သျှမ်းပြည်မြောက်ပိုင်း ကွတ်ခိုင်မြို့နယ်တွင် တိုက်ပွဲများဖြစ်ပွါးမှုကြောင့် သန္နီမြို့သို့ထွက်ပြေးတိမ်ရှောင်လာသည့်စစ်ဘေးရှောင်ဒုက္ခသည် ၁၀၀ ကျော်မှာ ယနေ့တိုင်နေရပ်မပြန်နိုင်သေးကြောင်းသိရသည်။
သိန္နီမြို့နယ် ပြည်နယ်လွှတ်တော်အမှတ် ၁ နန်းခင်ထားရီက- “၅ ရက်နေ့ကတည်းကစပြီးတဖွဲဖွဲရောက်လာပါတယ် သိန္နီကို။ အခုဆိုရင် ၁၆၀ ၀န်းကျင်ရှိပါပြီ။ မွေးကင်းစ ကလေး ၂ ယောက်ရှိပါတယ်။ ကျန်တာကတော့ အမျိုးသား ရ၀ ကျော်နဲ့ အမျိုးသမီး ၈၀ ကျော်ပေါ့။ အခုသူတို့ကို သိန္နီမြို့ ကောင်းအိုင်အုပ်စုက ဘုန်းကြီးကျောင်းမှာ တည်းဖို့နေရာချထားပေးတယ်။ စားဝတ်နေရေးအတွက်အခက်အခဲဖြစ်နေပါတယ်။ နေရပ်မပြန်နိုင်ကြသေးပါဘူး”- ဟု သျှမ်းသံတော်ဆင့်အားပြောသည်။
ဖေဖော်ဝါရီလဆန်းကတည်းက ကွတ်ခိုင်မြို့နယ် ကွတ်ခိုင်နှင့်သိန္နီကြား ၀မ့်ဆိုင်းခေါင်ရွာနှင့် ၀မ့်တာ့ခိုင်ရွာအနီးတွင် အစိုးရတပ်နှင့်တအာင်းတပ်တို့ကြားတိုက်ပွဲများဖြစ်ပွါးမှုကြောင့် ဒေသခံရွာသား ၁၆၀ ခန့် သိန္နီမြို့သို့ ထွက်ပြေးတိမ်းရှောင်လာခဲ့ကြခြင်းဖြစ်သည်။
ကျေးလက်ရွာသားများမှာ သျှမ်း၊ ကချင် ရွာသားများဖြစ်ကြောင်းသိရသည်။
အဆိုပါစစ်ဘေးရှောင် ၁၆၀ ခန့်အား သိန္နီမြို့ အုပ်ချုပ်ရေးပိုင်းဆိုင်ရာက ဆန်အိတ် ၁၀ အိတ် သွားရောက်ထောက်ပ့ံပေးထားပြီး လက်ရှိတွင်မူ စားသောက်နေထိုင်ရေးအတွက် အခက်အခဲရှိနေကြောင်း ဆိုပါသည်။
အလားတူ သျှမ်းပြည်မြောက်ပိုင်း နမ့်ခမ်း၊ နမ္မတူ၊ကျောက်မဲ၊နမ့်ဆန် တို့တွင်လည်း တအာင်းတပ်ဖွဲ့သည် အစိုးရတပ်နှင့်လည်းကောင်း သျှမ်းပြည်တပ်မတော် RCSS/SSA နှင့်လည်းကောင်းတိုက်ပွဲများဖြစ်ပွါးလျှက်ရှိကြောင်း သိရသည်။
ပြီးခဲ့သည့် ဂျန္နဝါရီလကမူ နှစ်ဦးနှစ်ဘက်ကြားပစ်ခတ်တိုက်ခိုက်မှုရပ်စဲနိုင်ရေးအတွက် RCSS/SSA နှင့် TNLA တို့ကြား ပဏာမဆွေးနွေးမှုပြုလုပ်ခဲ့ကြောင်းသိရသည်။
