေး ပညာရေး အဖက်ဖက်မှာဖွံ့ဖြိုး အောင် လုပ် နိုင်မယ်လေ။ ဖက်ဒရယ်ဒီမိုကရေစီဖြစ်ဖို့လိုအပ်တယ်။ ဖက် ဒရယ်ဖြစ်မှ မျှတမယ်လေ။ အဲတာတွေကျနော် ပြောဖြစ်ခဲ့ပါတယ်။” – ဟု CSSU ဥက္ကဌသစ် ၊ သျှမ်းတိုင်းရင်းသားများဒီမိုကရက်တစ်ပါတီ ဥက္ကဌ စိုင်းအိုက်ပေါင်းက သျှမ်းသံတော်ဆင့်အားပြောပြသည်။
ညစာစားပွဲ ပျော်ပွဲရွှင်ပွဲကျင်းပရာ ကျားဖြူပါတီဝင်များနှင့် မြို့နယ်အကြီးအကဲများ တက်ရောက်ကြကြောင်း သိရသည်။
CSSU ဥက္ကဌသစ်အနေဖြင့် ငြိမ်းချမ်းရေးအတွက် သျှမ်းအမျိုးသားအဆင့်နိုင်ငံရေးဆွေးနွေးပွဲကျင်းပနိုင်ရေး ကနဦးကြိုးပမ်းသွားမည်ဖြစ်ကြောင်း ဆိုပါသည်။
“လူထုတွေ့ဆုံပွဲ၊ အကြိုဆွေးနွေးပွဲတွေကို တောင်ကြီးမှာလုပ်ခွင့်ပေးတယ်လေ။ ပြီးရင်လင်းခေးမှာ သွားပြီး အမျိုးသားအဆင့်လုပ်မယ်။ ငြိမ်းချမ်းရေးဖော်ဆောင်နေတဲ့ အကြီးအကဲတွေကိုလည်း တင်ပြပေးမယ်။ လူထုတွေ့ဆုံပွဲမှာ အရမ်းတင်းကျပ်ရင် ငြိမ်းချမ်းရေးလုပ်နိုင်မှာမဟုတ်ဘူးလေ ”- ဟု စိုင်းအိုက်ပေါင်းက ပြောသည်။
ယခုနှစ် ဖေဖော်ဝါရီလ ၂ ရက်နေ့က လွယ်တိုင်းလျန်းတွင်ကျင်းပသော နှစ်ပတ်လည်းအစည်းအဝေးတွင် လက်ရှိဥက္ကဌတာဝန်ယူထားသည့် RCSS/SSA ခေါင်းဆောင် ဗိုလ်ချုပ်ကြီးယွက်စစ်က ဥက္ကဌအလှည့်ကျ တာဝန်ကျ ကျားဖြူပါတီအား လွှဲပြောင်းပေးရာတွင် ကျားဖြူပါတီ ဥက္ကဌ စိုင်းအိုက်ပေါင်းကိုယ်စား အစည်း အဝေးတက်ရောက်လာသည့် ကျားဖြူပါတီ အတွင်းရေးမှူး စိုင်းဘိုးအောင်က လက်ခံတာဝန်ယူ ပေးခဲ့ခြင်းဖြစ်ကြောင်းသိရသည်။
