လားရှိုးရိုးမဘဏ် ဗုံးပေါက်ကွဲမှု ဘဏ်ဝန်ထမ်း ၂ ဦးသေဆုံး

0

သျှမ်းပြည်မြောက်ပိုင်းလားရှိုးမြို့လယ် ရပ်ကွက် ၂ ရှိ ရိုးမဘဏ်တွင် ဗုံးပေါက်ကွဲရာ ဘဏ်ဝန်ထမ်း ၂ ဦးသေဆုံး ကြောင်း သိရသည်။

ဖေဖော်ဝါရီ်လ ၂၁ ရက် ညနေ ၄ နာရီခွဲတွင် အမှတ် ၁ ရဲစခန်းနှင့်မျက်နှာချင်းဆိုင်ရှိ ရိုးဘဏ်နှင့် ဧရာဝတီဘဏ်ကြား ဗုံးတလုံးပေါက်ကွဲခဲ့ခြင်းဖြစ်ပြီး ပေါက်ကွဲမှုကြောင့် ပေ ၁၀၀ ၀န်းကျင်ခန့်အထိ ထိခိုက်ပျက်စီးကြောင်း လားရှိုးမြို့ခံ တဦးကပြောသည်။

“ပေါက်ကွဲတဲ့နေရာက အစိုးရရုံးတွေ ဆေးရုံတွေရှိတဲ့နေရာလေ။အရင်က စာရေးကုန်းလို့တောင်ခေါ်တယ်။ စျေးနဲ့လည်းနီးတယ်။ တကယ့်ကိုမြို့တွင်းနေရာဘဲ။ တချို့က ထရန်စ်ဖော်မာပေါက်ကွဲတာလားတဲ့။ ရိုးမဘဏ်အပြင် အနောက်က ဧရာဝတီဘဏ်ရော လမ်းမတော်လမ်းကြီးခြားထားတဲ့ အရှေ့က ကျန်းမာရေးဌာနရုံးရော အကုန်ထိခိုက်တယ်လေ။ မှန်တွေဘာတွေကွဲ။ လူတွေလည်းထိခိုက်ဒဏ်ရာရအများအပြားဘဲ။ ၂ ယောက်သေတယ်လို့ကြားတယ်။ ဘဏ်စာရေး ပါ။ လားရှိုးကလူဘဲ ။ ”- ဟု လားရှိုးမြို့ခံ စိုင်းလွယ်က ပြောသည်။

ထိခိုက်ဒဏ်ရာရသူများအား ဆေးရုံကြီးသို့ အတွင်းလူနာ ၁၆ ဦး ပြင်ပလူနာ ၈ ဦးပို့ဆောင်ရပြီး အတွင်းလူနာအနက်မှ ဘဏ်စာရေး မမော်မော်နှင့် မစန္ဒာထွန်းတို့ သေဆုံးသွားခဲ့ကြောင်းလည်း သိရသည်။

ထိုအတွက် ၀မ်းနည်းခြင်းအထိမ်းအမှတ်အဖြစ် လားရှိုး ရိုးမဘဏ်ကို ဖေဖော်ဝါရီလ ၂၂ ရက်မှစပြီး ယာယီပိတ်ထားမည်ဖြစ်ကြောင်း ရိုးမဘဏ်လီမိတက်က ၄င်း၏ဖေ့စ်ဘုစာမျက်နှာတွင်ရေး သားဖော်ပြ ထားသည်။

ယခုကဲ့သို့ပြင်းထန်သောပေါက်ကွဲမှုမျိုး လားရှိုးတွင် ယခင်က မရှိဖူးသဖြင့် လားရှိုးအတွက်အကြီးမား ဆုံးပေါက်ကွဲမှုတခုဟုလည်းဆိုနိုင်ကြောင်းလားရှိုးမြို့ခံများကပြောဆိုနေကြသည်။

SHARE

LEAVE A REPLY

Please enter your comment!
Please enter your name here