၅၂ ကြိမ်မြောက် မူလမင်းကွန်းကမ္မဌာန်းတိုက် သံဃာ့ညီလာခံ ကွန်ဟိန်းမြို့တွင်ပြုလုပ်ကျင်းပ

0

၅၂ ကြိမ်မြောက် သျှမ်းပြည်နယ်လုံးဆိုင်ရာ မူလမင်းကွန်း ကမ္မဌာန်းတိုက်များ တရားပြဆရာတော်များနှင့် ပဋိပတ္တိ သာသနာ့နုဂ္ဂဟအဖွဲ့များ၏ ညီလာခံတရားပွဲတော်ကို သျှမ်းပြည်အလယ်ပိုင်းကွန်းဟိန်းမြို့နယ်တွင်ကျင်းပရာ သျှမ်းပြည်လူထု ၁ သောင်းနီးပါး တက်ရောက်ဒါနပြုကြကြောင်းသိရသည်။

ညီလာခံကို ဖေဖော်ဝါရီလ ၁၄ ရက်နေ့မှ ၁၇ ရက်နေ့အထိ ကွန်ဟိန်းမြို့နယ် သာသနာ့မာရ်အောင်ကမ္မဌာန်းတိုက်တွင်ကျင်းပခဲ့ခြင်းဖြစ်ပါသည်။

“သျှမ်းပြည်နယ်အနှံ့က မူလမင်းကွန်းကမ္မဌာန်းတိုက် ၃၄ တိုက်ကကိုယ်စားလှယ်တော်တွေအဖြစ် သံဃာတော်စုစုပေါင်း ၂၃၀ ပါးကြွရောက်တယ်။ သာမဏေတော်တွေကအပါးပေါင်း ၈၀ ။ ရသေ့၊သီလရှင်က ၆၀။ တရားပြဆရာက ၈၀ ညီလာခံတက်ရောက်ဆွေးနွေးတယ်။ ပြီးခဲ့တဲ့နှစ်အတွင်းကိုယ့်ဒေသတွေမှာ တရားစခန်းဖွင့်ခဲ့တဲ့ကာလအတွင်း အခက်အခဲတွေဘယ်လိုရှိသလဲ။ တရားအားထုတ်တဲ့ ယောဂီတွေအခြေအနေဘယ်လိုရှိသလဲ။ နောက်နှစ်တွေကျရင်ဘယ်လို စီစဉ်ထားကြသလဲ စသဖြင့် ဆွေးနွေးကြပါတယ်။ နောက်နှစ်ကျရင် ၅၃ ကြိမ်မြောက် သံဃာ့ညီလာခံကို နမ္မတူမြို့နယ် မန်စံကမ္မဌာန်းတိုက်မှာ ပြုလုပ်ခွင့်ပေးဖို့ ဒေသခံတွေက တောင်းထားတယ်။” – ဟု လင်းခေးမြို့သား ကုသိုလ်ပြု ပွဲတက်ရောက်သည့် မောဝ်ရွှေပီ ကသျှမ်းသံတော်ဆင့်အားပြောပြသည်။

ညီလာခံကာလအတွင်း ညပိုင်းတွင်တရားပွဲများလည်း ကျင်းပခဲ့ပြီး နေ့ခင်းပိုင်းတွင်လည်း ဒေသခံများမှ ဧည့်သည်တော်များအား အစားအသောက်များဖြင့်ဧည့်ခံကျွေးမွေးခဲ့သည်။

“အနယ်နယ်အရပ်ရပ်ကလာတဲ့ ဧည့်သည်တွေ အလှူရှင်တွေ ဝေယျာဝစ္စတွေ စာရင်းအရ ရ၀၀၀ ကျော်ရှိတယ်။ စာရင်းလာမပေးတဲ့ဧည့်သည်တွေလည်းရှိတယ်ဆိုတော့ ၁ သောင်းထက်မနည်းတော့ရှိမယ်လို့ခန့်မှန်းရပါတယ်။ကျနော်တို့ အိမ်ရှင် ပွဲရှင်အနေနဲ့လည်း ၀မ်းမြောက်ဝမ်းသာဖြစ်ရပါတယ်။ ကုသိုလ်ယူရင်း လည်ပတ်ရင်းပေါ့ ”- ဟု လည်း ပွဲကျင်းပရေးကော်မတီဝင် ဦးလုံးစိုင်းကပြောပါသည်။

သျှမ်းပြည်နယ်အတွင်း သျှမ်းတောင်ပိုင်းလင်းခေးမြို့တွင် မူလဘူစတင်ခဲ့သော သထုံ မူလမင်းကွန်း လမ်းစဉ် ကမ္မဌာန်းတရား စခန်းသည် လက်ရှိတွင်သျှမ်းပြည်အနှံ့ ၃၄ နေရာရှိပြီးတနှစ်တကြိမ် တရားစခန်းဖွင့်ပါသည်။ တရားစခန်းဖွင့်လှစ်သည့်ကာလမှာ တနေရာနှင့်တနေရာမတူပေ။ ၂ လ မှ ၆ လ အထိ စခန်းဖွင့်လှစ်ကာ ယောဂီများအားတရားကျင့်ကြံခွင့်ပြုခဲ့သည်။ တနှစ်တကြိမ်တရားစခန်းမှ ကြုံတွေ့ခဲ့ရသည်များကို သံဃာတော်များကတွေ့ဆုံကာ ဆွေးနွေးဖြေရှင်းခဲ့ကြပြီး တရားစခန်းများအကောင်းဆုံးဖြစ်အောင် ဖွင့်လှစ်ပေးနိုင်ဖို့ အစီအစဉ်များချမှတ်ခဲ့ကြသည်။ ယခုနှစ်တွင် အဆိုပါကျင့်စဉ်ဖြင့်တရားစခန်း စတင်ဖွင့်လှစ်သည့်ထိုင်းနိုင်ငံ မယ့်ဟောင့်ဆောင်ခရိုင်မှ သာသနာတော်အကျိုးပြုများလည်း ကွန်ဟိန်းသံဃာ့ညီလာခံသို့ လေ့လာသူ ဧည့်သည်တော်အနေဖြင့် တက်ရောက်ခဲ့ကြောင်းသိရပါသည်။

SHARE

LEAVE A REPLY

Please enter your comment!
Please enter your name here