တနိုင်ငံလုံးအပစ်အခတ်ရပ်စဲရေး NCA စာချုပ်လက်မှတ်ရေးထိုးထားသည့် သျှမ်းပြည်တပ်မတော် RCSS/SSA အား ထောက်ပံ့ဆက်သွယ်မှုဖြင့်ဖမ်းဆီးခံရသည့်ရွာသားများအား ဟိုပုံးမြို့နယ်တရားရုံးက ထောင်ဒဏ် ၁ နှစ်မှ ၁၀ နှစ် ထိ ချမှတ်လိုက်သည်။
ဖေဖော်ဝါရီ ၂၆ ရက်နေ့က တရားခံ ၈ ဦးကို သျှမ်းပြည်တောင်ပိုင်း ဟိုပုံးမြို့နယ် တရားရုံးက အမှုပေါင်းများစွာ ဖြင့်ထောင်ဒဏ်ချမှတ်ကာ တောင်လေးလုံးအကျဉ်းထောင်သို့ ပို့ဆောင်ကာ အကျဉ်းချလိုက်သည်။
၂၀၁၇ ခုနှစ် ဂျူလိုင်လလယ်ပိုင်းက ဒေသခံ ၈ ဦးအား RCSS/SSA နှင့်ဆက်သွယ်သည်ဟုဆိုကာ အစိုးရ တပ်မတော်မှ ဖမ်းဆီးထိန်းသိမ်းထား သည်။ ထို့အတူ တပ်တော်မှ တရားလိုအဖြစ် ၎င်းတို့အား အမှု ၁၂ မှုဖြင့် တရားစွဲဆိုကာ ဟိုပုံးမြို့တရားရုံးတော်မှ အဆိုပါရွာသား ၈ ဦး အားထောင်ဒဏ်အသီးသီး ချမှတ်လိုက်ခြင်းဖြစ် သည်။
“တယောက်မှ မလွှတ်ဘူး၊ မနေ့က မနက် ၁၁ နာရီမှာ အမိန့်ချတယ်၊ ၃ နှစ် ၇ နှစ် ၁ နှစ် ၁၀ နှစ်တွေလဲပါတယ်။ အမိန့်ချပြီးတာနဲ့ ချက်ချင်း တောင်လေးလုံးကို ပို့လိုက်တယ်။ တရားသူကြီးက စုရတနာလှိုင် ဖြစ်တယ်၊ တရား မျှတမှု ရှိမရှိလားတော့မပြောတတ်ဘူး၊ ဒါမယ့်တရားစီရင်ရေးတော့ ပြည်သူကနေပြီးမှ ယုံကြည်တယ် အားကိုး တယ်ဆိုတဲ့ဟာ ပြတ်သားသွားတာပေါ့၊ သူတို့ ဒီလိုအမိန့်ချလိုက်လို့ ပြည်သူတွေတရားရုံတော်ကို အားကိုးလို့ မရတော့ဘူး၊ ဒီတရားစီရင်ရေးမှာ ဘာလို့လဲဆိုတော့ သူတို့ လွှတ်ပေးလို့ရတယ် ဥပဒေနဲ့ပြောရင် ကောင်း ကောင်းလွှတ်ပေးလို့ရတယ်၊ဒါမယ့် သူတို့ မလွတ်ပေးရဲဘူး သူတို့မလွတ်ရဲလို့ အကုန်အမိန့်ချလိုက်တယ်” ဟု အမှုလိုက်ရှေ့နေ စဝ်မြဝတီ က သျှမ်းသံတော်ဆင့် ကိုပြောသည်။
အမှု ၁၂ မှုမှာ လက်နက်မှု၊ ဥပဒေမှု နှင့် အရေးယူတာဖြစ်ပြီး ပို့ကုန်သွင်းကုန် ဥပဒေ၊ ဆက်သွယ်ရေးဥပဒေ နှင့် စစ်ဆင်ရေးနယ်မြေအတွင်းမှာ ဝင်ရောက်တယ်ဆိုပြီး ကာကွယ်ရေးဥပဒေ နှင့် အရေးယူထားတာဖြစ်ကြောင်း သိရသည်။ အဆိုပါ ဖမ်းဆီးထားသည့် ဒေသခံ ၈ ဦးသည် ၁၀ ကြိမ်ထက်မနည်း တရားရုံးတက်ရပြီး တစ်စုံ တစ်ရာ ချမှတ်စီရင်ခြင်းရှိဘဲ ရုံးဆက်တိုက် ချိန်းဆိုကြောင်း သိရသည်။
၂၀၁၇ ဂျုလိုင် ၁၇ ရက်နေ့က ဟိုပုံးမြို့နယ် နမ့်ခုတ် ရွာသား ၈ ဦးအား အစိုးရတပ်မတော် ခြေလျင်တပ်ရင်း ခလရ အမှတ် ၂၂၅ နှင့် ၂၄၉ တို့မှ သျှမ်းပြည်တပ်မတော် RCSS/SSA ၏ သတင်းမေးမြန်းရာ သတင်း မပေးဟုဆိုကာ ၄င်းတို့အား ဖမ်းဆီခေါ်ဆောင် အချုပ်ခန်းတွင်ချုပ် နှောင်ထားခြင်း ဖြစ်သည်။
သျှမ်းပြည်တပ်မတော် RCSS/SSA သည် အစိုးရတပ်မတော် နှင့် တစ်နိုင်ငံလုံး ပစ်ခတ်တိုက်ခတ်မှု ရပ်စဲရေး စာချုပ် လက်မှတ်ရေးထိုးထားသောကြောင့် နေပြည်တော် အစိုးရမှ ၂၀၁၅ အောက်တိုဘာလက မတရား အသင်းမှ စာရင်းပယ်ဖျက်ထားသည့် သျှမ်းတိုင်းရင်းသား လက်နက်ကိုင်တော်လှန်ရေးတပ်တစ်ခုဖြစ်သည်။
