By- သျှမ်းသံတော်ဆင့်/နန်းသီရိခမ်း(မူစယ်)
သျှမ်းပြည်မြောက်ပိုင်း မြန်မာ-တရုတ်နယ်စပ် (ထုန့်မောဝ်ဒေသ) ရွှေလီမြစ်ဝှမ်းနယ်စပ် မူစယ်အထူးစီးပွားရေး ဇုန်စီမံကိန်းတည်ဆောက်ခြင်းအပေါ် နမ့်ခမ်းမြို့ရှိ SNDP ကျားဖြူ ပါတီ နှင့် လူမှုသွေး စည်းညီညွှတ်ရေး အသင်း UP တို့ဦးဆောင်ပြီး ဒေသခံပြည်သူလူထုတွေ့ဆုံပွဲတရပ်ကျင်းပရာ အဆိုပါစီမံကိန်းအားလူထု ကလက်မခံကြောင်းသိရသည်။
တွေ့ဆုံပွဲကို မတ်လ ၉ ရက်နေ့ မွန်းလွဲ ၁ နာရီက ကောင်းနောင်မိုရပ်ကွက် ရှိ တိုင်း(Tai) မင်္ဂလာခန်းမ ၌ ကျင်းပခဲ့ပြီး နမ့်ခမ်းမြို့နေ ဒေသခံပေါင်း ၃၀၀ ဦးထက်မနဲ တက်ရောက်ဆွေးနွေးခဲ့ကြကြောင်း သျှမ်းသံတော်ဆင့် မှ သတင်းရရှိသည်။
“ တွေ့ဆုံပွဲမှာ မြို့မိမြို့ဖ လုင်းအောင်ဝင်းက တရုတ်တွေလာလုပ်မယ့် အထူးစီးပွားရေးဇုန်စီမံကိန်းအကြောင်းကို မြေပုံအညွှ့န်းနဲ့တကွအကျယ်တဝင့် ဆွေးနွေးတင်ပြပေးခဲ့တယ်၊ အထူးစီးပွားရေးစီမံကိန်း ဆောက်လုပ်ဖို့ ကြူကုတ်-ပန်ဆိုင်းမြို့နယ် ကစပြီးနမ့်ခမ်းမြို့နယ် အထိ ဇုန် ၅ ဇုန် ခွဲထားပြီး မြေဧကပေါင်း (၂၄၇၀၅.၄၅ ) ဧက သိမ်းယူ အသုံးပြုသွားမယ်လို့သိရတယ်။ အဲလိုဆိုရင် ဒေသခံလူထုရဲ့ စားကျက်မြေ နေထိုင်စရာမြေ တွေလဲ လုံးဝ ပျောက်ကွယ်သွားကြမယ် ၊ အလုပ် လက်မဲ့ ဘဝဖြစ်သွားကြမယ်။ ကောင်း ကျိုးထက် ဆိုးကျိုးက များနေတာတွေ့ရတယ်လို့ ဆွေးနွေးခဲ့ကြပါတယ် ”- တွေ့ဆုံပွဲ တက်ရောက်ခဲ့သူ နမ့်ခမ်းဒေသခံ စိုင်းပီး ကဆိုသည်။
မတ်လ ၆ ရက်နေ့က နမ့်ခမ်းမြို့အုပ်ချုပ်ရေးရုံး၌ မြို့မိမြို့ဖများနှင့် အုပ်ချုပ်ရေးပိုင်းအရာရှိများ တွေ့ဆုံ ဆွေးနွေးမှုပြုနေစဉ် တရုတ်ပြည်ဘက်မှ ကုမ္ပဏီ တာဝန်ရှိလူကြီးများ အယောက် ၅၀ ခန့် ရောက်ရှိလာပြီး အထူးစီးပွားရေးဇုန်စီမံကိန်း ဆောက်လုပ်ရန်အတွက် ရှင်းလင်းခဲ့ကြောင်းသိရသည်။
အဆိုပါတရုတ်တို့၏ စီမံကိန်းကို လူထုဆန္ဒခံယူပြီးမှ အကောင်အထည်ဖော်သင့်ကြောင်း မြို့မိမြို့ဖ ဦးလုံးဆိုင်သျှိုင်ဝမ်း ကပြောပါသည်။
“ ပြည်သူလူထုများ၏ ဘိုးဘွားပိုင်မြေ များကို မတရားသိမ်းပြီး ဆောက်လုပ်မယ့် စီမံကိန်းကို ကျနော်တို့ လုံးဝ သဘောမတူပါဘူး၊တကယ်လို့များ အဲ့ဒီစီမံကိန်းသာဖြစ်သွားခဲ့ရင် ကျနော်တို့ ဆန်စပါးစိုက်ပျိုးဖို့ မြေတွေ ရှိ တော့မှာ မဟုတ်ဘူး၊ ကျနော်တို့ လယ်သမားတွေလဲ အလုပ်လက်မဲ့ဖြစ်သွားကြမယ်၊ ဒါကြောင့် ဒီစီမံကိန်း ကို ကျနော်တို့ တောင်သူလယ်သမားအဖွဲ့ က ကန့်ကွက်ပါတယ်။ ဒေသခံပြည်သူလူထုများလည်း ကျနော်တို့နဲ့ အတူ ပူးပေါင်းပြီး ကန့်ကွက်ကြပါလို့ ပြောကြားလိုပါတယ် ” ဟု နမ့်ခမ်းမြို့တောင်သူလယ်သမားအဖွဲ့မှ အတွင်းရေးမှူးဖြစ်သူ စိုင်းအောင်မြင် က ပြောသည်။
မတ်လ ၉ ရက်နေ့တွေ့ဆုံပွဲသို့တက်ရောက်လာသော နမ့်ခမ်းဒေသခံများအနေဖြင့်လည်း (ထုန့်မောဝ်ဒေသ ) ရွှေလီမြစ်ဝှမ်းနယ်စပ်၌ တည်ဆောက်မည့် အထူးစီးပွားရေးဇုန်စီမံကိန်းကို သဘောမတူကြကြောင်း၊ နိုင်ငံတော် အစိုးရထံ စုပေါင်းလက်မှတ်ရေးထိုးပြီး ကန့်ကွက်ကြမည်ဖြစ်ကြောင်း တဖက်တွင်လည်း ဆန္ဒထုတ်ဖော်ပွဲများ ပြု လုပ်ကျင်းပ ကြမည်ဖြစ်ကြောင်း တွေ့ဆုံဆွေးနွေးပွဲ ၌ သဘောတူညီချက်များရရှိခဲ့သည်ဟု သိရပါသည်။
