သျှမ်းပြည်မြောက်ပိုင်း လားရှိုးမြို့နယ် မိုင်းကျက်အုပ်စုတွင် ဒေသတွင်းအုပ်ချုပ်ရေးမှူးအဆင့်ရှိ ဒေသဌာနေပြည်သူ့စစ်က ကျေးလက်အုပ်စု သားများအပေါ် အခွန်ကောက်ခံမှုကြောင့် ရွာသားများအခက်တွေ့နေကြောင်းသိရသည်။
မတ်လ ၁၃ ရက်က ဒီဇယ်အရောင်းခွန် ဟုဆိုကာ ကောက်ခံခဲ့သည်ဟု ရွာသားများကပြောသည်။
“မတ်လ ၁၃ ရက်နေ့က ပြည်သူ့စစ်ရဲ့ ဒေသတွင်း အုပ်ချုပ်ရေးမှူးအဆင့်ရှိသူ စိုင်းထွန်း က မိုင်းကျက် အုပ်စုမှာရှိတဲ့ ဒီဇယ်အရောင်းဆိုင်တွေဆီကနေ အခွန်ကောက်ပေးဖို့ပြောလာတယ်။ ကျမတို့အုပ်စု အုပ် ချုပ်ရေးမှူး စိုင်းထွန်းရီက ဆင့်ဆိုပေးတယ်။ မိုင်းကျက်က ဒီဇယ်ဆီရောင်းတဲ့သူ ၈ ဦးဆီကနေ ပိုက်ဆံ ၁၀ သိန်း အဲ့နေ့မှာဘဲ ကောက်ယူသွားတယ်။ ကျမတို့မိုင်းကျက်မှာ ဒီဇယ်က အဲလောက်ရောင်းကောင်း တာ မဟုတ်ဘူးလေ။ တလတပေပါ မရောင်းရဘူး။ အမြတ်မရှိဘူး။ အခုလိုလာတောင်းတော့ အခက်တွေ့တာ ပေါ့ရှင်။” – ဟု အမည်မဖေါ်လိုသည့် မိုင်းကျက်ရွာသူ တဦးကပြောသည်။
အဆိုပါ ပြည်သူ့စစ်တပ်ဖွဲ့သည် မန့်ပန်အခြေစိုက် ဗိုလ်မွန်းဦးဆောင်သည့်တပ်ဖွဲ့ဖြစ်ကြောင်း ဒေသခံ များ ပြောပြချက်အရသိရပါသည်။
လက်ရှိအုပ်စုအုပ်ချုပ်ရေးမှူး စိုင်ထွန်းရီ (အသက် ၅၀ ၀န်းကျင်) သည် မိုင်းကျက်အုပ်စုအုပ်ချုပ်ရေးမှူး တာဝန် ထမ်းဆောင်လာသည်မှာ ၃ နှစ်သက်တမ်းရှိပြီဖြစ်ပြီး ဒေသတွင်းလက်နက်ကိုင်တပ်ဖွဲ့နှင့် ပေါင်းသင်း ဆက်ဆံ တတ်သူတဦးဖြစ်ရာ ယခုနှစ်ဇန်နဝါရီလဆန်းပိုင်းက ရပ်ကျေးအုပ်ချုပ်ရေးမှူးများ ရွေးကောက်ပွဲတွင် ၄င်းအား ပြန်လည်တင်မြှောက်ရန် ဌာနေပြည်သူ့စစ်ကလူထုအား ဆင့်ဆိုညွှန်ကြားလိုက်ကြောင်း အသက် ၅၀ ၀န်းကျင် ရှိ မိုင်းကျက်ဒေသခံက ပြောသည်။
“ပြီးခဲ့တဲ့ ၁၄ ရက်နေ့ကကျတော့ ဥက္ကဌ စိုင်းထွန်းရီ နဲ့သူ့လက်ထောက် မျိုးသက်ဟိန်းဆိုသူက မူးယစ် ခွန်ဆိုပြီး အုပ်စုသားတွေဆီက ကောက်ပြန်တယ်။ ၁ သိန်း ၅ သောင်းကျပ်။ ရပ်ရွာအကြီးအကဲက ကောက်ပေးလိုက်ရပြန်တယ်။ ကျနော်တို့ နားလည်တာကတော့ မူးယစ်နဲ့ပတ်သက်ရင် အစိုးရရဲ့ မူးယစ်ဌာနနဲ့ဘဲဆိုင်တယ်လေ။” – ဟု အမည်မဖော်လိုသည့်အဆိုပါဒေသခံက ဆက်လက်ပြောပြသည်။
ယခုနှစ်ဆန်းပိုင်းကပင် အဆိုပါပြည်သူ့စစ်တပ်ဖွဲ့သည် လားရှိုးမြို့အရှေ့ဘက် မိုင် ၅၀ ကျော်အကွာ မိုင်းကျက်အုပ်စုဝင် ၁၃ ရွာအား လူခွန်ဟုဆိုကာ ကျပ်သိန်း ၅၀ ဆင့်ဆိုခဲ့သေးသည်ဟုလည်း သိရပါသည်။
